Tesla-ның Еуропадағы сатылымы төмендеп жатыр, ал бәсекелесі BYD-тің сатылымы өсуде
Tesla-ның Еуропадағы ең ірі электромобиль нарықтарында — Германия мен Ұлыбританиядағы сатылымы шілде айында өткен жылмен салыстырғанда екі есе қысқарды. Сондай-ақ, өткен айда Франция, Норвегия, Испания және Швецияда да Tesla-ға деген сұраныс азайды. Tesla өз нарығын Қытайлық негізгі бәсекелесі — BYD компаниясына біртіндеп беріп жатыр. Бұл компанияның Германия мен Ұлыбританиядағы сатылымы бір жылда төрт еседен артық артқан.
Егжей-тегжейлі
Tesla-ның Германиядағы жеткізілімі шілде айында былтырғы жылмен салыстырғанда 55%-ға төмендеді, ал дәл осы айда электромобильдердің жалпы тіркелімі 58%-ға артты, деп хабарлады сейсенбі күні Германияның KBA агенттігі. Сол сияқты, Ұлыбританияның SMMT агенттігі Tesla сатылымының 60%-ға қысқарғанын мәлімдеді, ал электромобильдердің жалпы тіркелімі жылдық есепте 9,1%-ға өскен. Бұл Еуропадағы екі ірі автонарық.
Бұған дейінгі аптада Францияның автокөлік өндірушілер қауымдастығы (PFA) жариялаған дерекке сәйкес, шілде айында Tesla тіркелімі 27%-ға, ал жылдың алғашқы жеті айында шамамен 40%-ға төмендеген. Бұл — Еуропадағы үшінші маңызды электромобиль нарығы. Сонымен қатар, шілде айында Tesla-ның Норвегия, Испания және Швециядағы сатылымы да азайғанын MarketWatch басылымы жазды.
Bloomberg агенттігінің пікірінше Tesla-ның Еуропадағы әлсіз позициясы жергілікті автокөлік өндірушілер мен BYD үшін жаңа мүмкіндіктер ашады. Германияда — бұл Еуропадағы ең ірі автонарық және Tesla-ның аймақтағы жалғыз зауыты орналасқан ел — BYD биыл үшінші рет Tesla-дан көбірек көлік сатты. Ал бүкіл Еуропа бойынша BYD Tesla-ны алғаш рет сәуір айында басып озған. Кейбір аналитиктердің болжамынша, жылдың қорытындысы бойынша бұл бренд америкалық компанияны жаһандық нарықта да басып озуы мүмкін. Бұл ретте, BYD көліктері АҚШ-та әлі де сатылмайтынын Bloomberg еске салды.
Ұлыбританияда BYD шілде айында өткен жылмен салыстырғанда алты есе көп көлік тіркеді. Бұл көрсеткіш компанияға нарықтағы үлесін жыл басынан бері 1,91%-ға дейін жеткізуге мүмкіндік берді — бұл Tesla-дан небәрі 0,1 пайыздық тармаққа аз, деп қосты Bloomberg.
Tesla сатылымы неге төмендеуде
Bloomberg жазуынша, компания жылдың басындағы әлсіз нәтижесін Tesla-ның негізгі моделі — Model Y өндірісінің жаңартылған нұсқасын шығару мақсатында өндіріс желілерін жаңартумен байланысты өндіріс кестесінің бұзылуымен түсіндіреді.
Алайда, сатылымдағы құлдырау жаңартылған кроссовердің өндірісі ұлғайғаннан кейін де жалғасып, инвесторлардың брендтің беделіне Tesla бас директоры Илон Масктың саяси белсенділігі зиян тигізуі мүмкін деген алаңдаушылығын күшейтті, деп түсіндіреді агенттік.
Tesla дағдарыспен қалай күресуде
Дүйсенбі күні компания Маскқа шамамен $30 млрд көлемінде Tesla акциялары түріндегі аралық төлемді мақұлдағанын хабарлады. Бұл шешім оның 2018 жылғы өтемақы пакеті бойынша жалғасып жатқан сот ісі аясында қабылданды. Инвесторлар бұл жаңалыққа дүйсенбі күні оң реакция танытып, бұл Масктың Tesla-дағы жұмысына көбірек уақыт бөлуіне түрткі болады деп үміттенді.
«Біз бұл грант Масктың кем дегенде 2030 жылға дейін Tesla бас директоры болып қалуына мүмкіндік береді және артық акциялар мәселесін шешеді деп санаймыз», — деді Wedbush аналитигі Дэн Айвз Barrons басылымына берген инвесторларға арналған жазбасында. — «Маск — Tesla-ның ең маңызды активі болып саналады, ал бұл өтемақы мәселесі акционерлерді үнемі алаңдатуда».
