Eli Lilly арықтауға арналған таблетка сынағында сәтсіздікке ұшырады
Америкалық фармацевтикалық алпауыт Eli Lilly семіздікке қарсы таблетка түрінде шығарылуы жоспарланған орфорглипрон (orforglipron) препаратының клиникалық сынақ нәтижелерінің көңіл көншітпейтінін хабарлады. Бұл дәрі Ozempic сияқты инъекциялық дәрілерден ерекшеленіп, ішуге арналған түрі болуы тиіс еді. Осы жаңалықтан кейін компания акциялары 15%-ға құлдырады.
Eli Lilly-дің мықты тоқсандық есебі мен 2025 жылға арналған кіріс пен пайда бойынша болжамның жоғарылауы да нарықты тыныштандыра алмады.
Оның негізгі бәсекелесі Novo Nordisk акциялары керісінше шарықтады. Инвесторлар Lilly тарапынан бәсекелестік қысымның әлсірегенін байқап, бұл Novo компаниясының арықтауға арналған өсіп келе жатқан дәрі-дәрмек нарығындағы орнын нығайтты. Бұл нарықтың көлемі 2030 жылға қарай $150 млрд-қа жетуі мүмкін.
Егжей-тегжейлі
Eli Lilly-дің хабарлауынша орфорглипрон клиникалық сынақтың соңғы кезеңінде пациенттерге 72 аптада дене салмағының 12,4%-ын жоғалтуға көмектесті. Reuters агенттігінің хабарлауынша сарапшылар бұл көрсеткіш кемінде 68 аптада 14,9% болуы керек деп күткен, яғни бұл препарат дат компаниясы Novo Nordisk-тің инъекциялық Wegovy препаратына қарағанда тиімдірек болуы тиіс еді. Novo сондай-ақ Ozempic-ті де өндіреді.
Сынаққа семіздігі және соған байланысты аурулары бар (бірақ диабеті жоқ) 3000-нан астам ересек адам қатысты. Ең жоғары доза (36 мг) қабылдағандардың арасында жанама әсерлер асқазан-ішек жолдарына байланысты болды. 33,7% пациентте жүрек айнуы, 24% пациентте құсу байқалды. Жанама әсерлерге байланысты қатысушылардың 10%-дан астамы зерттеуден ерте шығып кетті, бірақ бауырға қатысты күрделі мәселелер тіркелген жоқ.
Lilly толық деректерді келесі айда Еуропадағы ірі диабет форумында ұсынбақ, ал препаратты мақұлдауға өтінімді осы жылдың соңына дейін беруді жоспарлап отыр.
Компанияның бас директоры Дэвид Рикс CNBC арнасына берген сұхбатында бұл нәтижелер «Уолл-стрит күткеннен бір-екі тармақ төмен болғанына қарамастан», компания көңілі қалмағанын айтты.
Акциялар қалай өзгерді
7 тамыздағы сауда сессиясында Eli Lilly акциялары бірден 15%-ға төмендеп, $633,2 деңгейіне түсті. Бұл — 2024 жылдың қаңтарынан бергі ең төменгі баға. Осылайша, компанияның нарықтық құны биыл 17%-дан астам төмендеді.
Керісінше, Novo Nordisk акциялары Копенгагендегі сауда сессиясында 6,7%-ға өсті. Сауда кезінде олар 14%-ға дейін қымбаттап, сәуірден бергі ең жоғары күндізгі өсімді көрсетті, деп хабарлады Bloomberg. Дегенмен, жыл басынан бері Novo-ның нарықтық құны 50%-дан астам қысқарған.
Бұл нені білдіреді
Bloomberg-тің мәліметінше Eli Lilly арықтауға арналған таблеткасына қатысты көңіл көншітпейтін деректер инвесторлардың Novo-ға сенімін арттырды. Barclays-тің талдаушысы Эмили Филд Reuters агенттігіне Eli Lilly зерттеуінен үлкен үміт болғанын айтты — жаңа дәрі Wegovy-ден тиімдірек болады деп күтілді.
