АҚШ нарығын 2026 жылы қандай тәуекелдер күтіп тұр
S&P 500 индексі жыл басынан бері 17,9%-ға өсті. Бұл соңғы 68 жылдағы тарихи орташа көрсеткіш — 10,6%-дан едәуір жоғары.
Bloomberg консенсусына сүйенсек, келесі жылы S&P 500-дің орташа мәні 7 464 тармақ болады. Бұл 24 желтоқсандағы жабылу бағасынан 7,7% жоғары. 28 аналитиктің тек екеуі ғана нарықтың төмендеуін күтеді.
Жасанды интеллекттің арқасында технологиялық компаниялардың бумы нарық өсімінің үшінші жыл қатарынан негізгі драйвері болып отыр. Бірақ жыл соңына қарай ЖИ нарығында көпіршік пайда болуы мүмкін деген ескертулер жиілей түсті. Мысалы, желтоқсанның басында IBM басшысы Арвинд Кришна жасанды интеллект саласындағы жаһандық міндеттемелер көлемі шамамен $8 трлн екенін айтты. «Менің ойымша, бұдан пайда табу мүмкін емес, өйткені $8 трлн көлеміндегі капитал салымдары тек пайыздарын төлеу үшін ғана шамамен $800 млрд пайда талап етеді», деп атап өтті Арвинд Кришна, IBM бас директоры.
Негативті көңіл-күйді 2008 жылғы ипотекалық дағдарысты алдын ала болжаған ең танымал инвесторлардың бірі Майкл Бьюрри де күшейтіп отыр. Ол қазіргі нарықты 2000 жылғы дотком көпіршігімен салыстырады.
ЖИ келесі жылы да нарықтың драйвері болып қала ма, әлде оның құлдырауына себеп бола ма?
Барлығы көпіршік туралы айтады: мұндай қауіп бар ма?
Келесі жылы инвесторлар үшін негізгі тәуекелдердің бірі ретінде көпіршікті ашық атап жүргендердің қатарында — Bank of America бар.
«Біз құбылмалылығы жоғары кезеңнің басталуын және «көпіршіктердің» қалыптасуын болжап отырмыз. Бұл жағдайда өсулер мен құлдыраулар циклдері басым болады»,
— BofA аналитиктері, 2026 жылға болжамында
BofA-ның жазуынша, қазіргі көпіршіктің дамуын үкіметтердің өзі қолдап отыр, өйткені ЖИ геосаяси үстемдік үшін аса маңызды факторға айналды. Дегенмен нарық әлі көпіршіктің ерте сатысында: ЖИ-мен байланысты негізгі компаниялардың бағалануы әзірге шарықтау шегінде емес, әдетте көпіршікті үлкейтетін қарызды пайдалану кең таралмаған, ал ФРЖ ақша-несие саясатын қатайтпай, керісінше жұмсартып отыр.
BofA-ның өз индикаторы нарықта тек қызып кету белгілерін көрсетеді: биыл шілдеде ол 0,6–0,7 деңгейіне жетіп, қарашада 0,2–0,3-ке дейін төмендеді. Ал 0,8-ден жоғары деңгей әдетте көпіршіктерге тән. Бұл банктің қараша айындағы материалдарында айтылған. Сонымен қатар BofA-ның 2026 жылға арналған S&P 500 бойынша сценарийлері өте кең: рецессия жағдайында индекс 5 500 пунктке дейін құлдырауы мүмкін, ал компаниялардың бір акцияға шаққандағы пайдасы (EPS) қатты өссе, 8 500 тармаққа дейін көтерілуі ықтимал.
UBS көпіршіктің пайда болу ықтималдығын 35% деп бағалайды. Банк пікірінше, шектен тыс жоғары бағаланған компаниялар саны аз, ал акциялардың құбылмалылығы орташа деңгейде.
Оптимистер қатарына Morgan Stanley мен JPMorgan-ды жатқызуға болады. Morgan Stanley ЖИ-көпіршігі жоқ деп есептейді: қазіргі компаниялар 1999–2000 жылдармен салыстырғанда әлдеқайда көп табыс тауып отыр, олардың ақша ағыны бойынша табыстылығы шамамен үш есе жоғары, S&P 500 үшін түзетілген болжамдық P/E мультипликаторы шамамен үштен бірге төмен, ал табысты әрі қаржылық тұрғыдан тұрақты компаниялардың үлесі дотком кезеңімен салыстырғанда айтарлықтай жоғары. Сонымен қатар ИИ қазірдің өзінде пайда өсіміне елеулі үлес қосып жатыр.
JPMorgan аналитиктері нарықтағы рекордтық шоғырлану тәуекелін атап өтеді: ЖИ саласындағы ең ірі 30 компания қазірдің өзінде S&P 500 капитализациясының 44%-ын құрайды. Бірақ соған қарамастан, олар бизнес-циклдің аяқталу белгілерін көріп отырған жоқ. Банктің 2026 жылдың соңына арналған S&P 500 бойынша мақсатты деңгейі — 7 500 тармақ. JPMorgan индекс құрамындағы компаниялардың пайдасы алдағы екі жылда 13–15% өседі деп күтеді (2026 және 2027 жылдарға EPS болжамы тиісінше $315 және $355). Негізгі үлесті ИИ саласындағы топ-30 компания береді, бірақ қалған компаниялар да 9–10% деңгейінде тұрақты пайда өсімін көрсетеді. Егер ФРЖ мөлшерлемені агрессивтірек төмендетсе, индекс 8 000 тармақтан да жоғары көтерілуі мүмкін.
Қауіпті қай жақтан күту керек?
BofA атап өткендей, нарық шектеулі факторларға тым тәуелді болып барады, соның ішінде ЖИ-алыптарының ықпалының күшеюіне байланысты. Бұдан бөлек, нарықтағы өтімділік қазір жоғары болғанымен, ол төмендеуі мүмкін: компаниялар buyback бағдарламаларын қысқартады, капиталық шығындарды арттырады, ал несие беру шарттары қатаюы ықтимал.
BofA басқа тәуекелдер ретінде K-тәрізді сценариймен дамып келе жатқан АҚШ экономикасындағы проблемаларды атайды. Бұл жағдайда табысы жоғары топтардың жағдайы жақсара түссе, табысы төмен қабаттың ахуалы керісінше нашарлайды.
Тағы бір тәуекел — 2026 жылдың көктемінде ФРЖ басшылығының ауысуы. Мамыр айында АҚШ орталық банкінің қазіргі төрағасы Джером Пауэллдің өкілеттік мерзімі аяқталады. Банк жаңа төраға «облигациялық мстительдердің» нысанасына айналуы мүмкін екенін де жоққа шығармайды.
Сонымен қатар келесі жылы АҚШ Конгресіне аралық сайлау өтеді. Оның нәтижесінде жаңа құрам Уолл-стритке «онша достық емес» болуы мүмкін, деп жазады BofA.
Morgan Stanley де несие шарттарының қатаюы тәуекелін көреді — бұл нарықтың құбылмалығы жоғары сегменттеріне соққы болуы ықтимал. Ал ұзақ мерзімді перспективада банк үшін негізгі қауіп — run it hot сценарийі, яғни экономикалық өсімді әдейі қолдап, инфляцияны орташа деңгейде ұстап тұру. Экономиканың қызып кетуі инфляцияның жаңа толқынын туғызып, ФРЖ-ны саясатты қайтадан қатаңдатуға мәжбүр етуі мүмкін.
