McDonald’s акциялары бір аптада төртінші рет төмен бағаланды. Оларды сату керек пе?
Argus Research атты талдау компаниясы McDonald’s акцияларына берілген рейтингті «ұстау» деңгейіне дейін төмендетті. Бұл мейрамханаларға келушілердің азаюы жалғасады деген болжаммен байланысты. Сарапшылар тұтынушылар бағаның айтарлықтай өсуіне байланысты үйде тамақ дайындауды жөн көріп отырғанын айтады. Бұл – бір апта ішіндегі McDonald’s акцияларына берілген төртінші теріс баға.
Егжей-тегжейі
Argus Research компаниясының сарапшысы Джон Сташак McDonald’s акцияларына берілген бағалауды «сатып алудан» «ұстауға» ауыстырды. Бірақ ол жаңа мақсатты бағаны атаған жоқ. 11 наурызда ол мақсатты бағаны 370 долларға дейін көтерген болатын. Бұл – қазіргі баға деңгейінен 22%-ға жоғары.
Argus рейтингті неге төмендетті?
Бірнеше жылдық бағаның көтерілуінен кейін және тез қызмет көрсететін мейрамханалар арасындағы қатаң бәсеке жағдайында McDonald’s мейрамханаларындағы келушілер саны, болжам бойынша, әлсіз күйде қала береді. Бұл компания табысының өсуін тежейді, деп есептейді Сташак.
Жыл басынан бері McDonald’s акциялары 4,3%-ға өсті. Бұл мейрамхана секторына арналған биржалық қордың (ETF) өсімінен (3,4%) сәл жоғары. Бірақ аналитик компания акцияларының бағасы бәсекелестерімен салыстырғанда тым жоғары деп санайды. Мысалы, Darden Restaurants (Olive Garden, LongHorn Steakhouse) және Restaurant Brands (Burger King) секілді компаниялармен салыстырғанда әлдеқайда жоғары. Сташактың айтуынша, алдағы уақытта McDonald’s акциялары жалпы нарықпен бірдей деңгейде өседі, бірақ одан асып түспейді.
Сарапшы McDonald’s компаниясының 2025 жылғы қаржылық жылға арналған табыс болжамын бір акцияға шаққанда 13,2 доллардан 12,3 долларға дейін төмендетті. Бұл – нарық сарапшыларының ортақ болжамы 12,27 долларға жуықтайды.
Дегенмен, ұзақ мерзімді болашақта McDonald’s компаниясының келешегі жағымды көрінеді. Кең географиялық қамтуы, акцияларды кері сатып алу бағдарламасы және дивидендтердің тұрақты өсуі компанияны ұзақ мерзімді инвестиция үшін тартымды етеді.
Тағы кім рейтингті төмендетті?
10 маусымда McDonald’s алғаш рет «сату» деген рейтинг алды. Оны Redburn Atlantic сарапшылары Крис Люикс пен Эдвард Льюис берді. Бұған дейін олар екі жыл бойы компания акцияларын сатып алуға кеңес беріп келген. Redburn аналитиктері Уолл-стриттегі ең төмен мақсатты бағаны орнатты – 260 доллар. Бұл McDonald’s акцияларының соңғы жабылу бағасынан шамамен 14%-ға төмен. Олар мұндай шешімді компаниядағы сатылым көлемінің азаюымен түсіндірді. Сондай-ақ олар салмақ тастауға арналған Ozempic секілді GLP-1 дәрілерінің таралуы салдарынан жылдық табыс 1%-ға қысқаруы мүмкін екенін ескертті.
Одан бір күн бұрын Morgan Stanley McDonald’s бағасын «нарықтан жоғары» деңгейінен «нарық деңгейіне» дейін төмендеткен болатын. Бұл жерде мәселе McDonald’s-та емес, фастфуд нарығының жалпы жағдайында екені айтылды. «McDonald’s – өте сапалы бизнес, бірақ ол фастфуд индустриясындағы құрылымдық қиындықтардан сақтандырылған емес және болмайды да», – делінген CNBC келтірген ескертуде. Morgan Stanley фастфуд саласына әсер ететін басты факторлар ретінде экономикалық саясаттағы белгісіздік пен төмен табысты тұтынушылардың қиын жағдайын, сондай-ақ салауатты өмір салтына деген қызығушылықтың артуын атады.
Ал 6 маусымда Loop Capital да McDonald’s акцияларын «сатып алу» санатынан «ұстау» санатына ауыстырған. Barron’s жазуынша, Loop Capital бұл шешімді тұтынушылардың McCrispy тауық стрипстеріне берген теріс пікірлерімен байланыстырды. Аналитиктердің айтуынша, дәмі жақсы болғанымен, бұл стрипстер бұрынғы тауық наггеттері мен тендерлерге қарағанда сырттай тартымды көрінбейді.
Жалпы алғанда, Уолл-стриттегі пікірлер әртүрлі: 37 сарапшының 17-сі McDonald’s акцияларын сатып алуға кеңес береді, 19-ы бейтарап ұстанымда, яғни «ұстау» керек дейді, ал бір ғана сарапшы сату қажет деп санайды. Орташа мақсатты баға – 331,3 доллар. Бұл акция бағасы тағы 9%-ға өсуі мүмкін екенін білдіреді.
