Tesla жеткізілімдері тоқсан қорытындысында болжамнан төмен болуы мүмкін – Baird
Tesla-ның екінші тоқсандағы электромобиль сату көрсеткіштері Wall Street сарапшылары күткен орташа болжамнан төмен болуы мүмкін, деп ескертті Baird Equity Research. Компанияның Еуропа мен Қытайдағы табысы азайып барады, себебі тұтынушылар барған сайын қытайлық брендтерге көбірек мән бере бастаған. Дегенмен, Tesla үшін Техаста роботакси қызметінің сынақ түріндегі іске қосылуы жағымды жаңалық болды. Сарапшылардың айтуынша, инвесторлар енді компанияны тек сатылған электромобильдер санына қарап бағаламайды.
Егжей-тегжейі
Baird Equity Research дерегінше, Tesla компаниясы екінші тоқсан қорытындысы бойынша жеткізу туралы деректерді 2 шілдеде жариялауы тиіс. Алайда бұл көрсеткіштер инвесторлардың күткенінен төмен болуы мүмкін, деп хабарлады MarketWatch агенттігі. Baird-тың сарапшысы Бен Калло жеткізілім көлемі 377 мың автокөлікті құрайды деп болжаған. Бұл — FactSet деректері бойынша Уолл-стрит консенсусынан 13 мыңға аз. 2024 жылдың екінші тоқсанында Tesla 444 мың көлік жөнелткен.
«Үшінші тарап деректері — Қытайдағы көлік тіркеуі мен мамырдағы көтерме сауда көрсеткіштері — біздің болжамымыздың консенсустан төмен болатынына сенімімізді арттыра түседі», — деп жазды Калло.
Сарапшының айтуынша, нәтижелерге Model Y үлгісінің жаңартылуы да әсер еткен болуы мүмкін. Бұл компания желісіндегі ең танымал көліктердің бірі. Tesla осы модельдің өндірісін бірінші тоқсан соңында барлық төрт зауытында арттырған. Бұл процесс екінші тоқсан басында да жалғасуы мүмкін деп болжайды Калло.
Сатылым қалай төмендеді?
Еуропада Tesla сатылымы қатарынан бесінші айда төмендеуде, деп көрсетті Еуропа автокөлік өндірушілері қауымдастығы (ACEA). Мамыр айында ЕО елдерінде 8729 жаңа Tesla көлігі тіркелген. Бұл өткен жылдың сол кезеңімен салыстырғанда 40 пайызға аз. Ал жалпы ЕО, Ұлыбритания және Еуропаның еркін сауда қауымдастығы елдерінде (Исландия, Лихтенштейн, Норвегия және Швейцария) тіркеу саны 28 пайызға төмендеп, 13 863 көлікті құрады. ACEA статистикасына сәйкес, Tesla-ның Еуропадағы нарық үлесі 2024 жылдың мамырында 1,8% болса, 2025 жылдың мамырында 1,2% ғана болды.
Мамырда ЕО елдеріндегі электромобиль нарығы өсіп жатқанымен, Tesla сатылымы төмендеді. Батареямен жұмыс істейтін электромобильдердің сатылымы бір жылда 25 пайызға өсті, тек Германияның өзінде бұл өсім 45 пайызға жуық болды.
Ал Қытайлық автоөндірушілер Еуропада мамыр айында 65 808 көлік сатып, нарықтағы үлесін екі еседен астам арттырып, 5,9 пайызға жеткізді. Бұл туралы JATO Dynamics хабарлады. «ЕО Қытай электромобильдеріне кедендік баж енгізгенімен, ҚХР брендтері Еуропада сенімді өсімді көрсетіп келеді», – деді JATO сарапшысы Фелипе Муньос.
Tesla-ның екінші ірі нарығы саналатын Қытайда да жеткізілім азайып жатыр, деп жазды Reuters. Қытай жеңіл автокөлік қауымдастығының дерегінше, Model 3 және Model Y үлгілерінің Шанхайдағы зауыттан жөнелтілімі мамырда өткен жылмен салыстырғанда 15 пайызға азайып, 61 662 көлікке тең болған (сәуірдегі төмендеу – 6%). Қытай нарығындағы негізгі бәсекелес — BYD компаниясы.
Baird болжамынша, сатылымның азаюына жаңа бюджеттік электрокөлік туралы ресми жарияланымның болмауы да әсер етті. Калло бұл жаңалық маусым айының соңына дейін жарияланады деп күтті.
«Айдың аяқталуына аз ғана уақыт қалғанын ескере отырып, біз презентация кейінге шегерілуі мүмкін деп болжап отырмыз», — деп жазды Калло. Бұған дейін ол жаңа модельдің қазіргі модельдерден едәуір өзгеше болатынын болжаған. Бірақ енді бұл Model 3 немесе Model Y-дің жеңілдетілген нұсқасы болады деп санайды. Және оны қазіргі өндірістік желілерде құрастыру мүмкін болады. MarketWatch-тың жазуынша, Калло компания бұл модель туралы толық ақпаратты екінші тоқсанның қорытынды есебінде ұсынады деп болжайды. Бұл есеп шілде ортасында жарияланады.
Акциялардың құлдырауын не тежейді?
Baird дерегі бойынша, Tesla-ның сатылымының азаюын соңғы аптада өткен роботакси жобасының сынақ түріндегі іске қосылуы жауып тастауы мүмкін. Остинде Tesla-ның пилотсыз басқару технологиясын көрсетуі инвесторларға үміт сыйлады. Осы оқиғадан кейін дүйсенбіде Tesla акциялары күрт өсті. Алайда сейсенбіде құлдырай бастады, ал сәрсенбіде 3,8 пайызға төмендеді.
Соған қарамастан, Каллоның айтуынша, нарықтың назары енді роботакси жобасына ауысты.
«Жеткізілімдер әлі де компанияның негізгі көрсеткіштерінің бірі болып қала бергенімен, біздің ойымызша, роботаксидің іске қосылуы мен оған байланысты қызығушылық алдағы уақытта басты жаңалық болып қала береді», — деп жазды ол сәрсенбі күні.
