Trump Media акциясы жоғары залал аясында жылдық максимумнан 70% құлады

Truth Social әлеуметтік желісінің иесі Trump Media & Technology Group 7 қарашада тоқсандық есеп жарияланғаннан кейін акциясы 3,2% құлап, $12,9-ға дейін түсті. Бұл — 2024 жылдың қыркүйегінен бергі минималды құны. Жыл басынан бері қағаздың бағасы қаңтардағы максимуммен салыстырғанда шамамен 70% жоғалтты.

Акция неге құлады?

Дональд Трамптың екінші президенттік мерзімі басталғаннан кейін бір жыл өтпей, оның сайлаудағы жеңісінен кейін туған эйфория және соған байланысты Trump Media акциясының өсуі басылды. Truth Social әлеуметтік желісіндегі жарнама сатылымы төмендеп жатыр, ал компания әлі күнге дейін пайдаға жете алмай отыр, деп жазды Bloomberg.

Үшінші тоқсанда Trump Media шамамен $55 млн залал тіркеді — бұл өткен жылдың дәл осындай кезеңіндегі $19 млн залалдан екі есе көп. Truth Social иесі биржаға шыққаннан бері әлі бірде-бір рет пайда көрсете алған жоқ. Компания өз қызметін кеңейтіп, криптовалюта және бәс тігу салаларына кіргеніне қарамастан, өткен тоқсандағы табысы $1 млн-нан азды құрады. Бұл — өткен жылғы деңгейден сәл төмен нәтиже, ол кезде компания АҚШ-тағы сайлауға дайындықтың әсерінен қысқа мерзімді қолдау тапқан еді, деп жазды Bloomberg.

Криптовалюта нарығындағы тұрақсыз жағдай компанияның перспективасын жақсартуға да көмектеспей отыр, деді Bloomberg. Қыркүйек айының соңындағы деректерге сәйкес, Trump Media шамамен $1,5 млрд көлемінде цифрлық активтерге ие болған, оның ішінде $1,3 млрд биткоинге, ал шамамен $147 млн — Cronos токеніне тиесілі. Компанияның мәліметінше, үшінші тоқсанның соңында оның жалпы активтері $3,1 млрд болып бағаланды.