Коэннің Қалқаны: Point72 негізін қалаушы портфелін қызып кетуден қалай қорғайды?
Point72 Asset Management хедж-қорының негізін қалаушы Стив Коэн қазіргі нарықтағы өсімді сенімсіз деп есептейді. Ол рецессия ықтималдығын шамамен 45% деп бағалайды және индекстердің сәуір айындағы ең төменгі көрсеткіштерге қайта оралуы мүмкін екенін айтады. «Қазір бәріміз жаңалықтарға тәуелдіміз, ал бұл — қаржы басқарудың күрделі жолы», — дейді инвестор.
Коэннің көңіл күйін Wells Fargo да қолдап отыр. Банк сарапшылары Дональд Трамптың болжанбайтын саясаты мен ықтимал экономикалық тосынсыйлар құбылмалылықтың жаңа толқындарын тудыруы мүмкін деп есептейді. «S&P 500 индексі жаңа биіктерге жеткеніне қарамастан, инвесторлар акциялардың үлесін қысқартып, күтпеген жағдайларға дайын болуы керек», — дейді Wells Fargo-ның жаһандық инвестициялық стратегия бөлімінің жетекшісі Пол Кристофер.
Осындай жағдайда Коэн қорғаныш активтеріне — тұрақты сұранысы мен болжауға болатын табысы бар компанияларға бәс тігеді. Олар экономикалық құлдырау мен саяси тұрақсыздық жағдайында да табыс әкеле алады. Төменде Point72 портфеліне енгізілген он акция берілген: олардың алтауы — фармацевтика, биотехнология және медициналық қызмет көрсету саласынан, ал төртеуі — тұтыну секторынан.
Novartis
Point72 үлесі: $90,35 млн
Қанша хедж-қор акция иеленеді: 34
2025 жылдың қыркүйегінде Швейцариялық Novartis Нью-Йорктік биотехнологиялық Tourmaline Bio компаниясын $1,4 млрд-қа ($48 бір акция үшін) сатып алатынын хабарлады. Бұл келісім Novartis-тің жүрек ауруларына қарсы шешімдер портфелін кеңейтуге бағытталған. Негізгі актив — жүйелік қабынулар мен атеросклеротикалық жүрек-қан тамырлары ауруларын емдеуге арналған препарат. Препараттың артықшылығы — бәсекелестеріне қарағанда тиімдірек және қолдану ыңғайлы: ай сайынғы орнына тоқсанына бір рет инъекция жасау жеткілікті.
Коэн бұл сценарийді қорғаныш деп есептейді: кардиологиялық дәрілерге сұраныс тұрақты әрі экономикалық циклдерге тәуелсіз, ал портфельдің кеңеюі Novartis-ке ұзақмерзімді бәсекелестік артықшылық пен тұрақты табыс әкеледі.
UnitedHealth
Point72 үлесі: $96,51 млн
Қанша хедж-қор акция иеленеді: 159
UnitedHealth Group — АҚШ-тағы ең ірі медициналық сақтандырушы және Стив Коэн оны сенімді қорғаныш активтер қатарына жатқызады. Компания сәуірден тамызға дейін акция құнының 60% төмендеуі, бас директордың күтпеген жерден жұмыстан кетуі, еншілес компания жетекшісінің өлімі және алаяқтыққа қатысты тергеулер сияқты күрделі кезеңдерді өткерді, бірақ бизнесінің тұрақтылығын дәлелдеді.
Қыркүйекте Bernstein SocGen сарапшылары UnitedHealth акцияларын «сатып алуға» кеңес беріп, нысаналы бағаны $379 деп белгіледі — бұл нарықтағы бағадан 13% жоғары. Негізгі фактор — Medicare Advantage Stars бағдарламасы бойынша 2026 жылы клиенттердің 78%-ы «4 жұлдыз және одан жоғары» санатындағы қымбатырақ жоспарлармен сақтандырылмақ. Сонымен қатар, шығындар мен басшылықтың ауысуына қарамастан, компания 2025 жылға арналған пайда болжамын сақтап қалды.
Keurig Dr Pepper
Point72 үлесі: $116,96 млн
Қанша хедж-қор акция иеленеді: 46
Keurig Dr Pepper — әлемдік нарықта сусындар, кофе және кофемашиналар өндіруші, негізгі нарығы — АҚШ. 2025 жылдың екінші тоқсанында кофелік бизнестің кірісі 0,2%-ға төмендеп, $900 млн болды — бұл бір реттік капсулаларға сұраныстың төмендеуіне байланысты.
