Alibaba Қытайдағы BMW автокөліктеріне арналған жасанды интеллект әзірлейді

Қытайлық Alibaba Group интернет-гиганты Германияның BMW автоконцернімен Қытай нарығында жасанды интеллект (ЖИ) әзірлеу және ендіру бойынша серіктестік орнатты. Бұл – Alibaba-ның кемінде екінші ірі халықаралық серіктесі: ақпанда компания Apple-дің Қытайдағы iPhone пайдаланушыларына арналған ЖИ-платформасы ретінде дәл осы технологияны таңдағанын мәлімдеген болатын. ЖИ бағытындағы дамуға миллиардтаған инвестиция құйып жатқан Alibaba бұл өнімдерін енді табыс көзіне айналдырмақ.

Мәміле туралы

Bloomberg мәліметінше, BMW және Alibaba Қытайда шығатын көліктерге дауыспен басқарылатын ЖИ-ассистент енгізу туралы келісім жасасты. Ол маршруттарды жоспарлап, жол жағдайы мен бос орындар туралы ақпарат беріп, жақын маңдағы мейрамханаларды ұсынатын болады. Бұл функциялар 2025 жылдан бастап қолжетімді болмақ.

Аталған технологияны Alibaba қаржыландырған Banma компаниясы әзірлеген. Бұған дейін оның ЖИ-шешімдері Xpeng, Zeekr және Leapmotor секілді қытайлық автокомпаниялар көліктерінде қолданылған.

Маңызы неде

BMW-мен серіктестік — Alibaba үшін ЖИ-инвестицияларын коммерцияландыруға мүмкіндік, деп жазады Bloomberg. Компания алдағы үш жылда деректерді өңдеу орталықтары мен инфрақұрылымға 380 млрд юаньнан ($52 млрд) астам қаражат салуды жоспарлап отыр. Бұл — Қытайдағы ең ірі ЖИ-бюджеттердің бірі.

Alibaba басшысы Джо Цай АҚШ-тағы ЖИ нарығында «көпіршік» қалыптасып жатқанын айтты. Оның пікірінше, америкалық технологиялық алыптардың ЖИ-ға бағыттаған шығындары әрдайым негізделе бермейді, ал дата-орталықтар саны болашақ сұраныстан асып түсуі мүмкін.

2024 жылдың төртінші тоқсанындағы есепте Alibaba ЖИ-ға инвестициялардың арқасында табысының жылдам өскенін мәлімдеді. Ақпанда компания бас директоры Эдди Ву ЖИ дамуы — Alibaba-ның басты мақсаты екенін айтқан.

Бұл уақытта Германия автоконцерндері Қытайдағы сұраныстың төмендеуі мен жергілікті брендтердің бәсекесіне тап болып отыр. Mercedes-Benz-тің автоматтандырылған көлік жүргізу бағытындағы жетекшісі Жорж Масинг Bloomberg-ке берген сұхбатында: «Еуропада бұл ЖИ-модельдерді үйретуге қажетті инфрақұрылым мен жабдықтар жоқ», — деген пікір білдірді.

Программалық қамтамасыз ету электромобиль нарығында басты факторға айналды. Қытайда жергілікті өндірушілер, әсіресе BYD, еуропалық брендтерден озып кеткен, деп жазады агенттік.

Контекст

Ақпанда Alibaba Қытайдағы iPhone қолданушыларына арналған ЖИ шешімдерін енгізу бойынша Apple компаниясымен серіктесетінін мәлімдеді. Жаңа функциялар қазір жергілікті реттеушіге мақұлдануға жіберілген.

Бұл — Alibaba үшін маңызды келісім. Ол тұтынушылық сұраныстың төмендеуі кезінде компанияның электрондық коммерциядағы позициясын қолдауға көмектеседі. Қаңтарда Alibaba өз ЖИ-моделі Qwen 2.5 Max-тың Meta-ның Llama және DeepSeek-тің V3 үлгілерінен асып түскенін хабарлады.

Акциялар динамикасы

26 наурызда Alibaba акциялары Гонконгта 2,3%-ға қымбаттап, 130,7 гонконг долларына ($16,8) жетті. Нью-Йорк премаркетінде депозитарлық қолхаттар 0,4%-ға өсті. Жылдық есепте — 85% өсу. MarketWatch мәліметіне сүйенсек, Alibaba акцияларын бақылап отырған 57 сарапшының 53-і оларды сатып алуға кеңес береді, үшеуі — портфельде ұстауға, біреуі — сатуға.

Ал BMW акциялары Германиядағы саудада 0,6%-ға төмендеді. Бір жылда құны шамамен 24%-ға азайған. WSJ мәліметіне сәйкес, 15 сарапшы BMW-ның бағалы қағаздарын сатып алуға, 10-ы — ұстауға кеңес береді. Тек біреуі ғана сатуды ұсынады. 24 наурызда Jefferies сарапшысы Филипп Ушуа BMW акциялары үшін Buy рейтингін және 92 еуро бағасын растады — бұл қазіргі бағадан 14%-ға жоғары.