Google серіктесі – mid-cap компаниясы биыл 83%-ға өсті. Motley Fool-дың айтары бар
The Motley Fool басылымының пікірінше, инвесторларға орта деңгейлі Innodata компаниясының акцияларына назар аудару керек. Бұл компания ірі технологиялық компанияларға жасанды интеллект модельдерін оқытуға көмектеседі. Жыл басынан бері оның акциялары 83%-ға өскен. Бұл – тек бастамасы деген ой жазылған мақалада.
Егжей-тегжейі
The Motley Fool шолушысы Джон Баллард инвесторларға Nasdaq биржасындағы капитализациясы $2,3 млрд болатын Innodata компаниясының акцияларын қарастыруға кеңес берді. Оның айтуынша, акция бағасы 83%-ға өскенімен, бұл өсу жалғаса береді.
Innodata жасанды интеллектті оқытуға арналған үлкен тілдік модельдер әзірлейді. Motley Fool бұл компания қазір Google мен Microsoft сияқты ірі серіктестермен жұмыс істеп жатқанын атап өтті. Тек бір клиенттің өзі Innodata-ға 2025 жылдың екінші жартысында $10 млн төлемек. Салыстыру үшін: осы клиент өткен жылы небәрі $200 мың жұмсаған. Мұндай өсім технология саласында ЖИ-ге сұраныстың күрт артқанын көрсетеді. Innodata осы процестің дәл ортасында тұр.
Баллардтың айтуынша, акциялар қымбат көрінеді – олар P/E мультипликаторы бойынша 83 деңгейінде саудалануда. Бұл көрсеткіш – компанияның нарықтық құны мен таза табысы арасындағы қатынас. Жоғары мән әдетте акцияның асыра бағаланғанын білдіреді. Дегенмен, сарапшылардың ортақ болжамына сәйкес, бұл көрсеткіш 2026 жылы 62-ге дейін төмендейді. Сондықтан Баллард Innodata-ны ұзақ мерзімді инвестициядан пайда әкелетін «ұйықтап жатқан» акция ретінде қарастырады.
Басқа сарапшылар не дейді?
Қыркүйек басында Barron’s басылымы да Innodata-ның өсу себептерін атады. «Егер сіз ЖИ революциясы әлі бастау сатысында деп ойласаңыз, Innodata – сапалы small-cap актив. Оны сатып алып, ұзақ ұстауға болады», – деп жазды басылым. Компания өкілдері ЖИ жетістіктерінің басты себебі чиптер мен алгоритмдерде емес, оны оқытуға қолданылатын мәлімет сапасында деп есептейді.
Barron’s бұл пікірді қаржылық көрсеткіштер де растайды дейді. 2-тоқсанда Innodata-ның табысы өткен жылмен салыстырғанда 79%-ға артып, $58,4 млн болды. Ал жалпы маржа 10 пайыздық тармаққа өсіп, 39%-ға жетті. 3-тоқсан нәтижелері 6 қарашада нарық жабылғаннан кейін жарияланады.
MarketWatch мәліметіне сүйенсек, Innodata акцияларын зерттейтін барлық бес аналитик те оларды сатып алуға кеңес береді (Buy және Overweight рейтингтері берілген). Орташа мақсатты баға – $83,75. Бұл қазіргі бағамен салыстырғанда 15,6% өсім әлеуеті барын көрсетеді.
