Басты жаңалықтар: $3 млрд-тық криптоқор, Пауэлл қызметте қалады, экономика баяулайды
Cantor Fitzgerald LP, Tether Holdings Ltd. және SoftBank Group $3 миллиардтық криптовалюта активтерін жинақтайтын инвестициялық қор құру туралы келіссөздер жүргізуде; алтын таңертеңгі төмендеуден кейін қайта көтеріле бастады, ал Дональд Трамп АҚШ Федералды резерв жүйесінің төрағасы Джером Пауэллды қызметінен босатпайтынын айтып, уәде берді. Осы және басқа да тақырыптар жайлы 23 сәуірдегі әлемдік БАҚ шолуынан оқыңыз.
Азия нарықтары АҚШ пен Қытай арасындағы сауда шиеленісі бәсеңдейтініне үмітті
Азия-Тынық мұхиты аймағындағы нарықтар сәрсенбі күні өсті, себебі Уолл-стриттегі үш негізгі индекс өткен сессияны АҚШ пен Қытай арасындағы сауда шиеленісі шешімін табар деген үмітпен жоғары деңгейде аяқтады, деп жазады CNBC.
Бұл жағдай АҚШ президенті Дональд Трамптың Қытайдың экспорттық тауарларына салынатын соңғы баж салығы «145%-ға жақын болмайтынын», бірақ «нөлге тең болмайтынын» мәлімдегеннен кейін орын алды.
Гонконгтық акциялар аймақтағы өсімді бастады: Hang Seng индексі 2,5%-ға, Hang Seng Tech индексі 3,3%-ға өсті. Қытайдың материктік бөлігінде CSI 300 индексі 0,3%-ға өсті. Жапонияда Nikkei 225 индексі және кең ауқымды Topix индексі 1,8%-ға өсті. Үндістанның Nifty 50 индексі 0,64%-ға, BSE Sensex индексі 0,56%-ға көтерілді. Оңтүстік Кореяда Kospi индексі 1,5%-ға, ал кіші капитализациялы Kosdaq индексі 0,9%-ға өсті. Австралиядағы S&P/ASX 200 индексі 1,2%-ға жоғарылады.
АҚШ акцияларының фьючерстері Трамптың Пауэллды ФРС басшылығынан босатуды жоспарламайтыны туралы мәлімдемесінен кейін көтерілді.
АҚШ-тағы сауда жабылғаннан кейін қор нарығы өткен күні қатты құлдыраудан кейін қалпына келіп, АҚШ пен Қытай арасындағы сауда қақтығысының деэскалациясына байланысты инвесторлар бұны оң қабылдады.
Dow Jones индексі 2,7%-ға өсіп, 39 186,98 деңгейіне жетті. S&P 500 индексі 2,5%-ға өсіп, 5287,76-ға жетті, ал Nasdaq Composite 2,7%-ға өтіп, 16 300,42 деңгейінде сессияны аяқтады.
Алтын күрт құлдыраудан кейін тұрақтады
АҚШ бастаған сауда соғысы аясында инвесторлар алтынның келешегін бағалап жатқан шақта оның бағасы таңертеңгі төмендеуден кейін қайта қалпына келіп, тұрақты деңгейге жетті, деп хабарлайды Bloomberg.
Сейсенбі күні алтын бағасы унциясына рекордтық $3500-ге дейін көтерілгенімен, сауда барысында шамамен 2%-ға төмендеп, кейін $3372 шамасында тұрақтады.
«Кез келген түзету — нарыққа кіру үшін тамаша мүмкіндік», — дейді Zijin Tianfeng Futures компаниясының сарапшысы Шияо Лю. Оның айтуынша алтынның бағасын ұзақмерзімді қолдайтын факторлар бар.
Жыл басынан бері алтын 25%-дан астамға қымбаттады. Инвесторлар сауда шиеленістері, жаһандық баяулау қауіптері және Дональд Трамп әкімшілігі мен АҚШ Федералдық резерв жүйесі арасындағы келіспеушіліктер аясында қорғаныш активтеріне жүгінуде. Бағаның өсуіне биржалық қорлар арқылы алтын сатып алудың артуы мен орталық банктердің белсенділігі де ықпал етуде.
