Tesla акцияларымен абай болыңыз: Baird сарапшылары нені ескертуі
Baird инвестбанкі инвесторларға үш күндік раллиден кейін Tesla акцияларына тым сеніп кетпеуге кеңес берді. Банктің Barron’s басылымына берген жазбасында Уолл-стриттің компанияның қаржылық көрсеткіштері бойынша консенсус-болжамы асыра бағаланғаны және нарықтағы жағдайдың күрделі күйінде қалып отырғаны айтылды. Сарапшылардың пікірінше электрокар өндірушісі алдағы тоқсандарда қаржылық нәтижелерін жақсарта қоймайды, ал роботакси мен гуманоид роботтан түсер пайда әзірге тым бұлдыр.
Егжей-тегжейлі
Baird сарапшысы Бен Калло Tesla акциялары бойынша «сақтық позициясын» растады. Ол қағаздарды портфельде ұстау (Hold) жөніндегі ұсынысын өзгертпей, мақсатты бағасын $320 деңгейінде қалдырды, деп хабарлайды Barron’s.
Сарапшының айтуынша Уолл-стриттің консенсус-болжамдары асыра қойылған, ал акциялар нарығындағы жағдай әлі де «қиын». «Инвесторлар болашаққа үмітпен қарап отыр, бірақ Tesla-ның көлік бизнесі әзірге әлсіз нәтиже көрсетуде», — деп жазды Калло.
26 тамыз, сейсенбі күні Tesla акциялары үшінші сессия қатарынан қымбаттап, 1,5%-ға өсіп $351,7-ға жетті. Бұл — мамырдан бергі ең жоғары көрсеткіш. Салыстыру үшін, S&P 500 индексі 0,4%-ға ғана көтерілді. Бір күн бұрын компания қағаздары 1,9%-ға өсіп, 23 маусымнан бергі ең жоғарғы деңгейде жабылды. Ол күн Tesla-ның Остинде роботакси қызметін сынақтан өткізгеннен кейінгі дата болатын. Ал жұма күні акциялар бірден 6,2%-ға серпін берді — Джексон-Хоулдағы ФРЖ төрағасы Джером Пауэллдің сөзінен кейін нарық пайыздық мөлшерлеме қысқаратын уақыт жақын қалды деп жорыды.
Baird ескертулері
Сарапшының түсіндіруінше бірнеше тоқсан бойы нарық Tesla-ның әлсіз фундаменталды көрсеткіштеріне көз жұма қарап, роботакси мен Optimus робот жобаларына сенім артып келді. Алайда сарапшы компанияның өндірістік көлемі мен қаржылық нәтижелері бойынша 2025 жылдың екінші жартысына берілген болжамдар тым жоғары деп есептейді.
Baird болжамы бойынша Tesla-ның жылдық пайдасы бір акцияға $1,6 болады, ал Уолл-стриттің консенсусы — $1,7. 2026 жылға келсек, айырмашылық одан да айқын: Калло $2,12 десе, FactSet деректері $2,44-ты көрсетеді.
Сарапшы атап өткен негізгі тәуекелдер:
АҚШ-та электрокар сатып алушыларға берілетін $7500 субсидиясының 30 қыркүйекте тоқтатылуы;
көміртек квоталары саудасының азаюы.
Washington Post мәліметінше бұл квоталарды сатудан Tesla 2024 жылдың алғашқы жартысында $724 млн, ал бүкіл жыл ішінде $2,76 млрд табыс тапқан. Бірақ енді экологиялық саясаттағы өзгерістерден кейін квота бұзған автоөндірушілер айыппұл төлемейді.
Инвесторлар Tesla-дан не күтуде?
Техастағы роботаксидің іске қосылуы компания үшін маңызды белес болды. Tesla жақтастарының ойынша дәл осы ІІ арқылы басқарылатын коммерциялық көліктер жаңа табыс дәуірін ашады. 10 қазанда Голливудта таныстырылымнан бастап ресми іске қосылған күнге дейін компания акциялары шамамен 50%-ға өсті. Кейін нарық консолидация кезеңіне кірді, инвесторлар жаңа серпін күтіп отыр.
Мұндай серпін қызметтің басқа қалаларға кеңеюінен келуі мүмкін, әзірге бұл орын алған жоқ, бірақ нарық айқын түрде келесі қадамды күтуде, деп жазады Barron’s.
Virtus Zevenbergen Innovative Growth қорының басқарушысы Джозеф Деннисон Tesla үшін шешуші сәт жақын деп есептейді. Оның ойынша 2026 жылы акциялардың өсуіне роботакси мен автономды технологиялардың дамуы, сондай-ақ арзанырақ Tesla модельдерінің шығуы әсер етеді. Мысалы, алты орындық Model Y L жаңа сатып алушыларды тарта алады. Бұған қоса, компания жасанды интеллекттің арқасында қосымша серпін алмақ.
«Біз әрқашан Tesla-ны жай ғана көлік компаниясы емес, ІІ, робототехника және тұрақты энергетика саласындағы өз буынының бірегей көшбасшысы деп қарадық, — дейді Деннисон. — ІІ дамуына қажетті ең маңызды факторлар — деректерге қолжетімділік, софт пен “темірге” инвестиция салу капиталы және инженерлік таланттар. Бізде Tesla осының бәріне ие деп санаймыз».
The Motley Fool да Tesla акцияларының өсуін роботакси нарығы мен қолжетімді Model Y шығарылымымен байланыстырады. Ол модель төртінші тоқсанда шығарылады деп жоспарлануда. Алайда егер өндірісте елеулі қиындықтар туындаса, акциялар күрт құлдырауы мүмкін екенін ескертеді.
2025 жылдың басынан бері Tesla акциялары әлі де 13% төмен, бірақ соңғы бір жылда шамамен 68%-ға өсті.
