McDonald’s-пен серіктестікті тоқтатқаннан кейін Krispy Kreme шығыны артты
Тәтті тоқаш өндіруші Krispy Kreme акциялары екінші тоқсан қорытындысын жариялағаннан кейін 7%-ға арзандап, оның «мемдік раллиін» тоқтатты. Компания McDonald’s-пен серіктестіктің үзілгеніне байланысты шығындардың өскенін мәлімдеді. Инвесторлар мен сарапшылар бұл әріптестіктен көп үміт күткен еді. Krispy Kreme ағымдағы тоқсанда қайтадан пайдаға шығуға уәде береді, бірақ сарапшылар әлі де сақтық танытып отыр.
Егжей-тегжейлі
Krispy Kreme акциялары бейсенбі, 7 тамыздағы сауда күні қорытындысы бойынша 7%-ға төмендеп, $3,18-ға түсті. Сауда барысында баға 15%-ға дейін, яғни $2,9-ға төмендеп, соңғы бір айдан астам уақыт ішіндегі ең төменгі деңгейге жетті.
Шілде айында күрт өскеннен кейін сарапшылар «мемдік» деп атаған компания акциялары екінші тоқсандағы қаржылық нәтижелер жарияланғаннан кейін құлдырады. Krispy Kreme табысы жылдық есеппен 13,5%-ға төмендеп, $379,8 млн болды. Ал таза шығын күрт өсіп, $435,3 млн-ға жетті. Салыстырмалы түрде, 2024 жылдың екінші тоқсанында бұл көрсеткіш бар болғаны $5,5 млн болған.
Krispy Kreme-нің түзетілген шығыны акцияға шаққанда 15 центті құрады. Бұл FactSet сауалнамасына қатысқан сарапшылардың ортақ болжамынан бес есе көп, олар шығын 3 цент болады деп күткен. 2024 жылдың екінші тоқсанында пончик өндіруші акцияға шаққанда 5 цент түзетілген пайда туралы хабарлаған еді.
Krispy Kreme бас директоры Джош Чарльзворттың айтуынша тоқсандық нәтижелер McDonald’s-пен серіктестік аясындағы операциялық шығындардың әсерін көрсетеді. Компания 2 шілдеде келісімді бұзған. Бұл шешімге байланысты $28,9 млн тікелей шығын және $22,1 млн ақшалай емес шығын тіркелген, деп хабарлайды Bloomberg. Чарльзворттың сөзінше, Krispy Kreme үшінші тоқсанда қайтадан пайда таба бастайды деп үміттенеді.
Krispy Kreme дағдарыстан қалай шықпақ
Компания мәлімдемесінде McDonald’s-пен серіктестікті аяқтауға байланысты шығындарды «жылдам қысқартып» жатқанын және ірі клиенттерге бағытталған, жоғары өткізу қабілеті бар тиімді орындар арқылы жаңа піскен өнімдердің жеткізілімін кеңейтетінін хабарлады.
Қарызды азайту және қайтадан өсу үшін Krispy Kreme қайта құрылымдау жоспарын жасады. Оған мыналар кіреді:
— Рефранчайзинг — компанияның иелігіндегі нүктелерді халықаралық нарықтарда (Австралия, Жапония, Ұлыбритания) серіктес-франчайзилерге сату.
— Бар нүктелер мен жабдықтардан көбірек пайда алу, сондай-ақ франчайзиге жаңа орындар ашуға қаржы салуға мүмкіндік беру, ал компания комиссия мен табыстың бір бөлігін алады.
— Операциялық шығындарды азайту, соның ішінде АҚШ-та логистиканы аутсорсингке беру.
Bloomberg-тің мәліметінше бас директор Джош Чарльзворт жыл соңына дейін тиімсіз 1500 сауда нүктесін жауып, олардың орнына шамамен 1100 тиімдірек нүктені ашатынын айтты. Оның жартысынан көбі қазірдің өзінде жұмыс істеп тұр. Бұл жаңа орындардың арасында Target, Walmart және Costco сияқты бөлшек сауда желілерімен серіктестік нүктелер бар.
Акциялардың жағдайы
Шілде айының соңында Krispy Kreme акциялары жаңа мемдік қағаздар толқынына қосылып, бір күн ішінде 30%-дан астам қымбаттады. Бірақ кейін бағасы қайта түсіп, қазіргі уақытта 2025 жылдың басымен салыстырғанда 68%-ға төмендеп отыр.
Zack-тың дерегінше пайда және шығын туралы есеп жарияланар алдында Krispy Kreme-ге қатысты болжамдарды қайта қарау үрдісі әркелкі болды. Компания акцияларына «ұстап тұру» (Hold) рейтингі берілді.
Есептен кейін Truist сарапшылары, оның ішінде Билл Чеппелл, компанияның жағдайды түзету жоспарына қуанышты екенін, бірақ «нақтырақ қадамдар жасамас бұрын» көбірек сандық деректер мен нәтижелерді күтетінін айтты. Truist та Krispy Kreme акцияларын ұстауды ұсынды.
MarketWatch-тың мәліметіне сәйкес тәтті тоқаш желісінің акциялары бойынша тоғыз сараптамалық ұсыныстың жетеуі — Hold, біреуі — Buy, біреуі — Sell.
