DeepSeek OpenAI-мен бәсекелесу үшін жаңа ЖИ-модель дайындап жатыр — Bloomberg
Қытайлық стартап DeepSeek кеңейтілген ЖИ-агент функциялары бар жаңа жасанды интеллект моделін әзірлеп жатыр, деп хабарлайды Bloomberg дереккөздері. Бұл компанияға OpenAI секілді америкалық ойыншылармен жаңа технологиялық прогресс шебінде бәсекелесуге мүмкіндік береді, деп атап өтті Bloomberg. DeepSeek-тің R1 ЖИ-моделі биылғы жылдың басында шыққанда, америкалық ЖИ-компаниялардың котировкасын құлдыратты.
Егжей-тегжейлі
DeepSeek қолданушыдан тек минималды нұсқаулар алып, көпқадамды күрделі тапсырманы орындай алатын жаңа модельімен жұмыс істеп жатыр, деп хабарлайды Bloomberg дереккөздері. Олардың айтуынша, жүйе өз әрекетінен үйреніп, уақыт өте келе тиімдірек болуға тиіс.
Осылайша DeepSeek «нағыз» ЖИ-агенттерді жасауға бағытталған жаһандық трендке қосылып отыр. Бұл жасанды интеллект эволюциясының келесі кезеңі ретінде жиі аталады, деп жазады агенттік. Компания негізін қалаушы Лян Вэньфэн жаңа өнімді төртінші тоқсанда таныстыруды көздеп отыр. Нарық компаниядан қаңтарда әлемдік технология саласын дүр сілкіндірген R1 моделінің мұрагерін күтіп отыр, деп түсіндіреді Bloomberg.
Адам ойлау процесін имитациялайтын R1 платформасы бар болғаны бірнеше миллион долларға жасалған деген дерек бар, бірақ соған қарамастан ол OpenAI шешімдерімен тең дәрежеде бәсекелесіп, кейбір көрсеткіштер бойынша олардан асып түсті. Қаңтарда бұл жағдай инвесторларды ЖИ-ға құйылып жатқан миллиардтаған инвестициялардың орындығына күмәндандырып, Nvidia қоса алғанда көптеген ЖИ-компаниялардың акцияларын жаппай сатуға итермеледі.
Жаңа агенттік ЖИ әзірлеу Лянның аса бәсекелі салада көшбасшылықты сақтап қалуға деген ұмтылысын көрсетеді, бірақ әзірге оның R1 табысын қайталай алатыны белгісіз, деп жазады Bloomberg.
R1 шыққаннан кейін стартап тек шағын жаңартулар ғана ұсынды, ал бәсекелестер жаңа релиздерді бірінен соң бірін шығарып отырды. Қытайлық БАҚ R2 моделінің кешігуін Лянның оны мінсіз етуге ұмтылуымен түсіндірді, сонымен қатар оның High-Flyer Asset Management инвесткомпаниясын басқаруымен айналысып жүргенін де айтты. Кейбір бұқаралық ақпарат құралдары R2-нің оқыту немесе әзірлеу кезеңдерінде техникалық ақаулар болғанын да болжады.
Bloomberg сауалына DeepSeek пікір білдірмеді.
Контекст
DeepSeek-тің агенттікке басымдық беретін жаңа модель шығару жоспары технологиялық саладағы ауқымды өзгерісті көрсетеді, деп түсіндіреді Bloomberg. Соңғы айларда OpenAI, Anthropic және Microsoft жеке әрі жұмыс тапсырмасын жеңілдетуге арналған өз ЖИ-агент нұсқаларын таныстырды. Дәстүрлі чат-боттар бірнеше қысқа жауаппен шектелсе, жаңа буын жүйелері анағұрлым кешенді міндеттерді шешуге арналған — демалысты ұйымдастырудан бастап бағдарламалау кодын жазу және түзетуге дейін. Goldman Sachs жақында жариялаған аналитикалық есепте ЖИ-агенттер арқылы іскерлік өнімділікті арттыру генеративті ЖИ дамуының келесі үлкен қадамы деп аталды.
DeepSeek-тің мақсаты, бүкіл саланыкі сияқты, барған сайын автономды ЖИ-жүйелерін құру. Олар нақты өмірде күрделі әрекеттерді адамның аз қатысуымен, яғни минималды бақылаумен бастай алып, жүзеге асыруға тиіс. Алайда іс жүзінде мұндай агенттер әлі де адам тарапынан айтарлықтай бақылауды талап етеді, деп жазады Bloomberg.
