OpenAI үшінші тоқсанда 12 млрд доллардан астам жоғалтқан болуы мүмкін — WSJ
Microsoft үшінші тоқсанда OpenAI-ге салынған инвестицияларға байланысты 4,1 миллиард доллар шығынды есептен шығарды. Бұл өткен жылмен салыстырғанда 490%-ға көп. Bernstein сарапшысы Фироз Валлиджидің есебі бойынша, бұл OpenAI компаниясының тоқсандағы таза шығыны 12 миллиард доллардан асқанын білдіреді, өйткені Microsoft-тың OpenAI-дегі үлесі 32,5% болған, деп жазады The Wall Street Journal.
Басылымның түсіндіруінше, Microsoft OpenAI-дегі өз үлесін үлестік қатысу әдісімен есептейді, яғни компания тек өзінің пайдасы немесе шығынына сәйкес бөлігін көрсетеді. Үш айдағы 12 миллиард долларлық шығын технологиялық компаниялар тарихындағы ең ірі тоқсандық жоғалтулардың бірі болар еді. Бұл OpenAI биыл табуды жоспарлап отырған 13 миллиард долларлық жылдық табысқа жақын.
OpenAI бас директоры Сэм Альтман инвесторларды компания ұзақ уақыт бойы шығынмен жұмыс істейтінін бірнеше рет ескерткен. Оның айтуынша, бұл — технологиялық басымдықты сақтау үшін қажет қадам. «Біз жылына 500 миллион ба, 5 миллиард па, әлде 50 миллиард па — қанша жұмсасақ та, мен үшін бәрібір. Шынын айтсам, бұл маңызды емес. Бұл қымбатқа түседі. Бірақ бұған толықтай тұрарлық», — деп WSJ өткен жылы Стэнфордтағы оның сөзін келтіреді.
Залалға қарамастан, ChatGPT жасаушысы тарихтағы ең ірі IPO-лардың бірін дайындап жатыр. Reuters агенттігі 29 қазанда жазғандай, OpenAI биржаға шығу кезінде 1 триллион долларға дейін бағалануы мүмкін. Дереккөздердің айтуынша, қаржы директоры Сара Фрайер серіктестеріне компания 2027 жылы биржаға шығуды жоспарлап отырғанын, бірақ кей кеңесшілер бұл 2026 жылдың соңында да болуы мүмкін екенін айтқан. OpenAI мұны ертеректегі инвестор Microsoft-қа тәуелділікті азайту мақсатындағы қайта құрылымдаудан кейін жасап жатыр. Қайта құрылымдаудан соң компанияның коммерциялық құрылымы пайда болды, оның бағасы 500 миллиард доллар, ал Microsoft үлесі 27,5%-ды құрайды.
Reuters деректеріне қарағанда, OpenAI-дің қазіргі бағасы 500 миллиард доллар болса да, оның жылдық табысы биыл 20 миллиард долларға жетеді деп күтілуде. Бірақ шығындар әлі де өсіп келеді. Альтманның айтуынша, биржаға шығу — жасанды интеллект инфрақұрылымына қажет ірі инвестицияларды тартудың «ең ықтимал жолы».