25 тамызда KDP Нидерландтық JDE Peet’s компаниясын $18 млрд-қа сатып алатынын мәлімдеді. Бұл бірігу жаһандық кофелік индустрияда көшбасшыны қалыптастыруы тиіс. KDP синергия есебінен үш жылда $400 млн үнемдеуді күтуде және әртараптандырылған әрі тұрақты бизнес құруды мақсат етеді. Басшылық екі бағытты — өсу стратегиясы мен капиталды бөлу бойынша анық құрылымдар құруды жоспарлап отыр. Бұл қысқа және ұзақмерзімді перспективада акционерлер үшін құндылық әкелмек.
AstraZeneca
Point72 үлесі: $117,79 млн
Қанша хедж-қор акция иеленеді: 48
AstraZeneca — Коэннің фармацевтикалық портфеліндегі негізгі активтердің бірі. Компания қатерлі ісік, жүрек-қан тамырлары және сирек кездесетін ауруларға арналған инновациялық әрі тұрақты сұранысы бар дәрілерді әзірлейді және сатады.
Қыркүйек басында компания Tagrisso препараты мен химиотерапияның комбинациясы өкпе қатерлі ісігіне шалдыққан науқастардың өмірін 47,5 айға дейін ұзартқанын хабарлады — бұл аурудың кеш кезеңі үшін рекордтық көрсеткіш. Tagrisso — компанияның ең көп сатылатын препараты, 2024 жылы ол $6,6 млрд табыс әкелді. Қазіргі таңда оны басқа терапиялармен біріктіріп пайдалану тиімділігі зерттелуде.
Procter & Gamble
Point72 үлесі: $120,45 млн
Акцияларға иелік ететін хедж-қорлар саны: 88
Procter & Gamble күнделікті тұтынуға арналған тауарларды шығарады, бұл компанияның бизнесін экономикалық циклдердің ауытқуына тәуелсіз етеді. Pampers, Tide, Gillette және Oral-B брендтері тұрақты сұраныс пен болжамды ақшалай ағымды қамтамасыз етеді.
Қыркүйек айының басында компания басшылығы жеткізу тізбегін қайта құрылымдау және жаңа технологияларды енгізу арқылы тиімділікті арттыру жоспары туралы мәлімдеді. Бұл шаралар жаһандық тұтыну нарығының баяулауын өтеуі тиіс, өйткені болжам бойынша ол алдағы жылдары 2–2,5% деңгейінде өседі (бұрынғы орташа өсім — 3–4%). Бұған қосымша ретінде, P&G Америкадағы өнімдерінің 25%-ына бағаны көтеруді жоспарлап отыр. Бұл тарифтік қысымның әсерін жұмсартып, негізгі нарықтағы маржаны сақтауға бағытталған.
Eli Lilly
Point72 үлесі: $146,95 млн
Акцияларға иелік ететін хедж-қорлар саны: 119
Eli Lilly — денсаулық пен өмір сапасын жақсартуға бағытталған инновациялық дәрі-дәрмектерді әзірлеумен, жасаумен және өндірумен айналысатын фармацевтикалық компания. Компанияда қант диабеті, семіздік және жүрек-қан тамырлары ауруларын емдеуге арналған дәрілер бар.
Қыркүйек айында компания TuneLab платформасын таныстырды — бұл жасанды жады модельдері мен $1 млрд-тан астам инвестиция салынған зерттеулер нәтижесінде алынған меншікті мәліметтер жиынтығы. TuneLab жаңа дәрілерді әзірлеу процесін жеделдетуге көмектеседі: биотехнологиялық стартаптар Lilly зерттеушілері күнделікті пайдаланатын құралдарға қол жеткізе алады. Платформа нарықта қызығушылық тудырып отыр: мысалы, Circle Pharma оны қатерлі ісікке қарсы дәрі-дәрмек әзірлеуге пайдалануды жоспарлап отыр.
Chewy
Point72 үлесі: $176,74 млн
Акцияларға иелік ететін хедж-қорлар саны: 58
Chewy компаниясы мықты қаржылық нәтижелер мен тұрақты өсімді көрсетіп отыр. Бұл — үй жануарларына арналған тауарлар сегментіндегі АҚШ-тағы ең ірі онлайн-ритейлер. Компания азық-түлік, аксессуарлар мен рецепт бойынша берілетін дәрілерді, сондай-ақ жазылым, дәріхана және телеветеринариялық қызметтерді ұсынады.
