JPMorgan Uber-ге сенеді: акция бағасы рекордтық, бірақ тағы 14%-ға өсуі мүмкін
Компания негізгі көрсеткіштерін жақсарту жоспарын орындап қана қоймай, кей тұстарда асыра орындап жатыр, дейді сарапшылар.
JPMorgan Uber акцияларының мақсатты бағасын көтерді және енді олардың қазіргі бағамен салыстырғанда тағы 14%-ға өсуін күтеді. Бұл сенімділік компания басшылығымен өткен кездесуден кейін арта түсті: Uber жетекшілері қаржылық мақсаттарынан алда келе жатқанын мәлімдеді. Сонымен қатар, банк Uber-дің жүргізушісіз такси саласындағы болашағын да жоғары бағалайды. Банк шешімінен кейін Uber акциялары бүкіл сауда тарихындағы рекордты жаңартты, бірақ күнді аздаған минуспен аяқтады.
Толығырақ
JPMorgan талдаушылары Uber Technologies (такси шақыру және тамақ жеткізу сервисі) акцияларының мақсатты бағасын 92 доллардан 105 долларға дейін көтерді, деп хабарлады Investopedia. Жаңа мақсатты баға — 20 мамыр, сейсенбі күнгі жабылу бағасынан 14%-ға жоғары. Сонымен қатар, банк Uber акцияларына Overweight рейтингін сақтады. Бұл — сатып алуға кеңес берілетін деңгей.
Сейсенбідегі сауда барысында Uber акциялары бүкіл тарихындағы ең жоғары көрсеткішке — 93,6 долларға дейін көтерілді. Алайда күн соңында 0,6%-ға төмендеп, 91,87 доллар деңгейінде жабылды. Саудадан кейінгі кезеңде де акциялар шамамен 0,3 долларға арзандады.
JPMorgan неге мақсатты бағаны көтерді?
JPMorgan өзінің талдау жазбасында Uber басшылығының «оптимистік көңіл күйін» атап өтті. Investopedia-ның жазуынша, компания жетекшілері Uber алдағы үш жылға жоспарланған қаржылық мақсаттарына сенімді түрде жақындап келе жатқанын немесе тіпті озып келе жатқанын айтқан. Бұл мақсаттарға мыналар кіреді:
• жалпы брондау көлемінің (gross bookings) 15–19% шамасында өсуі,
• EBITDA (пайда + салық, пайыз, амортизацияны қоспағанда) көрсеткішінің 35–40%-ға ұлғаюы,
• және осы EBITDA-ны еркін ақша ағынына 90% деңгейінде түрлендіру.
Бұдан бөлек, JPMorgan компанияның жүргізушісіз көліктер технологиясындағы орнын нығайтып келе жатқанын айтты. Банк Uber-ді «автономды жүйе әзірлеушілер үшін барған сайын маңызды серіктеске айналып келеді» деп бағалады.
Uber-ге тағы кім сенеді?
Миллиардер Билл Экманның Pershing Square инвестициялық компаниясы 15 мамырда берген есебінде Uber-ге 2,2 миллиард доллар көлемінде инвестиция салғанын мәлімдеді. Құжатқа сәйкес, 2025 жылдың бірінші тоқсанының соңында қор портфелінде Uber-дің 30,3 млн акциясы болған. Ақпан айында Экман Uber-ді «әлемдегі ең үздік әрі тиімді басқарылатын компаниялардың бірі» деп атаған еді.
«Таңғаларлығы сол — бұл компанияның акцияларын әлі де нарықтық құнынан төмен бағада сатып алуға болады», — деп жазды сол кезде миллиардер.
Citi Research-тің Рональд Джози бастаған сарапшылары 16 мамырда Uber акцияларын сатып алуға кеңес беретін ұстанымын растады және мақсатты бағасын 102 доллар деңгейінде қалдырды. Citi мәліметінше, Uber мамыр айында ұсынған жаңа мүмкіндіктері сапарларды бұрынғыдан да қолжетімді әрі ыңғайлы ете түседі. Бұл жаңалықтардың қатарында — Ride Pass (жеңілдікпен сапарларға арналған абонементтер) және Price Lock (айына 10 бағытқа пиковый сағаттарда бағаны алдын ала белгілеу) қызметтері бар.
Uber акциялары жылдың басынан бері 52%-ға өсті. MarketWatch деректеріне сәйкес, бұл қағаздарға 53 талдаушы рейтинг берген. Олардың 44-і акцияны сатып алуға кеңес береді, қалған 9-ы — портфельде ұстауды ұсынады.
Орташа мақсатты баға — 96,9 доллар. Бұл — 20 мамырдағы жабылу бағасынан 5,5%-ға жоғары.
