Trump Media спорт және өзге де оқиғаларға арналған ставкалар нарығына шығады
Дональд Трампқа тиесілі Trump Media & Technology Group өзіне қарасты Truth Social платформасында пайдаланушыларға түрлі оқиғаларға бәс тігуге мүмкіндік беретін Truth Predict сервисін іске қосуды жоспарлап отыр. Пайдаланушылар саяси сайлаулардың нәтижесіне, инфляцияның өзгерісіне, шикізат бағаларына және спорттық жарыстарға ставка жасай алады. Болжам келісімшарттарына арналған платформаны сынақтан өткізгеннен кейін сервисті алдымен АҚШ-та, кейін халықаралық нарықта толық іске қосу жоспарланған.
Жоба ставкаларды өңдеу үшін Crypto.com Derivatives North America платформасын пайдаланбақ. Бұл шешім Trump Media мен криптобиржа арасындағы ынтымақтастықты одан әрі нығайтады. Бұған дейін, тамыз айында, Trump Media CRO токенін сатып алу және сақтау үшін криптоказначейлік компания құру жөнінде келісім жасаған болатын. Бұл токеннің блокчейні Crypto.com тарапынан қолдау табады.
Жаңа бастама Trump Media-ның бөлшек аудиторияның қызығушылығын монетизациялауға бағытталған жобалар сериясын толықтырады, деп жазды Bloomberg. Бұл үрдіс Polymarket және Kalshi сияқты ставка платформаларындағы сауда көлемінің рекордтық өсуі аясында жүріп жатыр. CME Group және Intercontinental Exchange сияқты ірі қаржы ұйымдары да нақты оқиғаларға ставка жасау нарығына кіру мүмкіндігін зерттеп отыр.
Truth Predict жобасы бұл салада АҚШ бұрынғы президентінің ұлы Дональд Трамп-кішімен байланысты компаниялардың позициясын күшейтуі мүмкін, деп санайды агенттік. Ол Trump Media директорлар кеңесіне кіреді және жылдың басында ставкаларға арналған екі ірі платформа — Kalshi мен Polymarket жобаларында кеңесші атанған. Бұдан бөлек, Трамп-кішіге серіктес 1789 Capital қоры Polymarket компаниясынан үлес сатып алған.
Сейсенбі күнгі сауда барысында Trump Media & Technology Group акциясы 2,5% қымбаттап, $16,4 деңгейіне жетті. Ал жыл басынан бері компанияның капитализациясы шамамен 52% қысқарған. Сол уақытта болжам нарығын дамытып жатқан DraftKings және Flutter Entertainment акциясы жаңалық шыққаннан кейін сәйкесінше 4% және 2% құлады.
