Viking акциясы тестілеуден кейін 45% төмендеді. Novo мен Eli үшін тәуекел азайды ма?
Viking Therapeutics фармкомпаниясының акциялары семіздікке қарсы таблетка түріндегі препараты бойынша жаңа деректер жарияланған соң 45%-дан астамға құлдырады. Зерттеудің екінші фазасы 13 аптада орта есеппен 12,2% салмақ тастағанын растады, бірақ емдеуді ерте тоқтатқандардың үлесі күтпегендей жоғары болды. Салмақ азайтуға арналған таблетка түріндегі дәрі қазір даттық Novo Nordisk пен америкалық Eli Lilly үстемдік етіп тұрған нарықта жаңа серпіліс болуы мүмкін. Viking сәтсіздігінен кейін олардың қағаздары қымбаттады.
Егжей-тегжейлі
Салмақ азайтуға арналған таблеткалар әзірлеп жатқан Viking Therapeutics фармкомпаниясының акциялары сейсенбі, 19 тамыздағы саудада бір сәтте 44,9%-ға төмендеп, $23,21-ға түсті. Бұл сәуір айының ортасынан бергі минимум болды.
Viking семіздікке қарсы эксперименталды таблетка VK2735-тің екінші фазалық сынақтарының нәтижесін жариялады. Жаңа деректер жанама әсерлердің күткеннен әлдеқайда ауыр болуы мүмкін екенін көрсетті, деп жазады Barron’s.
Компанияның айтуынша, клиникалық зерттеудің екінші фазасында күн сайын VK2735 қабылдаған пациенттер 13 апта ішінде шамамен 12,2% салмақ тастаған (бұл медианалық мән: яғни жартысы көбірек, жартысы азырақ). Сонымен қатар, препарат қабылдаған пациенттердің 28%-ы емді ерте тоқтатты, ал плацебо тобында бұл көрсеткіш 18% болды. Viking препаратымен емделгендердің төрттен бірі құсуға шағымданды (плацебо қабылдағандардың 10%-ы), ал 58%-ы жүрек айнуға (плацебода – 48%) шағымданды.
Салыстыру үшін: америкалық фармгигант Eli Lilly семіздікке қарсы эксперименталды таблеткасының нәтижесін 7 тамызда жариялады. Lilly зерттеуі әлдеқайда ұзаққа – 72 аптаға созылды, ал емді ерте тоқтату деңгейі дозасына қарай 21,9% және 24,4% болды.
19 тамыздағы саудада Lilly акциялары шамамен 1,7%-ға, ал Ozempic пен Wegovy өндірушісі Novo Nordisk-тің америкалық депозитарлық жазбалары 1,2%-ға өсті.
Viking мәлімдегені
Viking басшылығы сейсенбі күні таңертең инвесторлармен сөйлесуде жанама әсерлерге қатысты алаңдаушылықты сейілтуге тырысты, деп жазады Barron’s. Менеджерлер плацебо қабылдағандар арасында да емді тоқтату деңгейі жоғары болғанын атап өтті және пациенттер ішек-қарынға байланысты проблемаларды шамадан тыс хабарлаған болуы мүмкін деп болжады.
Viking бас директоры Брайан Лиан: «Неліктен плацебо тобында бастапқы көрсеткіштер де жоғары болды, білмеймін; мүмкін — бұл тек болжам — асқазан-ішек жолына байланысты жағымсыз әсерлерді күткен адамдар оларды сезімтал қабылдап, жиі хабарлаған шығар», — деді.
Сарапшылар пікірі
Таблетка түріндегі салмақ азайтатын дәрілер бұл нарық үшін жаңа серпіліс болуы мүмкін, бірақ әзірге мұндай жобалар қиындықтарға тап болып жатыр, деп жазады Bloomberg. Мысалы, фармгигант Pfizer өз жобасынан бас тартқан.
Нарықта бар инъекциялық Wegovy мен Zepbound-тан бөлек, Eli Lilly келесі жылы orforglipron таблеткасын шығаруды жоспарлап отыр. Ал Novo «Wegovy таблеткасын» іске қосуды көздейді: ол 3-фазалық сынақта 16,6% салмақ жоғалтуды көрсетті, деп жазады Barron’s.
Mizuho сарапшысы Джаред Хольцтің айтуынша, Eli Lilly Viking-тен әлдеқайда жақсы көрінеді. «Бұл Viking-тің жақын және орта мерзімді перспективада семіздікке қарсы пероральды дәрілер нарығында маңызды ойыншыға айналу мүмкіндігін азайтады», — деді ол.
Сонымен бірге, кейбір көрсеткіштер бойынша Viking препараты сарапшылар күткеннен де жақсы нәтиже көрсетті. William Blair сарапшысы Энди Ши 12 тамыздағы жазбасында плацебоға түзету енгізгенде салмақтың «ең жоғары дозалар үшін 7%-дан аз» төмендеуін күткенін жазған еді. Viking сейсенбіде ең жоғары доза үшін 10,9%, ал келесі доза үшін 9,8% төмендегенін айтты.
Cantor сарапшысы Стив Сидхаус сейсенбі күнгі Viking акцияларының жаппай сатылуына таңғалғанын айтты. Оның сөзінше, зерттеудің жеке тармағында жоғары дозадан кейін пациенттерді төменгі дозаға ауыстырғанда олар нәтижесін сақтап қалған. Сидхаустың айтуынша, тестіленген ең жоғары дозалар бастапқыда коммерциялық қолдануға арналмаған, ал орташа 30 мг дозасы бәсекеге қабілетті болып көрінеді.
«Жалпы алғанда, бұл деректер өте сенімді: олар Viking-ке пероральды VK2735-ті болашақта стратегиялық артықшылыққа айналдыра алатын «қолдағы резерв» ретінде ұстауға мүмкіндік береді», — деп жазды Сидхаус.
Viking акцияларына рейтинг берген 17 сарапшының 15-і оларды сатып алуды (Buy және Overweight), ал екеуі ұстауды (Hold) ұсынады.
Viking туралы
Компания әлі де Eli Lilly мен Novo-ға бәсеке бола алатын салмақ азайтатын дәрілер нарығынан үлеске үміткер болып отыр, деп жазады Barron’s.
Қазір Viking Therapeutics портфелінде фармрегулятор мақұлдаған бірде-бір препарат жоқ. Демек, компания әзірге ештеңе сатпайды және табыс таппайды. Сонымен бірге шығындары көп, ал алдағы алты айда оларды шамамен 25–30%-ға арттыруды жоспарлап отыр.
Viking сондай-ақ VK2735-тің инъекциялық түрін де тестілеуде. Ол қазір клиникалық сынақтың үшінші фазасында. Екінші фазада бұл нұсқаны қабылдаған пациенттер 13 апта ішінде орта есеппен 14,7% салмақ тастаған.
