АҚШ-та жұмыс орындары статистикасы күрт қысқартылды. Мөлшерлемеге әсері қандай?
АҚШ еңбек нарығы бұрын ойланғаннан әлдеқайда аз жұмыс орны құрғанын айғақтайтын деректер жарияланды. 2025 жылдың наурызына дейінгі бір жыл ішінде ауыл шаруашылығынан тыс жұмыс орындары 911 мыңға қысқарды. Бұл Уолл-стриттің болжамдарынан әлдеқайда жоғары және Федералдық резерв жүйесіне мөлшерлемені жақын уақытта төмендетуге қосымша себеп болуы мүмкін.
Егжей-тегжейі
АҚШ-тың ауыл шаруашылығынан тыс секторындағы жұмыс орындары бастапқы көрсеткішпен салыстырғанда 911 мыңға азайды. Бұл жөнінде 9 қыркүйек, сейсенбі күні Еңбек статистикасы бюросы хабарлады. Бұл деректер түпкілікті емес, соңғы нұсқасы 2026 жылдың ақпанында жарияланады.
Bloomberg мәліметінше, 911 мыңдық қысқару кем дегенде 2000 жылдан бергі ең ірі түзету болды. CNBC жазғандай, нәтиже Уолл-стрит сарапшыларының орташа күткенінен асып түсті. Олар 600 мыңнан 1 миллионға дейінгі қысқаруды болжаған еді.
Жыл сайын еңбек нарығы статистикасы қайта қаралады. Бірақ бұл жолы ол ерекше назарға ілікті. Себебі инвесторлар еңбек нарығы күткеннен жылдамырақ баяулап жатқанын көрсететін белгілер іздеп отыр, деп жазады Bloomberg. Мұндай төмендеу ФРЖ-ға мөлшерлемені қысқарту жөніндегі қысымды күшейтті.
Трейдерлер іс жүзінде ФРЖ 16–17 қыркүйектегі отырыста мөлшерлемені төмендететініне сенімді. CME Group компаниясының FedWatch құралына сәйкес, мөлшерлемені 25 базистік пунктке қысқарту ықтималдығы 92,1%, бірден 50 пунктке қысқарту ықтималдығы — 7,9%.
Сонымен қатар түзетілген деректер экономиканың жағдайына және статистика сапасына күмәнді арттырды, деп хабарлады CNBC.
«Маңыздысы — жұмыс орындарының баяу құрылуы табыс өсімінің де баяу болғанын білдіреді. Бұл біз көктемнен бері байқап келе жатқан саяси белгісіздік пен экономиканың баяулауына дейін-ақ басталған. Бұл ФРЖ-ға мөлшерлемені төмендету циклін қайта бастауға қосымша негіз береді», — деді Nationwide Financial экономисі Орен Клачкин CNBC арнасына.
Контекст
Өткен аптада Еңбек статистикасы бюросы тамыз айының деректерін жариялады. АҚШ-та жұмыс орындары бар болғаны 22 мыңға өсті. Ал Уолл-стриттің консенсус-болжамы 75–76,5 мың аралығында болған. Күтпеген әлсіз деректер бастапқыда нарықты жігерлендіріп, мөлшерлеменің тез арада төмендеу ықтималдығын арттырды.
Алайда көп ұзамай оптимизм сақтыққа ауысты. Инвесторлар экономиканың баяулауынан қауіптенді. «Қарапайым логика: жұмыс орны аз болса — шығын азаяды — компаниялардың пайдасы төмендейді», — деген болатын JPMorgan-ның бұрынғы стратегы Марко Коланович.
