Nike күтпеген жерден табысын арттырды. Екі жылдан кейін акцияларда бұрылыс бола ма
Спорттық киім өндірушісі Nike жазғы маусымда түсімін 1%-ға арттырды, бұл Уолл-стрит үшін күтпеген жағдай болды. Алайда компания таза пайдасы мен жалпы маржасының төмендегенін көрсетті. Nike үшін стратегиялық бұрылысқа жету үшін әлі көп жұмыс қажет, деп жазады CNBC. Есеп жарияланар алдында Jefferies сарапшылары спорттық брендтің акцияларын сатып алуды ұсынды. Инвестбанктің пікірінше Nike қағаздары екі жылдық құлдыраудан кейін 65%-ға қымбаттауы мүмкін, ал есептік тоқсан осы жолдағы бетбұрыс сәтке айналуға тиіс. Есеп жарияланғаннан кейін Nike акциялары постмаркеттің саудасында 4,4%-ға қымбаттады.
Егжей-тегжейлі
Nike-тің 2026 қаржы жылының 31 тамызда аяқталған бірінші тоқсанындағы сатылымы 1%-ға өсті, бұған дейін компания жылдық есепте бірнеше пайызға төмендеуді болжайтынын айтқан еді, деп хабарлайды CNBC. Тоқсандық түсім $11,7 млрд болып, Уолл-стрит күткен $11 млрд-тан асты (LSEG деректері бойынша). Бір акцияға пайда $0,49 болды, ал сарапшылар $0,27 күтті.
Соған қарамастан, таза пайда 31%-ға төмендеп, жалпы маржа 3,2 пайыздық тармаққа қысқарды — 42,2%-ға дейін. Бұл инвесторларға сигнал: ескірген үлгілерді қоймалардан тазарту процесі әлі аяқталмағанын көрсетеді, деп жазады CNBC.
«Мені осы тоқсандағы серпін жігерлендірді, бірақ алға жылжу түзу болмайды, себебі бизнестің әртүрлі бағыттары әрқалай уақытта қалпына келеді», — деді Nike қаржы директоры Мэттью Френд баспасөз релизінде.
Компания акциялары есептен кейін 30 қыркүйектегі кеңейтілген саудада 4,4%-ға өсіп, $72,8-ға жетті. Бұл АҚШ-тағы үкімет жұмысының уақытша тоқтау қаупіне байланысты акция фьючерстерінің арзандағанына қарамастан болды. Спорттық киім өндірушісінің қағаздары соңғы екі жыл бойы аюлы трендте, себебі ассортимент ескіріп, қоймаларда артық тауар жиналып қалған. 2025 жылдың басынан бері акциялар 8%-ға арзандады, ал кең нарық индексі S&P 500 шамамен 14%-ға өсті.
Жақсарулар бар ма?
Nike бас директоры Эллиотт Хилл компания үш негізгі бағытта ілгерілеуге қол жеткізгенін айтты: көтерме сату, «жүгіру» категориясы және Солтүстік Америка аймағы. Көтерме түсім 7%-ға өсіп, $6,8 млрд-қа жетті, ал Солтүстік Америкадағы сатылымдар 4%-ға артып, $5,02 млрд болды. Сарапшылар StreetAccount деректері бойынша $4,55 млрд күтті.
Алайда осы үш бағыттан тыс жағдай аса жақсы емес, деп жазады CNBC. Nike-тің тікелей сатылымдары тоқсанда 4%-ға қысқарып, шамамен $4,5 млрд болды, ал Қытайдағы түсім — Nike үшін негізгі нарықтардың бірі — 9%-ға төмендеді.
«Алғашқы жеңістерді тіркегенімізбен, барлық спорт түрлері, географиялар және сату арналары тұрақты өсу траекториясына шығуы үшін әлі көп жұмыс қажет», — деді Хилл.
Хилл стратегиясы: модельдік қатарды жаңарту, инновациялар және ескі үлгілерді қоймалардан шығарып, жаңа коллекцияларды алға жылжыту. Бірақ бұл стратегия қысқа мерзімді шығындармен байланысты. Қоймаларды босату үшін Nike жеңілдіктерді белсенді қолданып, төмен рентабельді сату арналарына жүгінуге мәжбүр болды, бұл табыстылыққа теріс әсер етті, деп жазады CNBC. Тоқсан ішінде қойма қоры өткен жылмен салыстырғанда 2%-ға қысқарды. Өнімнің өзіндік құны артты, соның ішінде жоғары кедендік алымдарға байланысты.
Тамыздың соңында Nike командаларда ауыс-түйіс жасай бастады. Қайта құрылымдау аясында компания персоналдың шамамен 1%-ын қысқартатынын жариялады, алайда қызметкерлердің басым бөлігі 21 қыркүйекке дейін жаңа қызметтерге ауысуы тиіс болды. Хилл спортқа қайта назар аудару Nike-ке негізгі сатып алушыны — спортшыны — қайтаруға көмектеседі деп санайды. Дегенмен бас директор лайфстайл бағытының да маңыздылығын мойындайды. Бұл сегмент компанияға кең тұтынушылар аудиториясын, соның ішінде әйелдерді қамтуға мүмкіндік береді — әйелдер клиенттік базасының өсуі басты мақсаттардың біріне айналды. Ким Кардашьянның Skims түзетуші іш киім брендімен серіктестік осы бағыттағы қадамдардың бірі болды. Коллекция қыркүйекте ұсынылды.
Jefferies-тің акциялардағы бұрылысқа ставкaсы
Just BUY It, — деп жазды Jefferies сарапшылары Nike акциялары туралы есеп шығардан бір күн бұрын. Инвестбанк «сатып алу» ұсынысын растады және спорттық киім өндірушісінің акцияларына $115 деңгейінде мақсат қойды. Бұл 30 қыркүйектегі жабылу бағасынан шамамен 65%-ға жоғары. Jefferies пікірінше, есеп «бұрылысқа белгі болуы тиіс — ұйықтап жатқан аю оянады». Банк жылдың екінші жартысына қарай дүкендер ескірген ассортименттен «тазартылады» деп күтеді, бұл — аздау жеңілдіктер, жаңа тауарлар және мереке маусымына жақсырақ баға бақылауы. Ұзақ мерзімде Jefferies Nike акцияларының V-тәрізді қалпына келуін 2027 қаржы жылында болжайды.
MarketWatch деректері бойынша спорттық киім мен аяқ киім өндірушінің қағаздарын бақылап отырған 38 сарапшының 20-сы оларды сатып алуды, 16-сы ұстауды, 2-уі сатуды ұсынады. Консенсустық мақсатты баға акция үшін $80,6 болып тұр, бұл олардың ағымдағы құнынан шамамен 16%-ға жоғары.