10 қыркүйекте Chewy екінші тоқсан бойынша есеп жариялады: сатылым 8,6%-ға өсіп, $3,1 млрд-қа жетті — бұл болжамның жоғарғы шегі. Таза түзетілген пайда да артты — $141 млн құрады, бұл өткен жылмен салыстырғанда $36 млн-ға артық. Бір акцияға шаққандағы пайда $0,34 болды, өткен жылы — $0,24. Клиенттік базаның өсуі компания табысының тағы бір драйверіне айналды: белсенді клиенттер саны мен олардың шығындары жылдық есеп бойынша 4,5%-ға өсіп, 21 млн клиентке және $591-ге жетті.
Coca-Cola
Point72 үлесі: $243,86 млн
Акцияларға иелік ететін хедж-қорлар саны: 84
Coca-Cola — әлемдегі ең ірі алкогольсіз сусын өндіруші, оның бизнесі франшизалық үлгіге және ондаған елдерді қамтитын бөтелкелеу бойынша серіктестік желіге негізделген. Бұл үлгі компанияны жекелеген нарықтардың ауытқуына төзімді етеді.
Қыркүйек айының басында компания басшылығы цифрлық трансформацияны басым бағыттардың бірі деп атады. Coca-Cola технологиялар мен жасанды интеллектті тұтынушылармен өзара әрекеттесуді жақсарту, ұсыныстарды дербестендіру және тиімділікті арттыру үшін белсенді қолданатын болады. Сонымен қатар компания дамушы елдердегі қатысуын күшейтуде. Ұзақ мерзімді мақсат — осы өңірлердегі сусындар нарығындағы үлесін 0,5 пайыздық тармаққа арттыру. Coca-Cola бұл үшін бизнес өсімін қолдайтын елеулі капиталдық салымдар жасауға дайын.
Boston Scientific
Point72 үлесі: $264,3 млн
Акцияларға иелік ететін хедж-қорлар саны: 100
Кардиологиядан бастап нейрохирургияға дейінгі сегменттер бойынша әртараптандыру Boston Scientific-ке қиын экономикалық жағдайда да тұрақтылықты сақтауға мүмкіндік береді. Компания кең ауқымды ауруларды диагностикалау мен емдеуге арналған құрылғылар шығарады.
8 қыркүйекте Oppenheimer сарапшылары компания акцияларының рейтингін Perform деңгейінен Outperform деңгейіне көтеріп, мақсатты бағасын $125 деп растады — бұл ағымдағы бағадан 27%-ға жоғары. Инвестициялық компания сарапшыларының пікірінше, сәтті бірігу және жұтылу стратегиясының арқасында Boston Scientific — MedTech сегментіндегі үздік өсу кейстерінің бірі. Компанияның қаржылық нәтижелері бұл пікірді растайды: екінші тоқсанда органикалық сатылым 17,4%-ға, ал бір акцияға шаққандағы пайда 21%-ға өсті. Компания басшылығы жылдық орташа өсім 11–13% деңгейінде сақталады деп күтуде, бұл бизнес тұрақтылығын көрсетеді.
Biogen
Point72 үлесі: $481,23 млн
Акцияларға иелік ететін хедж-қорлар саны: 55
Biogen — ауыр ауруларды емдеуге арналған дәрі-дәрмектерді әзірлеумен айналысады, бұл сегменттегі терапияға деген сұраныс тұрақты және экономикалық циклдерге тәуелсіз. Компания неврология, иммунология және сирек кездесетін аурулар саласына маманданған және бірегей дәрілерді жасаумен танымал.
Biogen қызыл жөке ауруы (волчанка) мен Альцгеймер дертіне қарсы инновациялық шешімдермен өнім портфелін күшейтуде. Бұл дәрілер сынақтардың кеш сатыларынан өтті және әсер ету механизмі жағынан тікелей баламасы жоқ, бұл компанияның алдағы жылдардағы әлеуетін арттырады. 5 қыркүйекте H.C. Wainwright аналитикалық компаниясы Biogen акцияларына «сатып алу» рейтингін растады және мақсатты бағаны $194 деп белгіледі (апсайд 35%), әсіресе волчанканы емдеу бағытының болашағын атап өтті.
