Apple-дың ЖИ-бәсекесіндегі артта қалуы енді артықшылыққа айналды
Apple ұзақ уақыт бойы Уолл-стрит тарапынан жасанды интеллектке Big Tech бәсекелестері сияқты агрессивті инвестиция салмағаны үшін сынға ұшырап келген. Алайда, енді бұл стратегия iPhone өндірушісі үшін күтпеген артықшылыққа айналды, деп жазды Bloomberg.
Егжей-тегжейлі
Инвесторлар OpenAI, Meta Platforms және Microsoft сияқты алпауыт компаниялардың жасанды интеллектіні дамытуға бағыттап жатқан орасан зор инвестицияларының қаншалықты негізді екенін жиі талқылай бастады, деп жазды Bloomberg. Мұндай үрдіс олардың акцияларындағы құбылмалылықты күшейтіп отыр. Бұған дейін ЖИ саласына салынған қаржы технологиялық компаниялар үшін негізгі өсім факторы ретінде қарастырылатын. Алайда қазір сарапшылар бұл көзқарасты қайта қарауда. Осы тұрғыда Apple компаниясы ерекше жағдайда тұр: ол жасанды интеллектті енгізудің әлеуетті бенефициары ретінде бағаланғанымен, шамадан тыс капиталдық шығындар тәуекеліне тап болмайды және едәуір көлемдегі қолма-қол қаржы қорына ие. Бұл факторлар Apple акциясын технологиялық сектор ішіндегі ықтимал «тыныш аймаққа» айналдырады, егер ЖИ-ралли баяулай бастаса, деп санайды Bloomberg.
Apple компаниясының ағымдағы қаржы жылындағы (2026 жылдың қыркүйегінде аяқталатын) капиталдық шығындары шамамен $14 млрд болады деп күтіледі. Салыстыру үшін, Microsoft өз қаржы жылында (маусымда аяқталады) $94 млрд-тан астам қаражат жұмсауды жоспарлап отыр, ал Meta — 2025 жылы $70 млрд-тан астам, бұл ретте компанияның көлемі Apple-ден екі есе кіші болса да.
Агенттіктің мәліметінше, инвесторлардың алаңдаушылығы 11 қарашадағы сауда кезінде анық байқалды: Apple акциялары сауда ашылғанда 1% қымбаттап, S&P 500 индексіндегі өсім көшбасшысына айналды, ал ЖИ-дің негізгі бенефициарлары саналатын Nvidia, Meta және Microsoft акциялары тиісінше 3,5%, 1,1% және 0,2% арзандады.
Сарапшылар пікірі
«Apple әлі де технологиялық компания болып саналады, бірақ жасанды интеллект компаниясы емес — міне, оның қорғаныс факторы да осында», — деді Bloomberg агенттігіне Zacks Investment Management инвестициялық портфолиоларын басқарушы Брайан Малберри. — «Қазір Apple-дің имиджі жағымды: оған басқа компаниялар сияқты “жаңа бағыттарға салынған капиталдан қандай қайтарым алып жатырсыздар?” деген сұраққа жауап берудің қажеті жоқ».
«“Керемет жетілік” құрамындағы барлық компаниялардың ішінде Apple жасанды интеллектке ең аз деңгейде тартылған — әрі шығындар, әрі қаржылық тәуекел тұрғысынан», — деп түсіндірді Evercore Wealth Management компаниясының инвестициялық комитетінің басшысы әрі портфолио менеджері Брайан Поллак. — «Бұл рас: Apple трендтің пайдасын көруі мүмкін, бірақ әріптестері сияқты барлық капиталын жұмсамайды».
Сарапшының айтуынша, компанияның қаржылық балансы мықты, ақша ағымы қуатты және бәсекелестері үшін елеулі кедергілері бар. «Осының бәрі Apple-ді жасанды интеллектке әлдеқайда көп қаржы құйып, соған тәуелді болып қалған басқа компаниялармен салыстырғанда қорғаныс активіне айналдырады», — деп атап өтті Поллак.
Ал First New York компаниясының портфолио менеджері әрі макротрейдері Викрам Райдың пікірінше, «Apple — бұл хедж емес, тек артта қалып келе жатқан қағаз. Портфолиоңызда альфа алу үшін бұл сіз іздеген серпін береді деп ойламаймын.».
Bank of America сарапшысы Вивек Арья 10 қарашада инвесторларға арналған жазбасында: «Жасанды интеллектке кетіп жатқан капиталдық шығындарға қатысты кең тараған күмән түсінікті, бірақ ол қарсы тренд тұрғысынан қарағанда оң фактор болуы мүмкін — бұл нарықтағы қызып кетуді және позициялардың шамадан тыс шоғырлануын болдырмайды», — деп жазды. Оның айтуынша, технологиялық акциялардың соңғы әлсіздігі негізінен шатдаун сияқты сыртқы факторлармен байланысты, ал жалпы сұраныс тұрақты болып отыр.
