Walt Disney мен CoreWeave-тың табысы: осы аптада инвестор нені білуі керек
Өткен апта жаңалықтар мен корпоративтік есептерге толы болғанымен, алдағы бес сауда күні тыныш өтеді деп болжайды Yahoo Finance.
АҚШ-тағы үкіметтік шатдаун салдарынан макроэкономикалық деректердің жариялануы уақытша тоқтатылғанымен, келіссөздерде белгілі бір ілгерілеу байқалады. The Wall Street Journal-дың мәліметінше кейінге шегерілуі мүмкін есептердің қатарында инфляция, еңбек нарығы, бөлшек сауда және өндірушілер бағасы бойынша деректер бар. «Аймақтық сайлаулар аяқталған соң, бар назар Вашингтонға — бюджет дағдарысында нақты алға жылжу бола ма деген сұраққа — аударылады», — деп келтіреді WSJ LBBW банкінің аналитиктерінің жазбасын.
Қытайда осы аптада жарияланатын кең ауқымды статистикалық деректер инвесторларға әлемнің екінші ірі экономикасының жыл соңындағы жағдайын бағалауға мүмкіндік береді.
Апта ішінде инвесторларды маусымдағы соңғы ірі корпоративтік есептер легі күтеді. Үшінші тоқсан қорытындысын Walt Disney мен Paramount жарияласа, технологиялық секторда Cisco, CoreWeave, Tencent және JD.com, ал шикізат саласында Barrick Mining пен Occidental Petroleum табыстарын ұсынады.
10 қараша, дүйсенбі күні тоқсандық нәтижелерін Barrick Mining, CoreWeave, Maplebear, Occidental Petroleum, Paramount Skydance және Rocket Lab ұсынады.
11 қараша, сейсенбі күні АҚШ-та Ардагерлер күні аталып өтетіндіктен, облигациялар нарығы жұмыс істемейді, бірақ акциялар саудасы әдеттегідей жалғасады. Сол күні өз нәтижелерін AngloGold Ashanti, Oklo және Sony жариялайды.
12 қараша, сәрсенбі күні Circle, Cisco Systems және On Holding есеп береді.
13 қараша, бейсенбі күні АҚШ Еңбек министрлігінің Еңбек статистикасы бюросы (BLS) қазан айының тұтыну бағалары индексін (CPI) жариялауды жоспарлаған болатын, алайда Barron’s атап өткендей, шатдаунға байланысты бұл деректердің шығуы белгісіз мерзімге кейінге қалуы мүмкін. Сол күні қаржылық есептерін Applied Materials, JD.com, Tencent және The Walt Disney Company ұсынады.
14 қараша, жұма күні Қытайда өнеркәсіптік өндіріс, бөлшек сауда және негізгі капиталға салынған инвестициялар бойынша деректер шығады. WSJ-дың жазуынша консенсус-болжам барлық үш көрсеткіштің де өсім қарқыны баяулайды деп күтіп отыр.
