Апта айшықтары: Люкс нарығы жанданды, Алтын арзандады, Маск 1 триллион $ сұрады
Люкс нарығы қайта жандана бастады: Hermès, Prada және Kering компанияларының есептері инвесторларға ұзақ құлдыраудан кейін үміт сыйлады. АҚШ-та қыркүйек айындағы инфляция күткеннен төмен болды. Нарық келесі аптада ФРЖ мөлшерлемені төмендететініне сенімді. Алтын кейінгі12 жылдағы ең үлкен төмендеуді бастан кешті, ал мұнай АҚШ-тың «Роснефть» пен «Лукойлға» қарсы санкцияларынан кейін қымбаттады. Tesla табыс бойынша болжамнан асып түсті, бірақ пайдасы көңілден шықпады. Компания басшысы Илон Маск 1 триллион доллар көлемінде бонус сұрады. 20–24 қазан аралығындағы басты оқиғалар туралы шолуда.
Hermès, Prada және Kering инвесторларға сенім берді
Францияның Hermès компаниясы үшінші тоқсанда сатылымды шамамен 10%-ға арттырғанын хабарлады. Бұл көрсеткіш талдаушылардың болжамынан асып түсті. Негізгі себеп — АҚШ пен Қытайда Birkin және Kelly сөмкелеріне тұрақты сұраныс. Prada-ның есебі де оң нәтиже көрсетті: 2025 жылдың тоғыз айында бөлшек сауда табысы 9%-ға өсті, ал еншілес Miu Miu бренді 41%-ға артты. Бұл Prada-ның негізгі бренді сатылымындағы аздаған төмендеуді өтеді. Gucci иесі Kering те оң көрсеткіш көрсетті: есеп жарияланған соң, 23 қазанда компанияның акциялары 11%-дан астам өсті. Сатылым тек 5%-ға қысқарды, ал екінші тоқсанда бұл көрсеткіш 15% болған еді. Сарапшылар мұны «тұрақтануға алғашқы үміт беретін белгі» деп атады.
Люкс нарығы кейінгі жылдардағы Қытай экономикасының баяулауы мен «қолжетімді люкс» сегментіне сұраныстың төмендеуінен кейін қайта серпін алуда. Citi, UBS және Deutsche Bank сарапшыларының пікірінше, Hermès, Prada және Kering көрсеткіштерінің жақсаруы нарықтың жалпы тұрақтануын көрсетеді. Дегенмен, қалпына келу әлі де әлсіз: нәтижелер Қытайдағы экономикалық өсімге, валюта айырбасына және жаңа коллекциялардың табысына байланысты болады.
Тағы не оқуға болады:
BNP Paribas Exane есептер алдында люкс нарығына шамадан тыс оптимизм танытпауға шақырды. Инвесторларға берген кеңестерін “Люкс нарығы туралы 5 тезис: қазір қай компанияларға назар аудару керек” атты мақалада оқуға болады.
АҚШ-та инфляция күткеннен төмен болды
Қыркүйекте АҚШ-та инфляция күткеннен төмен болды: тұтыну бағалары индексі (CPI) қаңтардан бері алғаш рет жылдық 3%-ға жетті (тамызда 2,9% болған). Сарапшылар 3,1% болады деп күткен. Негізгі инфляция (Core CPI) ай сайын 0,2%-ға, жылдық есеппен 3%-ға өсті. Бұл да болжамнан төмен (күтілгені 0,3% және 3,1%).
Акциялар бұл жаңалыққа оң әсер етті: 24 қазандағы сауда басында S&P 500 индексі 0,9%-ға, Nasdaq 1,2%-ға, Dow Jones 0,8%-ға өсті. Ал пайыздық мөлшерлемеге сезімтал шағын компаниялар индексі Russell 2000 1,5%-ға көтерілді.
Бұл АҚШ үкіметінің 24 күндік тоқтап қалуынан кейінгі алғашқы маңызды экономикалық есеп болды. Инвесторлар осы уақыт бойы ресми статистикасыз қалған еді. Инфляция әлі де ФРЖ мақсатты 2% деңгейінен жоғары болғанымен, нарық келесі аптада мөлшерлеме 25 базистік пунктке (3,75–4%) дейін төмендейді деп күтіп отыр. CME FedWatch мәліметі бойынша, желтоқсанда тағы да төмендету болжанып отыр.
