UnitedHealth акциялары үшін соңғы 27 жылдағы ең нашар күн болды
АҚШ-тағы ең ірі медициналық сақтандыру компанияларының бірі UnitedHealth 17 сәуірде 22,4%-ға арзандап, $454,1 деңгейіне түсті — бұл 1998 жылдың тамызынан бергі ең нашар күн, деп жазады Bloomberg. Нарық компанияның жылдық пайда болжамын төмендетуінен кейін дүрліккендей әсер етті. Егер бұл болжам расталса, UnitedHealth 17 жылдан бері алғаш рет жылдық түзетілген пайдасын азайтады.
Толығырақ
Компания бір күнде $115 млрд нарықтық құнын жоғалтты, деп хабарлайды агенттік. Жыл басынан бері UnitedHealth акциялары 10%-дан астамға төмендеген. Компания 2025 жылға арналған түзетілген табыс болжамын $29,5–30-дан $26–26,5-ке дейін қысқартты. Сарапшылардың орташа консенсус-болжамы — $29,73 (LSEG дерегі, Reuters). Бұл болжам жүзеге асса, компания 2008 жылғы қаржы дағдарысынан бері алғаш рет пайдасының төмендеуіне ұшырайды.
Негізгі себеп — Medicare Advantage бағытының шығындары. Бұл — АҚШ мемлекеттік бағдарламасы арқылы қаржыландырылатын қарттарға арналған жеке сақтандыру жүйесі. 2025 жылдың бірінші тоқсанында осы бағдарлама бойынша пациенттер күтілгеннен екі есе жиі медициналық көмекке жүгінген.
Ал Medicare Advantage бағдарламасында қаржыландыру мөлшері тұрақты, сондықтан өтініштердің көбеюі компания шығындарының жоспардан тыс өсуіне алып келді.
Сонымен қатар, Optum деп аталатын медициналық қызмет көрсету бөліміндегі күтпеген өзгерістер 2025 жылы мемлекеттен алынуы тиіс төлемдерге кері әсер еткен. Яғни, компания бір жағынан сақтандырушы ретінде шығындармен, екінші жағынан қызмет жеткізуші ретінде жеткіліксіз өтемақымен қысымға ұшырап отыр, деп түсіндіреді Quartz.
UnitedHealthcare сақтандыру бөлімінің басшысы Тим Ноэль: «Біз мұндай жағдайға бұрын-соңды тап болмаған едік», дейді.
UnitedHealth: нәтижелер күткеннен төмен, басшылық оларды «қабылдауға болмайды» деп атады
2025 жылдың бірінші тоқсанында UnitedHealth компаниясы акцияға шаққандағы түзетілген табысты $7,2 деп жариялады — бұл Уолл-стриттің $7,29 күткенінен сәл төмен (Reuters дерегі).
Түсім $109,6 млрд болды — бұл өткен жылдың сәйкес кезеңінен $9,8 млрд-қа артық, бірақ аналитиктердің $111,6 млрд болжамынан $2 млрд-қа төмен, деп жазады Barron’s.
Компанияның бас директоры Эндрю Уитти жағдайды ашық мойындады: «Біз өз күткенімізді ақтамадық. Бірақ бұл мәселелерді белсенді түрде шешіп жатырмыз», — деді ол. Сарапшылармен өткен конференцияда ол: «Компанияның нәтижелері, ашығын айтқанда, біз үшін әдеттен тыс әрі қабылдауға келмейтін деңгейде болды», — деп қосты.
Сарапшылар не дейді
Kevin Gade (Bahl & Gaynor қоры, UnitedHealth акцияларының иесі): «Мұндай күрт төмендеуді және болжамның қайта қаралуын ешкім күтпеген еді», — деп атап өтті (Reuters).
Mizuho сарапшысы Энн Хайнс бұл жағдайды UnitedHealth ішкі мәселелерімен байланыстырды және бұл барлық сақтандыру секторы дағдарысқа ұшырады дегенді білдірмейтінін айтты.
Оның айтуынша өткен аптада UnitedHealth бәсекелесі CVS өз болжамын растады, ал Elevance Health те алдағы аптада болжамын сақтайтынын мәлімдеді.
Яғни, қазіргі проблемалар UnitedHealth-тің жеке бағытына тән тәуекелдерден туындап отыр, ал сектордың жалпы жағдайы тұрақты болып қала беруде.