Сейсенбіде техникалық индикаторлар активтің шамадан тыс сатып алынғанын көрсеткеннен кейін кейбір инвесторлар пайдасын бекітіп, баға күрт төмендеді. Бұған қосымша әсер Трамптың мәлімдемелерінен туды: ол ФРЖ төрағасы Джером Пауэллді қызметтен босату ойынан бас тартты және Қытаймен сауда қақтығысы бойынша оң пікір білдірді.
Сингапур уақытымен таңғы 10:55-тегі жағдай бойынша алтын бағасы унциясына $3360 деңгейінде саудаланып, айтарлықтай өзгеріссіз қалды. Bloomberg Dollar Spot индексі де тұрақты болды. Бұған дейін 1%-дан астам төмендеген күміс бағасы да қалпына келді. Платина мен палладий аздап өсті.
Tether, SoftBank және Cantor Fitzgerald $3 млрд көлеміндегі криптовалюта қорын құруда
Bloomberg агенттігінің хабарлауынша Cantor Fitzgerald LP, Tether Holdings Ltd. және SoftBank Group криптовалютада активтерді жинақтайтын $3 млрд көлеміндегі инвестициялық қор құру жөнінде келіссөздер жүргізіп жатыр.
Cantor Equity Partners I Inc. деп аталатын арнайы мақсаттағы бірігу компаниясы (SPAC) қаңтар айында $200 млн тартқан және бұл қаражат жаңа инвестициялық құрылым құруға бағытталмақ. Стейблкоин эмитенті Tether бұл жобаға $1,5 млрд көлемінде биткойн түрінде инвестиция салмақ. Tether-мен байланысты Bitfinex криптобиржасы мен SoftBank сәйкесінше тағы $600 млн және $900 млн криптовалюта түрінде қосымша қаржы бөлуді жоспарлап отыр, деді дереккөз.
Келісім алдағы күндері ресми түрде жариялануы мүмкін. SoftBank пікір білдіруден бас тартты, ал Cantor, Tether және Bitfinex өкілдері сұраныстарға жауап бермеді. Бұрын бұл келіссөздер туралы Financial Times жазған болатын.
Бұл келісім Strategy (бұрынғы MicroStrategy) компаниясының бизнес-моделінің жаңа нұсқасы десе болады. Майкл Сейлор негізін қалаған бұл компания бағдарламалық қамтамасыз ету саласынан криптовалюта сақтаушы ірі ойыншыға айналып, шамамен $45 млрд биткойн жинақтады. Соңғы жылдары бүкіл әлемде оның үлгісін ұстанатын Metaplanet Inc. сияқты компаниялар пайда бола бастады – олар криптоактивтерді сатып алу үшін акциялар мен конверттелетін облигациялар секілді қаржы құралдарын пайдаланады.
Әлемдегі ең ірі стейблкоин эмитенті Tether соңғы жылдары ауыл шаруашылығы, жасанды интеллект және нейроимплантаттар сынды жекеменшік инвестициялар саласына белсенді кірісуде. Компания ақпан айында артық резервтерінің $7 млрд-тан асатынын хабарлаған.
Tether мен Cantor арасындағы байланыс та нығая түсті. Бұрынғы Cantor бас директоры Ховард Латник қазіргі таңда АҚШ президенті Дональд Трамп әкімшілігінде сауда министрі қызметін атқарады. Cantor – Tether-дің резервтерін басқаратын және оның конверттелетін облигацияларына иелік ететін компания.
Трамп ФРЖ төрағасы Пауэллды қызметінен кетірмейтінін мәлімдеді
Financial Times басылымының хабарлауынша АҚШ президенті Дональд Трамп Федералдық резерв жүйесінің төрағасы Джером Пауэллды қызметінен босату ойында жоқ екенін мәлімдеді. Бұл жаңалық жаһандық қор нарықтарының өсуіне және доллардың нығаюына себеп болды. Трамп бұған дейін Пауэллды пайыздық мөлшерлемелерді төмендетуден бас тартқаны үшін бірнеше рет сынға алған және өткен аптада оның өкілеттік мерзімі 2026 жылғы мамырда аяқталғанға дейін отставкаға жіберілуі мүмкін екенін меңзеген.