Мұнай АҚШ санкцияларынан кейін қымбаттады
23 қазанда мұнай бағасы күрт көтерілді. АҚШ 2010-жылдардан бері алғаш рет Ресейдің ірі мұнай компаниялары — «Роснефть» пен «Лукойлға» санкция енгізді. Brent және WTI фьючерстерінің бағасы барреліне 3 доллардан астам өсті, ал Brent-тің желтоқсан келісімшарттары уақытша 65 доллардан асты. Мұнай қорының күтпеген азаюы да баға өсуіне әсер етті.
Сарапшылар бұл бағалардың қысқа мерзімді реакциясы деп санайды. Rystad Energy мәліметінше, соңғы жылдардағы санкциялар Ресейдегі мұнай өндірісіне айтарлықтай әсер еткен жоқ. Ендігі басты фактор — ОПЕК+ саясаты. Егер өндіріс квоталары алынса, нарықта артық ұсыныс пайда болып, баға қайта төмендеуі мүмкін.
Tesla табысты арттырды, бірақ пайдасы көңілден шықпады
Tesla үшінші тоқсанда табысын 12%-ға арттырып, 28,1 млрд долларға жеткізді. Бұл талдаушылардың болжамынан жоғары нәтиже. Бірақ пайда төмен болды: бір акцияға таза пайда 0,5 доллар болды (күтілгені — 0,54 доллар). Жалпы таза пайда 37%-ға қысқарып, 1,37 млрд долларды құрады. Бұл электр көліктерінің арзандауы мен компанияның операциялық шығындарының 50%-ға өсуінен болды.
Tesla болашақ жеткізілімдер туралы болжам бермеді, себебі Дональд Трамп әкімшілігінің жаңа сауда және салық саясаты белгісіздік тудырып отыр. Компания 2026 жылы Cybercab, Semi жүк көліктері, Megapack 3 энергия сақтау жүйесі және Optimus роботтарын жаппай өндіруді жоспарлап отыр. Сондай-ақ роботакси желісін 8–10 қалада іске қосуды көздейді.
Дегенмен, сарапшылар Tesla-ның шығындарының көп екенін және Еуропада бәсекелестіктің артып келе жатқанын айтты. Компанияның акциялары 22 қазанда 4%-ға арзандады.
Алтын кейінгі 12 жылдағы ең үлкен құлдырауды бастан кешті
21 қазанда алтын бағасы 2013 жылдан бері болмаған деңгейге дейін төмендеді: спот нарығында унциясы 6%-ға арзандап, 4082 доллар болды. Күміс бағасы 8,7%-ға түсіп, 47,9 долларға жетті. Бұл жағдай алтын өндіруші компаниялардың акцияларына да әсер етті: Newmont және Barrick Mining 9%-ға, ал SPDR S&P Metals & Mining ETF 6,6%-ға арзандады. Barron’s басылымы алтын өндірушілердің баға өзгерісіне реакциясы енді криптокомпаниялардікіндей өткір екенін жазды.
Мұндай күрт төмендеуді сарапшылар бірнеше себеппен түсіндірді: доллардың нығаюы, АҚШ пен Қытай келіссөздеріндегі оң көзқарас, Үндістандағы алтын сатып алу маусымының аяқталуы және АҚШ үкіметінің тоқтап қалуы. FT және MKS Pamp талдаушылары алтын нарығы «қызып кетті» дейді: алты аптада алтын 1000 долларға қымбаттап, тұрақсыз өсім аймағына кірген. Енді инвесторлар үкіметтің тоқтап қалуынан кейінгі экономикалық деректер алтынның тағы да төмендеуіне себеп болады деп қауіптеніп отыр.
Тағы не оқуға болады:
Күміс нарығында рекордтық тапшылық тіркелді. Неліктен трейдерлер қайтадан күміс құймаларын сатып алып жатыр және бұл жағдай 45 жыл бұрынғы Хант бауырларының тарихына ұқсай ма? Толығырақ — Oninvest шолушысы Михаил Оверченконың “Күміс нарығындағы дүрбелең: Хант бауырларының тарихы нені үйретеді” мақаласында.
