Klarna акциясы листингтен бір апта өткен соң құлады: себебі не?
Klarna Group финтех акциясы ірі орналастырудан кейін бар болғаны бір апта өткенде IPO бағасынан төмен түсті. Котировкаға басқа финтех-стартаптар тарапынан күшейіп келе жатқан бәсекелестік пен пайыздық мөлшерлемелердің болашақ траекториясына қатысты белгісіздік қысым жасап отыр, деп жазады Bloomberg.
Егжей-тегжейлі
Жұма күні Нью-Йорктегі саудада «қазір ал, кейін төле» үлгісімен жұмыс істейтін шведтік Klarna цифрлық төлем сервисінің акциясы бір сәтте 7,7% құлап, $38,31-ға дейін түсті. Бұл 10 қыркүйекте өткен алғашқы жария орналастыру (IPO) бағасынан төмен. Ол кезде компания әр қағазды $40-дан орналастырған. Оның үстіне орналастыру айтарлықтай артық жазылып, бастапқы жарияланған баға диапазонының жоғары шегінен асты кетті. Нәтижесінде Klarna шамамен $1,58 млрд тартты.
Алғашқы сауда күнінің жабылу деңгейімен салыстырғанда, Klarna акциясы шамамен 15% жоғалтты, ал сол кезеңде S&P 500 индексі 1%-дан астам өсті.
Klarna-мен қатар оның бәсекелестерінің де қағазы арзандады. Мәселен, жұма күні Affirm Holdings акциясы сәйкесінше 3,6%, ал Block қағазы 3,1% төмендеді. Klarna жағдайындағыдай, төмендеу төртінші сессия қатар жалғасуда.
Қате қай жерден?
Акция төмендеуі АҚШ-тағы технологиялық акция раллиінің үзілісі аясында орын алды: бірқатар күшті макроэкономикалық есептер ФРЖ-ның мөлшерлемелерді одан әрі төмендету перспективасына күмән келтірді, деп жазады Bloomberg.
«Klarna-ны қоса алғанда, финтех-акциялар пайыздық мөлшерлемелер мен реттеушілік өзгерістер сияқты макроэкономикалық факторларға сезімтал, — деп түсіндірді Bloomberg Intelligence сарапшысы Дикша Гера. — ФРЖ 2025 жылы мөлшерлемелерді төмендету циклін бастағанымен, бәсеңдеу қарқынына қатысты кез келген ишара немесе кірістіліктің өсуі компанияларды бағалауға және нарықтық көңіл-күйге қысым жасауы мүмкін, өйткені кірістіліктің артуы қарыз алу құнын қымбаттатады».
Сонымен қатар, инвесторлар Klarna бас директоры Себастьян Семятковски қысымға тап болды деген сигналдарға да реакция білдіруі мүмкін, деп жазады Bloomberg. Мұндай қорытындыны агенттік Семятковскидің X әлеуметтік желісіндегі жазбасынан жасады. Ол 24 қыркүйекте IPO өткен күні Klarna директорлар кеңесінің төрағасы Майкл Мориц оған: «Сенің компанияң Revolut-тан он жылға қалып қойған» деген хабарлама жібергенін жазды. Ал Семятковскидің өзі бұған жай ғана күліп жауап бергенін және бұл тұрғыда екеуінің ұқсас екенін айтты: «Өзін тым жоғары қою және шұғылдықты жоғалту — шын мәнінде қауіпті нәрсе», — деп атап өтті Klarna бас директоры.
Klarna қолданушыларға ірі сатып алуларды ұзақ мерзімге бөліп төлеуге мүмкіндік беретін өнімдер желісін кеңейтуді жалғастыруда. Мұндай стратегия таза пайыздық кіріске оң әсер еткенмен, қаржылық нәтижелерді әлсіретті: компанияға ұзақ мерзімге берілген несие бойынша ықтимал шығынға анағұрлым ірі резервтер қалыптастыруға тура келіп отыр, деп жазады Bloomberg.