Сейсенбі күні Ақ үйдің Доғал кабинетінде сөйлеген сөзінде Трамп қарыз алу құнын төмендету қажеттілігі туралы ұстанымын қайталап: «Мен бұл туралы айтқым келмейді, өйткені оны жұмыстан босатуды жоспарлап отырған жоқпын», — деді.
Инвесторлар Трамптың Пауэллды дереу қызметінен босатудан бас тартуы АҚШ институттарының тәуелсіздігін мойындайтын адамдардың оның айналасында бар екенін көрсетеді деп есептейді.
«Бұл президент кезінде де белгілі бір тепе-теңдік пен тежемелік жүйесі сақталғанын білдіреді», — деді SLC Management компаниясының атқарушы директоры Дек Малларки. «Мұнда [Қаржы министрі] Скотт Бессенттің ықпалы бар сияқты», — деп толықтырды ол.
Малларкидің айтуынша Трампқа Пауэллды жұмыстан босату нарықта күшті құбылмалылық тудыруы мүмкін екенін басқалар түсіндірген болуы мүмкін. «Бессент нарықтың тұтастығын сақтау қажет екенін жақсы түсінеді», — деді ол.
Ал Джером Пауэлл бірнеше рет өз өкілеттігінің толық мерзімін аяқтауды көздейтінін және оны мерзімінен бұрын босату АҚШ заңнамасына қайшы екенін мәлімдеген.
Инвесторлардың алаңдаушылығы өткен жұмада Ұлттық экономикалық кеңестің директоры Кевин Хассеттің Трамп Пауэллды қызметінен кетіру мүмкіндігін «қарастырып жатқанын» мәлімдегеннен кейін күшейген.
Трамп криптоиндустрияны реттейтін ережелер қажет екенін мәлімдеді
АҚШ президенті Дональд Трамп сейсенбі күні криптовалюта саласында нақты реттеуші қағидалар мен анықтық қажет екенін айтты. Ол бұл бағыттағы жұмысты АҚШ-тың Қор нарығы және биржа жөніндегі комиссиясының (SEC) жаңа төрағасы Пол Аткинске жүктейтінін мәлімдеді, деп хабарлайды Reuters агенттігі.
«Қазіргі таңда криптовалюта саласы реттеудің анықтығы мен нақты ережелерге мұқтаж болып отыр, әрі олар бұл өзгерістерді асыға күтуде. Пол Аткинс — осы қиын сәтте агенттікке жетекшілік етуге ең лайықты адам», — деді Трамп Аткинсті SEC төрағасы қызметіне ресми түрде тағайындау рәсімінде.
Халықаралық валюта қоры: Трамп енгізген баж салықтары жаһандық өсімді баяулатады
ХВҚ болжамынша АҚШ-тың импортқа салынатын баж салығын күрт арттыруы жаһандық экономикалық өсімнің бәсеңдеуіне әкеледі. Бұл туралы Reuters агенттігі хабарлады.
Вашингтонда әлемдік қаржы көшбасшылары жиналып, Трамп әкімшілігімен сауда баждарын төмендету бойынша келіссөздер жүргізуге ниетті. Ақ үйдің баспасөз хатшысы Кэролайн Левиттің айтуынша, келіссөздер жеделдетілген режимде өтуде — 18 ел өз ұсыныстарын жолдап үлгерсе, Трамптың сауда тобы осы аптада тағы 34 елдің өкілдерімен кездесу өткізеді.
Трамп Қытаймен сауда келісіміне қатысты оптимизм білдіріп, бұл келісім баж салығын «айтарлықтай» азайтуы мүмкін екенін айтты. Бұл мәлімдеме нарықтарда оң реакция тудырды.
Сонымен қатар Трамп Федералдық резерв жүйесінің төрағасы Джером Пауэллды өкілеттігі аяқталғанға дейін қызметтен босатпайтынын тағы да растады. Бұл мәлімдеме АҚШ Орталық банкінің тәуелсіздігіне қатысты инвесторлар арасындағы алаңдаушылықты төмендетті.
