Nvidia-ға Қытай нарығының ашылуын сарапшылар қалай бағалады?
АҚШ Конгресінен экспортқа рұқсат алуына байланысты, Nvidia компаниясының Қытай нарығына қайта оралуы Уолл-стриттегі сарапшылардың акцияға деген бағасын жоғарылатты, деп хабарлайды CNBC. АҚШ үкіметі компанияға жасанды интеллектке арналған чиптердің экспорттық нұсқасын Қытайға жеткізуге лицензия беретінін растады. Бұл шешім Nvidia-ның басты нарықтарының біріне жол ашып, кірісінің бұрынғыдан да жылдам өсуіне мүмкіндік бермек. Бір сарапшы тіпті компанияның нарықтық құны 5 трлн долларға дейін жетеді деп болжайды. Айта кетейік, бірнеше апта бұрын Nvidia тарихта алғаш болып 4 трлн доллар межесін еңсерген еді.
Уолл-стрит сарапшылары не дейді?
– Melius Research компаниясының сарапшысы Бен Рейтцес Nvidia акцияларының нысаналы бағасын 235 долларға дейін көтерді. Бұл — 15 шілдедегі жабылу бағасынан 38% жоғары. Оның пікірінше, Қытай нарығына қайта оралу — компания үшін қуатты өсім факторы болмақ. «Бұл 2026 қаржы жылының екінші жартысындағы кірістің жедел өсуін ғана емес, сонымен қатар 2027 жылдың алғашқы жартысында да айқын серпін береді», — деп жазды ол CNBC келтірген жазбасында. Сарапшының бағалауынша, Қытайға экспортталуы тиіс H20 чипінен түспей қалған 8 млрд доллар көлеміндегі кіріс 2026 жылдың соңғы тоқсанында-ақ қайта оралуы мүмкін. Мұндай жағдайда компанияның жалпы жылдық өсімі 2026 жылы 59%, ал 2027 жылы 38%-ға жетуі ықтимал.
– Oppenheimer сарапшысы Рик Шафер Nvidia акциялары 17%-ға қымбаттайды деп болжап, олардың нысаналы бағасын 200 долларға дейін көтерді. Оның айтуынша, генеративті жасанды интеллекттің жаппай таралуы, AI-акселерлерге деген сұраныс және автономды көліктерге арналған чиптер — компанияның кірісін жоғары деңгейде ұстап тұратын құрылымдық факторлар.
– Bernstein сарапшысы Стейси Расгон акциялардың бағасын 185 доллар деп растады. Бұл — соңғы жабылу бағасынан 8%-ға жоғары. Ол Nvidia екінші тоқсанның қалған апталарында Қытайға көп өнім жөнелте алмайды деп санайды, алайда шектеулердің алынуы екінші жартыжылдықта оң әсерін береді. «Nvidia-ның Қытайда қайтадан, тіпті ішінара болса да, бәсекеге түсе алатыны қуантады. Бұл жүйелік қауіптерді азайтады», — дейді ол CNBC-ге берген түсіндірмесінде. Сарапшының есебінше, қалпына келген әр 10 млрд доллар кіріс акцияға шаққандағы табысты 0,25 долларға арттырады. Қосымша 15–20 млрд доллар кіріс 2026 жылғы EPS-ті 0,4–0,5 долларға арттырып, бұл Уолл-стриттегі орташа күтілген көрсеткіштен 10% жоғары болмақ.
– Evercore ISI сарапшысы Марк Липасис Nvidia акциялары бойынша 190 долларлық мақсатты бағасын сақтап қалды. Оның айтуынша, егер H20 чиптеріне қатысты шектеулер толығымен жойылса, компания қысқа мерзімде 10 млрд доллардан астам кіріс көре алады. «Егер 2,75 млрд долларлық қоймадағы чиптерден 70–75% маржамен есептесек, шамамен 10 млрд доллар пайда түседі. Бұл өнімдер бұрын есептен шығарылғандықтан, сатылымнан келетін валдық маржа әлдеқайда жоғары болуы мүмкін», — делінген Липасистің CNBC келтірген жазбасында.
