ЖИ, мыс, қаржы: Citi мереке алдында инвестицияға лайық активтерді ұсынды
Citi Research-тің жаһандық макроэкономикалық стратегия тобы мереке кезеңі басталар алдында қандай активтерді сатып алуға болатыны туралы идеяларын бөлісті. Citi есебін MarketWatch жариялады.
ЖИ және Nasdaq-100 бағыты
Citi-дің жаһандық макростратегия және активтерді бөлу бағытының жетекшісі Дирк Виллер және оның командасы негізгі идеялардың бірі ретінде Nasdaq-100 индексіндегі ЖИ-мен байланысты акциялардың өсімі жалғасады деген болжамды атады. Citi инвесторларға 2026 жылғы желтоқсанда орындалатын индекс бойынша колл-опциондар алуды ұсынады. Мұндай опцион белгіленген бағамен, яғни қазіргі бағадан жоғары деңгейде сатып алу құқығын береді.
Citi пікірінше, компаниялардың капиталдық инвестициясы өсіп тұрған кезде және қаржы жүйесінде өтімділік жоғары болған жағдайда, инвесторларда ЖИ айналасындағы «көпіршіктен» табыс табуға әлі де уақыт бар.
«Секторлардың үлкен ауысуы көпіршік шыңына жеткеннен кейін болады, оған дейін емес. Келесі жылы әртараптандыру пайдалы болып қала береді. Бірақ технология секторы ұзақ мерзімді позициялар қатарында болуы керек», — дейді банк сарапшылары.
Қаржы секторы
Виллер мен оның командасы 2026 жылы технологиямен қатар циклдік секторлар да, соның ішінде қаржы секторы да жақсы жүретінін айтады. Citi мұны «сектор ауысуы» деп емес, «өсу нарығының» кеңеюі деп түсіндіреді. Олардың айтуынша, 2026 жылы бұл өсу нарығы төртінші жылға қадам басады.
Банк қаржы секторы қорғаныш санатындағы күнделікті тұтыну тауарларын өндірушілер секторынан жоғары табыс береді деп күтеді.
«Циклдік компаниялар қайта инфляцияланатын экономикада жақсы нәтиже көрсете алады», — деді сарапшылар. Мұнда олар инфляция өсіп, сонымен бірге экономикалық өсім де жылдамдайтын жағдайды меңзеп отыр.
Мыс
Citi сарапшылары 2026 жылы жаһандық ЖІӨ өсімі жеделдесе, соған табыс табудың бір жолы мыс бойынша ұзақ позиция ұстау дейді. Олардың сөзінше, бұл «кез келген ауа райына жарайтын» идея. Ол АҚШ-тағы жағдайға онша тәуелді емес. Инвесторлар мыс фьючерстерін, колл-опциондарды немесе осы металды қадағалайтын қорларды сатып ала алады деп жазады олар.
Неден аулақ болу керек?
Инвестбанк ескертеді: тарихи түрде АҚШ-та аралық сайлау жылдары акциялар да, облигациялар да әлсіз динамика көрсетеді. Бұл әсіресе үшінші тоқсанда байқалады. Әсіресе биліктегі партия бақылауды сақтап қалса, әсері күштірек болуы мүмкін.
Сондай-ақ инвестбанк ЖИ акциялары өседі деп ставка жасап, сонымен қатар ЖИ компаниялары шығарған облигацияларға қарсы қысқа позиция ұстауды ұсынды.
Негізгі мөлшерлеме не болады?
Citi сарапшылары инвесторларға ұсыныспен қатар, АҚШ Федералды резерв жүйесінің алдағы қадамдарына болжам да айтты. Олардың ойынша, президент Трамп Джером Пауэллдің орнына таңдайтын келесі ФРЖ басшысы орталық банктің тәуелсіздігін қауіпке тігеді деу екіталай.
Дегенмен реттеуші мөлшерлемені төмендетуді жалғастырады деген болжам бар. Бұл 2026 жылы экономиканы «қыздырып», инфляциялық қысымды күшейтуі мүмкін. Соның салдарынан инвесторлар АҚШ-тың ұзақ мерзімді облигацияларын сатып алғанда тәуекел үшін жоғарырақ үстеме табыс талап етуі ықтимал. Бұл облигация бағасына қысым түсіреді, деп ескертті Citi. Ал баға мен кірістілік кері байланысты: қағаз бағасы төмендеген сайын, кіріс өседі.