Маск 1 триллион доллар бонус сұрап, акционерлердің қарсылығына тап болды
Tesla басшысы Илон Маск тарихтағы ең ірі бас директорға арналған марапат — шамамен 1 триллион долларлық акция пакетін бекітуді ұсынды. Ол инвесторлармен кездесуде өзіне «жеткілікті бақылау» керек екенін, сонда ғана «роботтар армиясын еркін құра алатынын» айтты. Акционерлердің дауыс беруі 6 қарашада Tesla-ның жыл сайынғы жиналысында өтеді. Жоспар бойынша Маск жалақы мен сыйақы алмайды, бірақ егер Tesla-ның нарықтық құны 1,5 триллионнан 8,5 триллион долларға өссе және роботакси, жасанды интеллект пен электромобильдер бойынша мақсаттарға жетсе, 1 триллион долларға дейін табыс алуы мүмкін.
Бұл бастама қатты сынға ұшырады. Кәсіподақтар мен құқық қорғау ұйымдары Take Back Tesla («Tesla-ны қайтарып алайық») атты кампания бастап, акционерлерді «асыра сілтеген бонусқа» қарсы дауыс беруге шақырды. Қарсы шыққандар арасында American Federation of Teachers, Public Citizen, Americans for Financial Reform және Stop the Money Pipeline ұйымдары бар. Олар Масктың мінез-құлқы компанияның беделіне зиян келтіріп, басқаруға кедергі жасап отыр дейді.
ISS және Glass Lewis атты ірі кеңес беру фирмалары да Масктың ұсынысына қарсы дауыс беруді ұсынды. Олар биліктің тым шоғырлануы мен акционерлік үлестің азаю қаупін ескертті. Ал ARK Invest қорының негізін қалаушы Кэти Вуд Маскты қолдап, акционерлердің қарсылығы кәсіпкерлік еркіндікті шектейді деді.
Apple iPhone Air өндірісін азайтты
Apple жұқа iPhone Air моделіне сұраныс аз болғандықтан, өндірісті қысқартты. Nikkei Asia дерегі бойынша, қараша айынан бастап шығарылым қыркүйектегі көлемнің 10%-ына дейін төмендейді. KeyBanc Capital Markets мәліметінше, бұл модельге қызығушылық «жоқтың қасы». Тұтынушылар болашақтағы бүктелетін iPhone-дарға да көп ақша төлеуге дайын емес. Тіпті жасанды интеллект функцияларын белсенді жарнамалау да сатылымды арттырмаған. Барлық iPhone Air үлгілері дүкендерде бірден бар, ал iPhone 17 және 17 Pro үлгілерін күту үш аптаға дейін созылады.
Counterpoint Research мәліметі бойынша, жаңа iPhone 17 сериясына жалпы сұраныс күткеннен жоғары болды: АҚШ пен Қытайда алғашқы 10 күнде сатылым өткен жылғы көрсеткіштен 14%-ға артық. Дегенмен, Apple акциялары 22 қазанда 3%-ға төмендеді. Жыл басынан бері акциялар тек 4%-ға өскен, ал S&P 500 индексі 14,5%-ға артқан.
Netflix пайда бойынша болжамнан төмен қалды
Netflix үшінші тоқсанда табысын 17%-ға арттырып, 11,5 млрд долларға жеткізді. Бұл сарапшылардың күткен нәтижесіне сай. Бірақ түзетілген пайда күткеннен төмен болды — бір акцияға 5,87 доллар (күтілгені 6,96 доллар). Операциялық маржа 31,5%-дан 28%-ға түсті. Компания Бразилиядағы салық дауына байланысты 619 млн доллар төледі, бірақ бұл болашақ нәтижелерге әсер етпейді деді. 22 қазанда есеп жарияланғаннан кейін Netflix акциялары 6,4%-ға арзандады.
Netflix төртінші тоқсанда табысын тағы 17%-ға арттыруды жоспарлап отыр. Негізгі үміт — жаңа релиздер: «Франкенштейн» фильмі мен «Өте оғаш оқиғалар» сериалының финалы. Компания көрермен белсенділігі мен жарнама сатылымы рекордтық деңгейге жеткенін айтты. Жыл соңына дейін жарнамадан түскен табысты екі еселеуді көздеп отыр.
Алайда сарапшылар Disney+, HBO Max және YouTube қызметтерінің бәсекесі күшейіп жатқанын ескертеді. Netflix жаңа форматтар мен жазылым бағасын көтергенімен, өсім баяулап келеді.