– Citi сарапшысы Атиф Малик 190 доллар көлеміндегі мақсатты бағаны растап, акция бағасының 11% өсуін күтеді. Дегенмен ол инвесторларға сақтықпен қарап, қазірше Қытайдан түсетін кірісті баға модельдеріне қоспауға кеңес берді. Сонымен қатар ол Қытай нарығының Nvidia үшін гейминг пен желілік шешімдер сегментінде маңызды екенін, бұл компанияға кейбір есептеулерге жарамды чиптерді сатуына көмектесетінін атап өтті.
Не болды?
Nvidia Қытайға экспортталатын H20 чиптеріне қатысты басты шектеулердің бірінен өтті. Компания сейсенбі күні бұл өнімдердің жақын уақытта Қытай нарығына қайта жеткізілетінін мәлімдеді. Себебі Вашингтон сәуірден бері күшінде болған шектеуді алып тастап, экспортқа лицензия беруге уәде еткен. Nvidia бас директоры Дженсен Хуанг сондай-ақ компанияның АҚШ-тың экспорттық талаптарына толық сай келетін жаңа RTX Pro графикалық процессорын шығарғанын хабарлады.
Осы жаңалықтардан кейін сейсенбі күнгі саудада Nvidia акциялары 4%-ға, ал Қытайға жеткізілімді қайта бастайтынын мәлімдеген бәсекелесі AMD акциялары 6,4%-ға қымбаттады. Жартылай өткізгіш компаниялардың өсімі Nasdaq Composite индексіне де оң әсер етіп, ол 0,2%-ға өсіп, 20 677,8 тармақпен тарихи максимумда жабылды. Ал Dow Jones және S&P 500 индексі АҚШ-тағы инфляция бойынша қарама-қайшы деректердің шығуына байланысты сауданы минуста аяқтады.
«Бұл — тек Nvidia мен оның жеткізу тізбегі үшін емес, сонымен бірге АҚШ пен Қытай арасындағы сауда келіссөздеріне әсер ететін шешім аясында жалпы нарық үшін де оң белгі», — деп түсіндірді Janus Henderson Investors басқарушы портфель менеджері Ричард Клод Bloomberg агенттігіне.
Қытай нарығына оралу оңай ма?
Bloomberg агенттігінің жазуынша, АҚШ билігі жасанды интеллектке арналған чиптерді Қытайға экспорттауға лицензия берсе де, бұл Nvidia үшін елде толыққанды бизнес жүргізуге кепіл бола алмайды. Агенттіктің дереккөзіне сүйенсек, ниет бар болғанымен, не Nvidia, не AMD бұл лицензиялар қандай көлемдегі өнімге қатысты екенін және олардың жарамдылық мерзімі қанша екенін нақты білмейді. Қазіргі кезде Қытайда америкалық компанияларға тек қарапайым әрі ескі чип нұсқаларын сатуға рұқсат берілген.
Сонымен бірге, өздерінің AI модельдерін дамытып жатқан көптеген қытайлық компаниялар жергілікті өндірушілерге ауыса бастаған. Nvidia-ның бас директоры бұған дейін де жеткізілімге тыйым салынса, Қытай нарығы Huawei Technologies-ке толығымен өтіп кетеді деп ескерткенін Bloomberg еске салады.
АҚШ-та Қытайды оқшаулауды жақтайтын саясаткерлер де бар. Олардың кейбірі америкалық чиптердің Қытайға жеткізілуін толық тоқтатуды талап етуі мүмкін. Мәселен, республикашыл Джон Муленар басқаратын Өкілдер палатасындағы Қытай жөніндегі арнайы комитет Сауда министрлігінен бұл шешімнің неге жойылғаны туралы ресми түсініктеме сұрамақ.
