«Ең үздік дәуірдің табалдырығында»: Уолл-стрит неге 2026 жылы small-cap өсімін күтеді
2026 жылы шағын капитализациялы компаниялар динамикасы жағынан ірі технологиялық компанияларды да, кең нарықты көрсететін S&P 500 индексін де басып озуы мүмкін, деп санайды Уолл-стрит сарапшылары. Polar Capital America басқарушы компаниясы small-cap сегментіне инвестиция салуды тиімді деп санайды. Ал JPMorgan қазіргі жағдайды «ең үздік дәуірдің табалдырығында тұрмыз» деп бағалайды.
Егжей-тегжейлі
Bloomberg зерделеген сарапшылар пікірінше, 2026 жылы small-cap компаниялар ірі эмитенттерден жоғары нәтиже көрсетуі мүмкін.
1 қаңтардан бері S&P 500 индексі 16% өсіп, сол кезеңде 14,3% қосқан Russell 2000 (шағын компаниялар бенчмаркі) индексінен озық болды. Алайда, соңғы алты айда жағдай керісінше: Russell 2000 котировкасы 19,22% артса, S&P 500 12,94% ғана өсті.
Сарапшылардың айтуынша, пайыздық мөлшерлемелердің одан әрі төмендеуі, экономикалық өсім, сондай-ақ инвестор портфельдерінің әртараптануы және артық бағаланған мегакапитализациялы компаниялардан капиталдың ауысуы жағдайында шағын компаниялар келесі жылы да көш бастайды.
Сарапшылардың қандай аргументі бар?
— Келер 2026 жылы — шағын және орта капитализациялы компаниялар акцияларына басымдық беру керек, деп санайды JPMorgan сарапшысы Эдуардо Лекубарри. «Біз өмірімізде көрген ең үздік дәуірдің табалдырығында тұрмыз», — деп жазды ол Bloomberg келтірген инвесторлық жазбасында.
— Polar Capital America өкілі Дэн Бостон да шағын эмитенттер ірі капитализациялы ойыншылардан динамикасы бойынша озады деген пікірмен келіседі. Оның айтуынша, small-cap активтеріне инвестиция салу тиімді, өйткені инвесторлар бұл сегментті ұзақ уақыт бойы назардан тыс қалдырып келген.
— BTIG сарапшысы Джонатан Крински инвесторларға small-cap компанияларын бақылап отыруға кеңес берді, алайда ол сәл сақтық танытады. Оның пікірінше, ірі технологиялық компанияларға инвестиция салған инвесторлар бұл активтер класының шамадан тыс жоғары бағалануына қатысты алаңдаушылық салдарынан пайданы тіркеуі мүмкін. Сонымен қатар Крински 2026 жылы ФРЖ-ға анағұрлым жұмсақ ұстанымдағы жаңа төрағаның тағайындалу ықтималдығын атап өтеді. Мұндай шешім АҚШ президенті Дональд Трамптың пайыздық мөлшерлемелерді төмендету талабымен байланысты қысым аясында қабылдануы мүмкін.
— Bank of America сарапшысы Джилл Кэри Холл ФРЖ мөлшерлемелерін қайта қарау мен капитал ротациясынан бөлек, 2026 жылы small-cap компаниялардың озық өсіміне ықпал етуі мүмкін тағы екі факторды атап өтті. Олар — шағын акция сегментіндегі пайданың көптен күткен қалпына келуі және импорттық баж салығының төмендеу ықтималдығы. Оның болжамынша, шағын компаниялардың жиынтық пайдасы 17% өседі, ал ірі эмитенттерде бұл көрсеткіш 14% болады. Алайда Холл тәуекелдер бар екенін де ескертті: экономикалық құбылмалылыққа және өндірістік сектор белсенділігіне сезімтал Russell 2000 индексі қазіргі кезде АҚШ-тағы өңдеу өнеркәсібінің іскерлік белсенділік көрсеткіштері шын мәнінде бардан жақсырақ сияқты бағаланып отыр.
