S&P 500 және Dow үкіметтің шатдаунына қарамастан «мінсіз аптаны» жапты
Кең нарық индексі S&P 500 технологиялық сектор акцияларының төмендеуі салдарынан аздап минусқа кете жаздады, деп жазады Barron’s. Жұма күнгі сауда сессиясы символикалық өсіммен (+0,01%) аяқталып, индекс 6715,8 пунктке жетті. Dow Jones Industrial Average 0,5% өсіп, 46 758,3 пунктте жабылды. Екі индекс те жаңа рекорд орнатып, қатарынан алтыншы күн өсім көрсетті.
«Қазан әдетте акциялар үшін қиын ай болып саналады, бірақ 2025 жылдың қазаны оптимистік нотада басталды. S&P шілде басынан бері «мінсіз аптаны» (5 күн қатарынан өсім) алғаш рет көрсетті», — дейді Mizuho сарапшысы Даниэл О’Риган.
Керісінше, Nasdaq 3 қазанда 0,3%-ға төмендеп, 22 780,5 пунктке түсті. Бұл Palantir, Tesla және Nvidia сияқты қымбаттап кеткен технологиялық қағаздардың түзетілуімен байланысты. Осылайша, индекс бес күндік өсім қатарын үзді.
Уолл-стрит федералды үкімет жұмысының тоқтауына (шатдаун) назар аудармай отыр. Ол үш күннен бері жалғасуда. CNBC мәліметінше, құбылмалылық индексі CBOE VIX («қорқыныш индексі») күрт өсті. Бұл кейбір инвесторлардың S&P 500 құлдырауынан сақтану үшін пут-опциондар сатып алып жатқанын көрсетеді. Дегенмен апта қорытындысы оң болды: S&P 500 және Dow 1,1% өсті, Nasdaq Composite 1,3% көтерілді, ал Russell 2000 шамамен 2% қосты.
Уолл-стритті не алаңдатады?
Шатдаун салдарынан ресми статистика, соның ішінде ауыл шаруашылығынан тыс жұмыспен қамту туралы қыркүйек есебі жарияланбады. Бұған дейін шыққан жеке ADP есебі АҚШ-тың жеке секторында қыркүйекте 32 мың жұмыс орны қысқарғанын көрсетті. Ал трейдерлер әдетте Еңбек министрлігінің деректеріне сүйенеді.
Жұмыс нарығына қатысты алаңдаушылықты президент Дональд Трамп та күшейтті. Ол мемлекеттік қызметкерлерді жаппай қысқартамын деп мәлімдеді. Қаржы министрі Скотт Бессент CNBC эфирінде «үкімет қаржыландыруының тоқтауы ЖІӨ-ге, экономикалық өсімге және жұмыс істеп жатқан Америкаға соққы беруі мүмкін» деді.
Күннің басты макроэкономикалық дерегі — Қорларды басқару институтының (ISM) қызмет көрсету саласындағы іскерлік белсенділік индексі болды. Ол 52 деңгейінде қалады деген болжамға қарамастан, 50-ге дейін төмендеді. 50-ден төмен мән — белсенділіктің қысқаруын, 50-ден жоғары — өсуді білдіреді.
«ISM индекстері қыркүйекте экономика дерлік өспегенін, ал жұмыспен қамту азайғанын көрсетеді, — деді Comerica Bank бас экономисі Билл Адамс Barron’s-қа. — Өндіріс пен қызмет көрсету салаларындағы респонденттердің көбі қыркүйекте штат қысқартқанын хабарлады».
CME FedWatch құралына сәйкес, ФРЖ қазан айында мөлшерлемені төмендету ықтималдығы 95,7%-ды құрайды. Жыл соңына дейін жарты пайызға дейін қысқарту ықтималдығы — 85,1%.
Wells Fargo Investment Institute-тің аға инвестициялық стратегия сарапшысы Дженнифер Тиммерман CNBC-ге: «Қыркүйектегі ресми есептің кешігуіне байланысты біз жеке көздерден түскен аралас деректерді ФРЖ-ның 29 қазандағы отырысында тағы да мөлшерлемені төмендетуге жеткілікті әлсіз деп санаймыз. Осындай күтулер, жұмыспен қамтудағы әлсіздікті көрсеткен жаңа мәліметтермен бірге, қор нарығындағы раллиді қолдап, 10 жылдық мемлекеттік облигациялар кірістілігін 4,11% деңгейінде ұстады. Бұл S&P 500 индексін жаңа тарихи максимумға жеткізуге жеткілікті», — деді.