«Алайда ол Wegovy-ден нашар болып шықты — бұл шок», — деді Филд.
Eli Lilly және Novo акцияларына иелік ететін Маркус Маннс бұл нәтижені «Novo үшін ең үздік сценарий» деп атады.
«Lilly тарапынан бәсекелестік қауіп күткеннен әлдеқайда әлсіз болып шықты», — деп атап өтті ол (Reuters дерегі бойынша).
Eli Lilly мен Novo Nordisk — арықтауға арналған дәрі-дәрмек нарығында жетекшілікке таласып жатқан басты ойыншылар. Сарапшылардың айтуынша бұл нарық 2030 жылға қарай $150 млрд-қа жетуі мүмкін. Қазіргі уақытта семіздікке қарсы барлық танымал дәрілер тек инъекция түрінде қолжетімді.
CNBC атап өткендей, таблетка түріндегі өнімнің шығуы нарықты түбегейлі өзгертуі мүмкін, өйткені оларды өндіру де, пайдалану да оңай. Бұл миллиондаған тұтынушыға ем алуға жол ашар еді. Қазір арықтауға арналған инъекциялық препараттарды шамамен 8 млн адам қолданады. Бірақ Lilly-дің жүрек-метаболикалық бөлімінің жетекшісі Кен Кастердің айтуынша әлеуетті пайдасы бар адамдар саны 170 млн-ға дейін жетуі мүмкін.
Бұған дейін Lilly бәсекелестен озық тұр деп есептеліп келді. Novo бірнеше сәтсіздікке ұшырап, оның ішінде бас директордың ауысуы мен 2025 жылға арналған болжамның екі мәрте төмендеуі болды.
Novo АҚШ-та Wegovy таблетка түрінің мақұлдауына өтініш бергенімен, оны өндіру қиынырақ және пайдалануына шектеулер болуы мүмкін — мысалы, тамақ пен су қабылдау уақытына қатысты, деп толықтырды Bloomberg.
Инвестор үшін тағы не маңызды
Клиникалық сынақ нәтижелері инвесторларды қапаландырып үлгергенімен, Eli Lilly-дің 2025 жылдың екінші тоқсанындағы қаржылық есебі жақсы болды.
CNBC-дің хабарлауынша үлкен сұранысқа ие диабет және семіздікке қарсы дәрілердің арқасында компания табысы сарапшылар күткеннен жоғары болды және 2025 жылға болжамын арттырды.
Бір акцияға шаққандағы түзетілген пайда — $6,31, сарапшылар күткен — $5,57.
Жылдық табыс — $15,56 млрд, бұл өткен жылмен салыстырғанда 38%-ға көп, ал Уолл-стриттің болжамы $14,71 млрд еді.
Mounjaro атты диабетке қарсы дәрінің тоқсандық табысы — $5,2 млрд, бұл былтырғыға қарағанда 68%-ға көп.
Zepbound (семіздікке қарсы) препараты — $3,38 млрд, былтырғы сәйкес кезеңнен 172%-ға артық. CNBC және StreetAccount деректеріне сәйкес, сарапшылар бұл көрсеткіштер тиісінше $4,49 млрд және $3,06 млрд болады деп болжаған.
Компания жылдық табыс болжамын $60–62 млрд аралығына дейін көтерді (бұрынғысы — $58–61 млрд). 2025 жылға арналған түзетілген пайда болжамы $21,75–23 деңгейіне көтерілді (бұрын — $20,78–22,28). Компания бұл болжам 7 тамыздағы Дональд Трамп енгізген кедендік алымдарды есепке алатынын, бірақ жоспарланған жаңа фармимпорт алымдары ескерілмегенін нақтылады.
«Мен компанияның құндылығына сенемін. Инвесторлар өздері шешім қабылдайды, — деді Eli Lilly бас директоры Дэвид Рикс CNBC эфирінде. — Бірақ Lilly серпін алып келеді: нәтижелер үміттен жоғары, болжам көтерілді, алда күшті екінші жартыжылдық күтіп тұр. Біз болашаққа — әрі компания, әрі пациенттер үшін — оптимизммен қараймыз.»
