Trump Media «футуристік» термоядролық синтезбен айналысады. Акциялар 40%-ға шарықтады
Truth Social әлеуметтік желісінің иесі — Trump Media & Technology Group (TMTG) термоядролық синтез технологияларын зерттеу және дамытуға маманданған жеке TAE Technologies компаниясымен бірігетінін жариялады. Осы жаңалықтан кейін Trump Media акциялары 40%-дан астам өсті. Barron’s жазуынша, бұл «футуристік» технология ЖИ саласындағы үстемдік үшін күрестің бір бөлігіне айналып отыр.
Егжей-тегжейі
Trump Media & Technology Group пен TAE Technologies арасындағы бірігу келісімі 6 млрд доллардан асады, деп хабарлады TMTG баспасөз релизінде. Trump Media мен TAE Technologies бірлесіп «термоядролық синтезбен айналысатын әлемдегі алғашқы жария түрде саудаланатын компаниялардың бірін» құруды көздеп отыр.
Компаниялардың мақсаты — «Американың ЖИ революциясында жеңіске жетуіне көмектесетін» энергия көздерін жасау, делінген Trump Media хабарламасында. АҚШ-та қарқынды салынып жатқан деректер орталықтары аса көп көлемде энергияны қажет етеді.
Келісім шарттарына сәйкес, TAE мен Trump Media акционерлері біріккен компаниядағы үлесті теңдей 50%-дан алады. Мәміле аясында TAE компаниясының бір акциясы 53,89 доллар деп бағаланды. Біріккен компанияны Trump Media-ның бас директоры Девин Нуньес пен TAE басшысы Михль Биндербауэр бірге басқарады. Тоғыз адамнан тұратын директорлар кеңесіне АҚШ президентінің үлкен ұлы — Дональд Трамп-кіші де кіреді.
Егер реттеуші органдар келісімді мақұлдаса, біріккен компания келесі жылы өнеркәсіптік мақсатқа арналған қуаты 50 мегаватт болатын термоядролық электр станциясының құрылысын бастайды. Кейін қуаты 350–500 мегаватт аралығындағы тағы бірнеше қондырғы салу жоспарланып отыр. Алайда қазіргі кезде әлемде ядролық синтезге негізделген коммерциялық реакторлар жоқ, тек тәжірибелік-эксперименттік нұсқалар ғана бар. Неміс академиялары одағының Energy Systems of the Future жобасы 2024 жылы коммерциялық термоядролық электр станциялары 2045 жылға дейін пайда болуы екіталай деген болжам айтқан.
Акциялар не күйде?
Бейсенбі күнгі саудада Trump Media акциялары 40%-дан астам өсіп, 14,7 долларға жетті. Алайда MarketWatch деректеріне сәйкес, жыл басынан бері компания акциялары 57%-ға арзандаған. Компания әлі де шығынмен жұмыс істеп отыр: үшінші тоқсандағы шығын шамамен 55 млн долларды құрады.
Контекст
Barron’s атап өткендей, ядролық энергетика АҚШ пен Қытай арасындағы ЖИ саласындағы үстемдік үшін бәсекеде негізгі майданға айналып келеді. Алайда АҚШ-тың ашық нарығындағы бұл бағыттағы компаниялар саны аз. Солардың ішіндегі ең белгілілерінің бірі — Oklo, оны құруға ЖИ нарығындағы жетекші ойыншылардың бірі OpenAI басшысы Сэм Альтман қатысқан.
TAE Technologies — жария емес компания, бірақ оның инвесторлары қатарында Google, Chevron және Goldman Sachs бар, деп жазады Barron’s. Бейсенбіде жарияланған мәліметке сәйкес, TAE компаниясы жеке капиталдан 1,3 млрд доллардан астам қаржы тартқан.
«Қытай термоядролық энергетикаға белсенді түрде инвестиция салып, 2030 жылға дейінгі кезеңде ядролық инфрақұрылымын кеңейтіп жатыр. Бұл АҚШ-қа қысымды күшейтуде. Енді олар жауап ұсынуы керек. Осылайша елеулі капиталы бар TAE алдағы онжылдықта АҚШ-тың ядролық амбицияларының басты қатысушысына айналады», — деп жазды Wedbush талдаушысы Дэн Айвс (Barron’s дерегі бойынша).
2025 жылы Trump Media биткоин мен оған байланысты активтерді сатып алуға белсенді кірісіп, жалпы сомасы 2 млрд долларды құраған. Бұл оны цифрлық резервтер көлемі бойынша әлемдегі ірі компаниялардың біріне айналдырды. Сонымен қатар Trump Media спорттық бәс тігу және өзге де оқиғалар нарығына шығуды шешті.
