LVMH қайта серпілді: Moët пен Dior сатылымы сән нарығына жаңа леп әкелді
Әлемдік люкс тауар нарығының көшбасшысы LVMH сатылымы үшінші тоқсанда күтпеген жерден қайта өсе бастады: сатып алушылар Moët & Chandon шампаны мен Dior хош иістеріне белсенді қаражат жұмсаған. Бұл жағдай люкс нарығының ұзақ уақыт төмендегеннен кейін қайта қалпына келе бастағанын көрсетуі мүмкін, деп жазады Bloomberg.
Егжей-тегжейлі
Францияның LVMH холдингі сейсенбі күні үшінші тоқсандағы органикалық сатылым (Бір реттік факторларды, мысалы шығын мен бірігуді есептемеген табыс) 1% өсіп, €19,1 млрд болғанын хабарлады. Бұл — қатарынан екі тоқсандағы төмендеуден кейінгі алғашқы өсім. Сонымен қатар, компания сарапшылардың (FactSet деректері бойынша €18,2 млрд) болжамынан асып түсті, деп жазады Barron’s.
Компанияның барлық бөлімшелерінің көрсеткіштері Уолл-стрит сарапшыларының күткенінен жоғары болды. Соның ішінде басты бағыт — сән және былғары бұйымдар секторы: мұнда органикалық сатылым 2% төмендегенімен, сарапшылар бұдан да нашар нәтиже күтті, деп атап өтті Bloomberg.
Әлемдегі ең ірі сән-салтанат тауарларын өндіруші, миллиардер Бернар Арно басқаратын LVMH компаниясы ұзақ уақытқа созылған баяулау кезеңін бастан өткерді. Бұл әсіресе Қытайда қатты сезілді, себебі аталған аймақ көп жылдар бойы негізгі өсім драйвері болған, деп жазады Bloomberg. Алайда, қазір жағдай жақсара бастаған: Қытайды қамтитын аймақтағы табыс жыл басындағы 9% төмендеуден кейін соңғы тоқсанда 2% өсті. Макроэкономикалық белгісіздікке қарамастан, елдегі сұраныс үміт ұялатады, деді қаржы директоры Сесиль Кабани есеп жарияланғаннан кейін сарапшылармен сөйлескен кезде.
Соңғы екі жарым жыл бойы қиындық көрген шарап және күшті ішімдіктер бағыты АҚШ-та шампан қорының толықтырылуы мен раушан шарабының жақсы сатылымының арқасында өсім көрсетті. Жалпы алғанда, АҚШ-тағы табыс 3% артса, Еуропа мен Жапонияда сәйкесінше 2% және 13% азайды. Өткен жылы Жапонияда сатылым әлсіз иенаны пайдаланғысы келген қытай туристерінің есебінен күрт өскен еді, бірақ қазір жағдай қалыпқа келді, деп түсіндіреді Bloomberg.
Кабани төртінші тоқсанда салыстыру базасы үшін жағдай қолайсыз болатынын ескертті, алайда 2026 жылы, керісінше, өсу үшін мүмкіндік көбірек болады деді.
Нарық қалай қабылдады?
Есеп Париждегі сауда жабылғаннан кейін жарияланды. Сауда 1,4% төмендеумен аяқталды. Ал LVMH қағазы АҚШ-тағы биржадан тыс (OTC) нарықта 8,8% күрт өсті.
LVMH дәстүрлі түрде сән индустриясының жағдайын көрсететін негізгі көрсеткіш ретінде қарастырылады. Сол себепті компания қағазының өсуінен кейін АҚШ-тағы OTC-нарығында басқа да люкс брендтердің акциясы қымбаттады: Gucci иесі Kering — +5,6%, Hermès — +2,9%, Cartier иесі Richemont — +4%.
Сарапшылар пікірі
Morningstar сарапшысы Елена Соколованың айтуынша, компанияның Қытайда өсу әлеуеті сақталып отыр, себебі «тұтынушыларда пандемиядан кейін де айтарлықтай жинақ бар». LVMH-тің бұл аймақта қайтадан өсімге шығуы бүкіл саланың көңіл-күйіне оң әсер етуі мүмкін, деп қосты ол.
«Жалпы, осы нәтижелерді біз дұрыс бағыттағы қадам ретінде бағалаймыз», — деді RBC Capital Markets сарапшысы Пирал Дадания Bloomberg келтірген жазбасында.
FactSet деректері бойынша, LVMH акциясына 28 сарапшы рейтинг берген, басым бөлігі қағазды сатып алуға кеңес берді: Buy — 13, Overweight — 3. Тағы ұстап тұруға (Hold) — 11 сарапшы, сатуға (Underweight) — 1 сарапшы кеңес берді.
