Meta өз чипін тестілеуде: Nvidia-ға тәуелділікті азайту жоспары
Ірі компаниялар өз чиптерін дамытуды қолға алуда
Meta Platforms, Facebook, Instagram және WhatsApp иесі жасанды интеллектті оқытуға арналған өз чипін тестілеуді бастады, деп хабарлайды Reuters. Бұл қадам компанияның сыртқы жеткізушілерге, соның ішінде Nvidia-ға тәуелділігін төмендетуге бағытталған. Meta акциялары сейсенбі күні 1%-дан аз өссе, ал Nvidia бағамдары 1,7%-ға көтерілді. Инвесторлар Nvidia-ның бірнеше ірі клиенттерге тәуелділігіне алаңдаулы.
Чип туралы толық ақпарат
Meta Platforms үлкен Llama тілдік модельдерін дамытумен айналысады және миллиардтаған доллар шығынды қысқартуды көздейді. Reuters агенттігінің дерегінше компания Meta Training and Inference Accelerator (MTIA) атты жеке ИИ-чипін сынақтан өткізуде. Егер сынақ сәтті өтсе, компания өндірісті кеңейтуді жоспарлап отыр.
MTIA – қолданбалы интегралдық схема (ASIC), яғни белгілі бір тар шеңбердегі ИИ есептеулеріне оңтайландырылған. Мұндай чиптер графикалық процессорларға (GPU) қарағанда арзан әрі қуат үнемдеуші болмақ. Meta жаңа чипті Тайваньдық TSMC компаниясы арқылы өндіріп жатыр, бұл зауыт Nvidia процессорларын да шығарады. Meta мен TSMC бұл туралы түсініктеме берген жоқ.
Инвесторлар үшін маңызды жайттар
Meta-ның чип жасау бағдарламасы бірнеше жылдан бері тұрақсыз дамып келеді, бұған дейінгі прототиптердің бірі жобадан алынған болатын. 2024 жылдың қаңтарында қаржы директоры Сьюзан Ли компания Broadcom-мен бірлесіп әзірленген чиптерді көбірек пайдаланатынын мәлімдеген соң, Broadcom акциялары қымбаттады, деп жазады MarketWatch. Reuters Meta-ның жаңа чипі Broadcom серіктестігіне қалай әсер ететінін нақтыламайды.
Meta қазіргі уақытта Broadcom чиптерін пайдаланушыларға контент ұсыну (инференс) үшін қолданса, оқыту процесін әлі де Nvidia-ның GPU-ларында жүзеге асырады. Алайда, 2026 жылға қарай компания MTIA-ны оқыту процесіне де енгізуді жоспарлап отыр.
Nvidia үшін тәуекелдер
2023 жылдың соңында Nvidia тоқсандық табысының 50%-ға жуығы небәрі төрт клиенттен түскенін хабарлады. Бұл инвесторларды алаңдатты, себебі олар жасанды интеллект технологиясының кең таралуын күтуде.
Сонымен қатар негізгі клиенттердің өз чиптерін жасауы Nvidia үшін қосымша қауіп тудырады. Google TPU чипін қолданса, Amazon Web Services – Trainium, Microsoft – Maia, ал Tesla – Dojo чиптерін әзірлеуде. Morgan Stanley болжамынша, 2024 жылы ИИ-ға арналған кастомдық чиптердің нарықтағы үлесі 11% болса, 2030 жылға қарай ол 15%-ға дейін өседі. Бірақ жалпы ЖИ есептеулерінде GPU-лар басым болып қала бермек, ал бұл нарықта Nvidia көш бастап тұр.
Nvidia акциялары 11 наурыз күні 1,7%-ға қымбаттады, алайда күн ішінде 1,7%-ға төмендеп, кейін 4,5%-дан астам өскен.
Meta акцияларына қатысты жағдай
Meta акциялары да құбылмалы болды: бағасы бір көтеріліп, бір түсіп, сауда күнін 0,4% өсіммен аяқтады. 2025 жылдың басынан бері компанияның құны 2,5%-ға, ал соңғы 12 айда 21%-ға артты. MarketWatch мәліметтері бойынша Meta-ны бақылап отырған 75 сарапшының 65-і акцияны сатып алуға кеңес береді, сегізі ұстауды ұсынады, ал екеуі сатуды жөн көреді. Wall Street сарапшыларының орташа бағалауы бойынша Meta акциялары $762,8 деңгейіне жетуі мүмкін, бұл қазіргі бағадан 26%-ға жоғары.
