Жаңа Tesla алғаш рет зауыттан сатып алушыға өздігінен жеткізілді — Маск
Tesla компаниясының Model Y электромобилі алғаш рет Техастағы зауыттан Остин қаласы арқылы сатып алушының үйіне дейін өздігінен жүріп барды. Бұл туралы Илон Маск хабарлады. Көлікте жолаушылар болмаған. Бұл оқиға электромобиль өндірушісі Остинде өздерінің автономды таксилерін сынай бастағаннан кейін бір апта өткен соң болды. Wedbush агенттігі Tesla-ның автономды басқару технологиясын компания капитализациясын екі есеге дейін, яғни 2 трлн долларға жеткізетін фактор ретінде атаған. Дегенмен мұндай оптимизммен бәрі келісе бермейді.
Егжей-тегжейі
«Tesla Model Y автокөлігінің толықтай автономды алғашқы жеткізілімі – зауыттан сатып алушының үйіне дейін, оның ішінде магистралдармен өту – жоспардан бір күн бұрын сәтті аяқталды!», – деп жазды Tesla бас директоры Илон Маск X әлеуметтік желісінде.
Масктың айтуынша, Остин арқылы жүріп өткен электромобильді жүргізуші сынақшылар да, қашықтан басқару операторлары да басқармаған. Барлығын көлік өзі атқарған. Ол сурет немесе видео жарияламады, бірақ жақында бейнежазба жарияланатынын уәде етті. Жеткізу 28 маусымға жоспарланған болатын. Бұл Масктың 54 жасқа толған күні, деп жазды Bloomberg.
Адам қатысуынсыз жеткізу сәуірде алғаш көрсетілген технологияның жалғасы. Ол кезде Tesla көліктерінің Техас зауытынан логистикалық алаңдарға өздігінен шыққаны көрсетілген. Агенттіктің жазуынша, мұндай автономды жеткізілімдер компания бизнесінің тұрақты бөлігіне айнала ма – ол әзірге белгісіз. Tesla Bloomberg-тің пікір беру өтінішіне жауап бермеді.
Контекст
Бұл – Остинде жүргізілген алғашқы автономды Tesla емес. Бір апта бұрын компания қала жағдайында автономды такси сынақтарын бастаған. Алайда бұл көліктерді қазіргі кезде жолаушы орындығында отырған жүргізуші бақылайды. Сарапшылар мен блогерлер жариялаған видеоларға қарағанда, алғашқы күннен бастап роботаксилер жол ережелерін бұза бастаған. Мысалы, бір видеода көлік қарсы бағытқа шығып кетіп, екі тұтас сызықты кесіп өткені байқалады.
Бұл екі бастаманы Илон Маск маусым айының басында жариялаған болатын. Ол болашақта Tesla жолға миллиондаған роботакси шығаруды жоспарлап отырғанын айтқан. Bloomberg бұл жеткізуді Tesla-ның жасанды интеллект пен робототехникаға негізделген болашаққа жасаған үлкен қадамы ретінде бағалайды. Бұл – компания үшін АҚШ, Еуропа және Қытайдағы сатылымның төмендеуі аясында аса маңызды.
Сарапшылар не дейді?
Wedbush компаниясының сарапшысы Дэн Айвз роботакси іске қосылмай тұрып-ақ бұл технология Tesla-ның нарықтық құнын 2 трлн долларға жеткізетінін болжаған. Бұл – қазіргі бағасынан екі есе артық. «Бұл автономды кезеңді Маск пен Tesla тарихындағы ең маңызды сәттердің бірі деп есептейміз», – деп жазды Айвз 21 маусымдағы жазбасында.
Benchmark компаниясының сарапшысы Микки Легг роботакси арқасында Tesla акциялары 45 пайызға дейін өседі деп болжаған. Оның пікірінше, Tesla-ның бұл қызметі баға мен сапа жағынан Google-дің Waymo көліктерінен асып түседі. Себебі Waymo көлігінің бағасы алты таңбалы саннан асады. Бұл Model Y шығарудан әлдеқайда қымбат.
JPMorgan сарапшысы Райан Бринкман 9 маусымда Tesla акциясынан пайда алып, қаржыны Aptiv және BorgWarner секілді автоқұрамдас бөлшек өндірушілердің акциясына салуға кеңес берген. Оның ойынша, бұл компаниялардың өсу әлеуеті жоғары. Ал Wells Fargo сарапшысы Колин Ланган Техастағы роботакси жобасы секілді бастамалар Tesla-ның әлсіз сатылымын өтеуге жеткіліксіз деп есептейді. Ол компания акциясының құны 120 долларға дейін төмендеуі мүмкін деп болжаған.
