ЖИ бумынан кім ұтады: TipRanks Уолл-стриттің 3 фавориті
ЖИ бумынан пайда табу үшін таңдаулы акциялар
Жетекші аналитиктер жасанды интеллект бумынан табыс тапқысы келетін инвесторларға үш компанияның акциясына назар аударуды ұсынады: Broadcom, Zscaler және Oracle. Уолл-стрит болжамдарының дәлдігін бағалайтын TipRanks платформасының деректеріне сүйенсек, бұл компаниялар ЖИ-ге байланысты ұзақ мерзімді өсімнен пайда көруге жақсы мүмкіндікке ие. Олар бизнес-модельдерінің тұрақтылығын дәлелдеп, жасанды интеллектке деген сұраныстың артуынан қуатты серпін алды. Соңғы есепті маусым бұл құбылыс уақытша емес, тұрақты табыс көздерінің қалыптасуы екенін көрсетті деп жазады CNBC.
Broadcom
Broadcom 2025 қаржы жылының үшінші тоқсанында мықты нәтижелер көрсетті және 2026 жылға оптимистік болжам жасады. Бұл сенімге ЖИ шешімдеріне сұраныстың өсуі және 2023 жылы сатып алынған VMware компаниясының жетістіктері ықпал етті.
Broadcom ЖИ-ден түскен табыстың 18%-ға артқанын тіркеді және ағымдағы тоқсанда тағы 19%-ға, яғни $6,2 млрд-қа дейін өседі деп күтуде. 2025 жылдың қорытындысы бойынша ЖИ кірісі $20 млрд-қа жетуі ықтимал.
Есеп жарияланғаннан кейін бірқатар сарапшы акция бағаларының мақсатты деңгейін көтерді. JPMorgan-ның Харлан Суры оларды сатып алу ұсынысын растады және таргетті $325-тен $400-ге дейін өсірді. Ол Broadcom-ның бірнеше бағытта бір мезгілде ұтып жатқанын атап өтті: ЖИ чиптеріне сұраныс артып жатыр, дәстүрлі жартылай өткізгіш сегменті тұрақтанып келеді, ал VMware қызметтері оң қарқын көрсетуде. Сарапшының айтуынша, компанияның жаңа ірі тапсырыс берушісі OpenAI болуы мүмкін, ал 2026 жылға қарай ЖИ кірісі $45 млрд-қа дейін жетуі ықтимал.
Zscaler
Киберқауіпсіздік қызметтерін ұсынатын Zscaler де 2025 қаржы жылының төртінші тоқсанында күткеннен жоғары нәтижелер көрсетті. «Нөлдік сенім» (Zero Trust) моделіндегі бұлттық қызметтер мен ЖИ қауіпсіздігіне сұраныс компанияға айтарлықтай серпін берді.
Stifel сарапшысы Адам Борг компанияның келісімшарттық міндеттемелер көлемін (RPO) жылдық есепте 31%-ға өсіргенін атап өтті. Бұл көрсеткіш төртінші тоқсан қатарынан артып отыр. Оның пікірінше, Zscaler стратегиясын табысты іске асырып, портфелін кеңейтуде.
Жаңа Z-Flex бағдарламасы клиенттерге қосымша өнімдер мен қызметтерді кезең-кезеңімен қосуға мүмкіндік береді. Сарапшылар мұндай бастамалар ЖИ шешімдерімен бірге компанияның жоғары өсімін сақтап, маржаны арттыруға жол ашады деп санайды.
Аналитик акцияларды сатып алу ұсынымын растады және таргетті $295-тен $330-ға дейін көтерді. TipRanks болса, бейтарап баға беріп, таргетті $298 деп көрсетті.
Oracle
TipRanks-тің үшінші фавориті — Oracle. Компанияның бірінші тоқсандағы нәтижелері әлсіз болғанымен, бұлттық бизнеске жасалған қуатты болжамдар акциялардың күрт өсуіне себеп болды.
Негізгі сенсация — келісімшарттық табыстардың (RPO) 359%-ға артып, $455 млрд-қа жетуі. Jefferies сарапшысы Брент Тилл бұл көрсеткішті «тоқсан жұлдызы» деп атады, өйткені ол 2026 қаржы жылына арналған болжамды бес есеге жуық асырды. Инвесторлар компания ЖИ айналасындағы ажиотажды нақты табысқа айналдыра алады деп сенім білдіруде.
Oracle бұлттық инфрақұрылымды дамытуды да басты бағыт етіп отыр. Оның көлемі 2026 жылға қарай 77%-ға өсіп, 2030 жылы $144 млрд-қа жетуі мүмкін. Компания мультиоблачты шешімдерді дамытып, дата-орталықтар санын 71-ге жеткізуді жоспарлап отыр.
Тилл акцияларды сатып алу ұсынымын растады және таргетті $270-тен $360-қа көтерді. TipRanks бұл қағаздарды «нарықтан озық» деп бағалап, таргетті $264 деп көрсетті.
