Волождың Nebius компаниясы бір жылда табысын жеті есе арттырды. Акциялары күрт өсті
Қазақстан тумасы және «Яндекс» негізін қалаушылардың бірі Аркадий Волождың жасанды интеллект (ЖИ) стартапы Nebius-тың акциялары 7 тамыздағы саудада мықты тоқсандық есептен кейін шамамен 19%-ға қымбаттады. ЖИ-ға арналған бұлтты серверлерді жалға беретін компания сатылымын 625%-ға арттырғанын хабарлады және жылдық табыс қарқыны шамамен $1 млрд болады деп болжайды. Шілдеде Goldman Sachs Nebius акцияларын сатып алуды ұсынған және олардың 50%-ға өсуін болжаған еді.
Егжей-тегжейлі
Бейсенбі күнгі саудада Аркадий Волождың Nebius Group акциялары 18,6%-ға өсіп, $65,31-ға жетті. Компания биылғы жылдық табыс қарқынын (ARR — есептік тоқсанның соңғы айындағы сатылымды 12-ге көбейту арқылы есептеледі) $900 млн-нан $1,1 млрд-қа дейін болады деп күтеді. Бұл алдыңғы болжамынан ($750 млн – $1 млрд) жоғары.
«ЖИ инфрақұрылымына — есептеу қуатына, бағдарламалық жасақтама мен сервистерге сұраныс жаңа қолдану сценарийлері пайда болған сайын арта береді, — деді Nebius бас директоры Аркадий Волож. — Біз осы үлкен мүмкіндікті пайдалану үшін қуаттарды белсенді түрде арттырып жатырмыз және 2026 жылдың соңына дейін деректер орталықтары мен GPU кластерлеріне 1 ГВт-тан астам электрмен жабдықтауды қамтамасыз ету бойынша жұмыс істеп жатырмыз».
Чип өндіруші Nvidia инвестиция салған бұлтты провайдер табысын 2024 жылдың екінші тоқсанымен салыстырғанда 625%-ға арттырды. Сатылым $105,1 млн болды, ал FactSet бағалауы бойынша Уолл-стрит $101 млн күтті, деп жазады Investor’s Business Daily.
Сонымен қатар, таза шығын 48,5%-ға өсіп, $91,5 млн-ға жетті. Өткен жылдың соңында компания Еуропада ЖИ инфрақұрылымын дамытуға $1 млрд инвестиция салу жоспарын жариялаған. Сондай-ақ АҚШ-та инфрақұрылымды кеңейту жүріп жатыр — Канзас-Сити мен Нью-Джерсиде деректер орталықтары салынуда.
Сарапшылар не дейді
Investor’s Business Daily мәліметінше D.A. Davidson сарапшысы Александр Платт есеп жарияланғаннан кейін Nebius акцияларының мақсатты бағасын $65-тен $75-ке дейін көтерді. Бұл бейсенбідегі сауда жабылу бағасынан шамамен 15%-ға жоғары. Платт Nebius акцияларын DaVinci бағдарламасы аясында сатып алуды ұсынады. Бұл бағдарлама қысқамерзімді қаржылық көрсеткіштерге емес, әлеуетті серпінді компаниялар мен басқа да факторларға назар аударады. «Күшті екінші тоқсан базалық бизнестің күткеннен жоғары табысымен және деректер орталықтарын кеңейту жоспарының жеделдеуымен нығайтылды», — деп жазды ол.
Seeking Alpha сарапшысы Джек Боуман: «Nebius жылдық табыс қарқыны (ARR) $1 млрд-тан асқан маңызды кезеңге жетті. Бұл тоқсаннан тоқсанға табыстың екі есе өсуінен кейін болды. Бұл — компанияның қазіргі бағасын ақтау үшін қажет өсім және акционерлер үшін тамаша белгі: ЖИ инфрақұрылымына сұраныс жақын уақытта жоғалмайды» деді.
Жыл басынан бері Nebius акциялары 135%-дан астам қымбаттады. MarketWatch дерегінше, компанияны бес сарапшы қадағалайды және барлығы сатып алуды ұсынады (төрт — Buy, біреуі — Overweight). Өткен айда Goldman Sachs акцияларға «сатып алу» бағасын бере бастады. Уолл-стриттің орташа мақсатты бағасы — $68,8, бұл бейсенбідегі жабылу бағасынан 5,3%-ға жоғары.
Контекст
Амстердамда орналасқан Nebius өткен жылы ресейлік активтерін сатқаннан кейін Yandex NV атауын өзгертті. Компания бизнесін қайта іске қосып, ЖИ-ға арналған бұлтты шешімдерге бағыттады, ал оның акциялары 21 қазанда Nasdaq-та қайта саудалана бастады. Желтоқсанда Nebius жеке орналастыру арқылы инвесторлар тобынан, соның ішінде Nvidia-дан, $700 млн тартты. Маусымда қосымша $1 млрд қарыз қаржыландыру алды, деп жазады Investor’s Business Daily.
Nebius Group ресурсты көп қажет ететін ЖИ тапсырмаларын орындауға арналған оңтайлы бұлтты инфрақұрылым мен бағдарламалық платформаны ұсынады. Компания бұлтты сегменттің көшбасшылары — Amazon мен Microsoft-тан нарық үлесін алуды көздейді, сондай-ақ жуырда биржаға шыққан CoreWeave-пен бәсекелеседі. ЖИ инфрақұрылымынан бөлек Nebius Group құрамына автономды көлік жасаушы Avride, білім беру технологиялық компаниясы TripleTen және ЖИ модельдерін үйретуге арналған деректерді дайындау бағдарламалық жасақтамасын әзірлеуші Toloka кіреді. Сондай-ақ Nebius-тің деректер талдамасы бойынша Snowflake-пен бәсекелесетін Clickhouse компаниясында миноритарлық үлесі бар.
