WSJ: Иран деэскалацияны қалайды, ал АҚШ акциялары аптаны жылдам өсіммен бастады
АҚШ-та дүйсенбі күнгі сауда белсенді өсіммен басталды: үш негізгі индекс те 1%-дан астамға көтерілді. Бұған инвесторлардың өткен аптада басталған Иран мен Израиль арасындағы конфликт шектелген күйде қалады деген үміті себеп болды. Бұл үміт Тегеранның әскери әрекеттерді тоқтатып, ядролық бағдарламалары жөнінде келіссөздерді қайта бастауға дайын екенін білдіруімен байланысты, деп жазады WSJ.
Егжей-тегжейлі
— АҚШ-тың негізгі индексі S&P 500 шамамен 1,2% көтерілді.
— Blue chips деп саналатын ірі компаниялар индексі — Dow Jones Industrial Average шамамен 1,15% өсті.
— Nasdaq Composite технологиялық индексі 1,5%-ға артты.
— Шағын капитализациясы бар компанияларды қамтитын Russell 2000 индексі де шамамен 1,2% көтерілді.
— Brent маркалы мұнайдың тамыз айындағы жеткізілімге арналған фьючерстік келісімшарттарының бағасы бір сәтте 3,4%-ға төмендеді, деп хабарлайды Интерконтиненталдық биржа деректері. WTI маркалы америкалық мұнай бағасы да осы шамада арзандады.
Нарықтың оптимизмін не туғызды?
АҚШ акциялары Иран мен Израиль арасындағы конфликт шектелген күйде қалады деген инвесторлардың үмітінің арқасында қымбаттады, деп жазады CNBC. Мұнай бағасының төмендеуі де нарыққа көмектесті
Иран билігі үшінші елдер арқылы АҚШ пен Израильге Тегеранның соғысты тоқтатып, ядролық бағдарлама бойынша келіссөздерді қайта бастағысы келетінін жеткізіп жатыр, деп жазады The Wall Street Journal Таяу Шығыс пен Еуропадағы дереккөздерге сілтеме жасап.
Иран өкілдері Біріккен Араб Әмірліктерінің ресми тұлғаларына Тегеран келіссөз үстеліне қайта оралуға дайын екенін, бірақ бұл үшін АҚШ Израильдің шабуылдарына қатыспауы тиіс екенін мәлімдеген. Сонымен қатар, Иран Израильге де агрессия деңгейін шектеулі ұстау екі тарап үшін де тиімді екенін жеткізген, деп жазады The Wall Street Journal. Алайда басылым сұхбаттастарының айтуынша, Иран ядролық келіссөздерде жаңа мәмілелерге баруға дайын екенінің ешбір белгісін көрсетпеген. Керісінше, егер АҚШ-пен келіссөздерді жаңғырту перспективасы болмаса, Тегеран ядролық бағдарламасын жеделдетіп, соғыс ауқымын кеңейтеміз деп сес көрсеткен.
«Нарық конфликт шектеулі соғыс аясында қалады деген үмітпен жұбанып отыр. Бұл мүмкін деп санаймыз, бірақ негізгі сценарий бойынша бірнеше аптаға созылады деп күтеміз және жағдайдың ушығып, энергетика секторына әсер етуі мен АҚШ-тың араласу тәуекелі жоғары деп есептейміз», — деді Evercore ISI вице-төрағасы Кришна Гуа, деп келтіреді CNBC.
Соғыс қимылдарының уақытша тоқтауы Иранға күштерін қайта топтауға мүмкіндік береді, сондай-ақ Израильге халықаралық қысымның артуына жол ашады, деп атап өтті The Wall Street Journal. Егер АҚШ Иранға қарсы күш қолданудан бас тартса, бұл да Тегеран үшін жеңіс болмақ, деп қосты басылым. Алайда израильдік ұшақтардың Иран астанасының үстінен еркін ұшып жүргенін ескерсек, Израиль билігінің шабуылдарды тоқтатуға негізі аз — олар Иранның ядролық нысандарына көбірек зиян келтіріп, үкімет билігін одан әрі әлсіретуді көздеуі мүмкін, деп жазады The Wall Street Journal.
«Назар геосаяси тақырыптарда қала береді, бірақ конфликт Израиль мен Иран аясында шектеліп тұрғанда, оның нарықтарға айтарлықтай әсер етуі екіталай», — деді The Sevens Report сарапшысы Том Эссей, деп жазады Bloomberg.
Контекст
13 маусымға қараған түні Израиль Иранның ядролық инфрақұрылымы мен негізгі әскери нысандарына соққы жасады. Бұл шабуылдардың салдарынан Иран Қарулы күштерінің элиталық бөлімі — Ислам революциясы сақшылар корпусының қолбасшысы Хусейн Салами қаза тапты. Жауап ретінде Иран Израиль қалаларына, оның ішінде Тель-Авивке зымыранмен соққы беріп, дрондар арқылы да шабуыл жасады.
