«Сатуға кеш, сатып алуға ерте»: J.P. Morgan финтех-сервистер рейтингін қайта қарады
J.P. Morgan финтех-сервистер Fiserv пен PayPal акцияларының рейтингін «Нарықтан жоғары» (Overweight) деңгейінен нейтралға дейін төмендетті. Инвестбанк бұл позициялар «сатуға кеш, ал сатып алуға ерте» деп түсіндірді. Бұл жайында Seeking Alpha жазды.
«Біз 2025 жылмен қоштасуға әзірміз. Төлем компанияларының акциялары COVID-19 кезеңін есептемегенде соңғы 15 жылдағы ең нашар нәтижеге жақындап келеді. Нарық өсімінің баяулауы көрсетілетін қызметтердің құнсыздануы мен несиелеу сияқты жаңа өнімдердің өзін ақтауы түсініксіз деген қорқыныш тудырды», — делінген инвестбанк жазбасында.
J.P. Morgan 2026 жылды бір жағынан «жоспарды орындай алатынын дәлелдеу керек жыл» деп сипаттады. Екінші жағынан оны «жаңа бастамалар мен технологияларға инвестиция жасайтын жыл» деп атады. Инвестбанктың пікірінше, жаңа жылда Fiserv пен PayPal төлем жүйелері үшін жақсы жаңалықтар да, көңіл құлазытатын шақтар да көп болуы мүмкін.
«Сондықтан біз бақылаушы позициясын ұстанғанды жөн көреміз. Алғашқы жарты жылдықта көп нәрсені түсінеміз деп үміттенеміз. Содан кейін екінші жарты жылдықта қайтадан ойынға оралу керек пе, жоқ па, соны шешеміз», — делінген жазбада.
MarketWatch деректері бойынша, PayPal акцияларын қадағалайтын 46 аналитиктің 20-сы оларды сатып алуды ұсынады. Тағы 22-сі нейтрал позицияны (Hold) ұстанады. Төртеуі акцияларды сатуды кеңес етеді. Жыл басынан бері қағаздар шамамен 28% жоғалтты. Уолл-стриттің консенсус бағасы 82,2 доллар. Бұл 3 желтоқсандағы сауда жабылу бағасынан 34% жоғары.
Fiserv акциялары жыл басынан бері құнының 68%-ын жоғалтты. Қағаздарды бақылайтын 34 аналитиктің ішінен тек 14-і оларды сатып алуды ұсынады. Қалған 20-сы нейтрал позицияда. Бірақ тек екеуі ғана акцияларды сатуды кеңес етеді. Уолл-стриттің консенсус бағасы 85,7 доллар. Бұл 3 желтоқсандағы жабылу бағасынан 28% жоғары.
Не нәрсеге назар аударған жөн?
Сонымен қатар, мейрамхана бизнесіне арналған бағдарламалық жасақтама мен жабдықты өндіруші Toast компаниясының акциялары бойынша рейтинг керісінше көтерілді. J.P. Morgan сарапшылары оны нейтралдан «Нарықтан жоғары» (Overweight) деңгейіне дейін өсірді. «2026 жылы біз қайтадан фундаменталды қағидаттарға ораламыз. Бағаны клиент жоғалтпай көтере алатын, жоғары рентабельділігі бар және жаңа клиенттер базасын тез өсіретін компанияларды таңдаймыз», — деді J.P. Morgan аналитиктері.
Toast акциялары жыл басынан бері шамамен 4%-ға арзандады. MarketWatch дерегіне сай, компания қағаздарын бақылайтын 32 аналитиктің 19-ы оларды сатып алуды, 13-і ұстап тұруды ұсынады. Toast бойынша бақылап отырған аналитиктердің ешқайсысы акцияларды сатуды ұсынбайды. Уолл-стриттің консенсус бағасы 47,65 доллар. Бұл қазіргі бағадан 35% жоғары.
