S&P 500 индексі мамырдан бергі ең жақсы күнін көрсетті
4 тамыз күні АҚШ-тың төрт ірі қор индексі бір күнде 1%-дан астам өсті. Әсіресе, S&P 500 индексі үшін бұл — мамырдан бергі ең жақсы күн болды. Бұл өсім өткен апта соңында, яғни жұма күні болған құлдыраудың орнын толтыру әрекеті болды. Ол кезде нарық Трамптың жаңа тарифтері мен әлсіз еңбек нарығы есебінен құлдыраған еді. Сарапшылардың айтуынша, мұндай өсу сатылымнан кейін жиі болады, алайда нарықтың нақты көңіл күйін сейсенбі күнгі динамика айқындай түседі.
Егжей-тегжейлі
— S&P 500 индексі дүйсенбі, 4 тамызда 1,47%-ға өсіп, 6329,94 пунктке жетті. Bloomberg мәліметінше, бұл — мамыр айынан бергі бір күндегі ең жоғары өсім. Индекстегі компаниялардың шамамен 85%-ы сауданы плюспен жапты, ал көшбасшылар қатарында технологиялық компаниялар болды. Мысалы, Nvidia және Meta акциялары сәйкесінше 3,6% және 3,5%-ға қымбаттады.
— Dow Jones индексі 1,34%-ға өсіп, 44 173,64 тармаққа жетті.
— Nasdaq Composite технологиялық индексі 1,95%-ға өсіп, 21 053,58 тармаққа жетті.
— Russell 2000 шағын капитализациялы компаниялар индексі 2,1%-ға өсіп, 2212,3 тармақты құрады.
— Ал Уолл-стриттің «қорқыныш индексі» аталып кеткен CBOE Volatility Index, керісінше, 14%-ға төмендеп, 17,5 тармақ болды.
Бұл нені білдіреді?
Инвесторлар 1 тамыз жұма күні болған ірі шығындарын қайтаруға тырысты. Ол кезде S&P 500 индексі 1,6%-ға төмендеп, мамырдан бергі ең нашар күнді бастан кешкен еді.
«Бүгін, 4 тамыз — серпіліс күні тәрізді. Әдетте акциялар құлдыраудан кейін жоғары серпіліс жасайды, дәл қазір сондай жағдай. Ертең не болатынын күтуіміз керек, себебі инвесторлар: “Білесіздер ме, табыстың бір бөлігін бекітіп, ақшаның бір бөлігін қайтарып алу керек шығар” деп ойлап қалуы мүмкін», — дейді CFRA Research бас инвестициялық стратегi Сэм Стовалл CNBC арнасында.
Нарық тарихи түрде әлсіз айға аяқ басты. Статистика бойынша тамыз — Dow Jones үшін ең нашар ай, ал S&P 500 мен Nasdaq үшін — екінші ең нашар. Бұл туралы CNBC Stock Trader’s Almanac мәліметіне сілтеме жасайды.
«Бұл апта — экономикалық күнтізбе тұрғысынан тыныш кезең, сондықтан трейдерлер компаниялардың есептерінен және сауда мен жаңа тарифтерге қатысты жаңалықтардан бағыт іздеуі мүмкін», — деді Morgan Stanley жобасы E*Trade-тің басқарушы директоры Крис Ларкин Bloomberg-ке. Оның айтуынша, негізгі сұрақ — трейдерлер АҚШ экономикасының баяулауының белгілерін нарық үшін теріс фактор ретінде қабылдай ма, әлде бұл ФРЖ-ның мөлшерлемені тезірек төмендетуіне себеп болады деп үміттене ме.
«Биылғы апта — сынақ кезеңі. Дәстүрлі институционалдық маусымдық әлсіздік пен нарықтағы құлдырауды сатып алу мүмкіндігі ретінде қарайтын бөлшек инвесторлар арасында арқан тартыс жүріп жатыр. Бұл — кімнің тізгінде отырғанын анықтайтын жақсы сынақ», — деді Nationwide компаниясының бас нарық стратегi Марк Хакет Bloomberg мәліметінде.
Контекст
Жұма күнгі сатылымға екі жағымсыз жаңалық себеп болды: АҚШ президенті Дональд Трамп шамамен 70 ел мен аумаққа қатысты жаңа жоғары тарифтер енгізетін жарлықтарға қол қойды. Сонымен қатар, АҚШ-тың Еңбек статистикасы бюросы шілде айындағы жұмыс орындарының әлсіз өсуін және мамыр мен маусым айларындағы көрсеткіштердің төмендетілгенін хабарлады.
Оған қоса, геосаяси қауіптер де күшейді. Трамп Ресейдің экс-президенті Дмитрий Медведевтің «өте арандатушылық» мәлімдемелеріне жауап ретінде екі ядролық сүңгуір қайықты «тиісті аймақтарға» орналастыруға бұйрық бергенін айтты.
