Boeing 8 млрд долларлық ұшақ келісімін жасасты. Palantir-мен әріптестік орнатты
Boeing корпорациясы Өзбекстанмен 8 млрд доллардан асатын сомаға жаңа келісімге қол қойды. Компания 23 қыркүйекте Palantir-мен де келісім жасасқанын хабарлады: Palantir өзінің жасанды интеллект технологияларын Boeing-тің қорғаныс саласына енгізеді. Сауда кезінде Boeing акциялары 2%-ға өсті.
Егжей-тегжейі
Boeing пен Uzbekistan Airways арасында келісім жасалды. Әуе компаниясы 14 Boeing 787-9 Dreamliner ұшағын сатып алады, қосымша сегізіне тапсырыс беру мүмкіндігі бар. Бұл — Uzbekistan Airways тарихындағы ең ірі келісім.
АҚШ президенті Дональд Трамп бұл туралы Truth Social желісінде жазды. Ол президент Шавкат Мирзиёевті «керемет келісіммен» құттықтап, келісім 35 мыңнан астам жұмыс орнын АҚШ-та құратынын айтты.
23 қыркүйекте Boeing акциялары саудада бір сәтке 3,6%-ға дейін көтерілді, бірақ күн соңында өсім 2%-бен шектелді. Жыл басынан бері акциялар 22%-ға, соңғы 12 айда 39%-ға қымбаттады.
Акцияларға әсер еткен басқа факторлар
Boeing-ке Қытаймен жасалатын жаңа келісім ықпал етуі мүмкін. АҚШ-тың Қытайдағы елшісі Дэвид Пердью келіссөздердің соңғы кезеңде екенін айтты. Бұл Boeing үшін аса маңызды нарық. Бұған дейін Bloomberg компанияның Қытайға 500-ге жуық ұшақ жеткізуге жақын екенін жазған.
Bloomberg дерегінше, Трамп Түркия президенті Режеп Тайып Ердоғанмен де ұшақ жеткізу туралы сөйлесуі мүмкін. Түркия жүздеген Boeing ұшағы мен Lockheed Martin жойғыштарын сатып алуды жоспарлап отыр. Сонымен қатар ел 10 млрд доллардан асатын өндірісті жергіліктендіру мүмкіндігін қарастыруда.
Сол күні Boeing Palantir-мен келісім жасағанын жариялады. Palantir-дың жасанды интеллект жүйелері Boeing-тің қорғаныс және ғарыш жобаларына енгізіледі. Қаржылық шарттар ашылған жоқ.
Инвесторлар үшін мәні
2025 жылы Boeing бірнеше ірі келісімге қол жеткізді. Мәселен, Korean Air 103 ұшаққа тапсырыс берді, Qatar Airways кемінде 160 ұшаққа келісім жасады, ал Сауд Арабиясы 30 ұшақ сатып алмақ.
Қаңтар-шілде аралығында әуе компаниялары Boeing-ке шамамен 700 ұшаққа тапсырыс берген. Бұл 2024 жылдың дәл осы кезеңімен салыстырғанда үш есе көп. Бірақ компанияның орындауы тиіс тапсырыстары әлі де өте көп: 6500-ден аса. Қазіргі өндіріс қарқынымен бұл — 10 жылдан астам жұмыс.
Vertical Research сарапшысы Роб Сталлардтың болжамынша, 2025 жылы Boeing әр акцияға шаққанда 2,36 доллар шығынға батады. Бірақ 2026 жылы 2,86 доллар, ал 2027 жылы 6,2 доллар пайдаға шығады. Оның айтуынша, негізгі табыс көзі — ұшақ жеткізілімін арттыру. 2025 жылы шамамен 580, 2026 жылы 680, ал 2027 жылы 760 ұшақ жеткізіледі.
