Goldman Sachs Amazon мен Alphabet-ке инвестиция құюға кеңес береді
2025 жылдың басынан бері S&P 500 индексі аздап өскенмен, Amazon мен Alphabet акциялары құнсызданды. Алайда Goldman Sachs сарапшылары жылдың екінші жартысында интернет-компаниялардың бизнесі қайта қалпына келеді деп күтуде. Олар жасанды интеллект (AI) бұл өсімнің негізгі қозғаушы күші болып қала береді деп есептейді. Ең перспективалы компаниялар қатарында инвестбанк Amazon онлайн-ритейлерін және Google-дің бас компаниясы Alphabet-ті ерекше атап өтеді.
Егжей-тегжейі
Goldman Sachs сарапшысы Эрик Шериданның айтуынша, жасанды интеллект 2025 жылы интернет-компаниялардың акциялары үшін негізгі катализатор болады. Ол AI-дың қолданылу аясын кеңейтуі компаниялардың өсуіне түрткі болатынын жазады. Дегенмен, сарапшы компаниялар AI саласына құйған инвестицияларының тиімділігін дәлелдеуі керек екенін ескертеді: «Бұл қатарынан үшінші жыл — операциялық және күрделі шығындар деңгейі жоғары, ал инвесторлар нақты қайтарымның дәлелін күтуде».
Goldman 2025 жылдың екінші жартысында өсім көрсетуі мүмкін акциялар қатарында «Керемет жетілікке» кіретін екі компанияны — Alphabet пен Amazon-ды атайды. Alphabet акциялары үшін Goldman-ның мақсатты бағасы — 220 доллар, бұл 27 мамырдағы жабылу бағасынан шамамен 27% өсім болатынын білдіреді. Amazon-ның мақсатты бағасы да — 220 доллар, яғни 7% өсім күтілуде.
Шеридан екі компания да инвесторлардың қысқа мерзімді алаңдаушылығын еңсеруі қажет дейді. Alphabet-ке қатысты АҚШ Әділет министрлігінің тергеуіне байланысты реттеуші тәуекелдер компанияның жоғары табыстылығы мен іздеу жүйесі бизнесінен түсетін кірістерді көлеңкеде қалдырып отыр. Amazon-да да осындай жағдай: сауда тарифтерінің ритейлер бизнесіне ықпалына қатысты алаңдаушылықтар компанияның AI мен бұлттық технологиялардағы даму мүмкіндіктерінен басым түсіп отыр. Goldman сарапшысы алдағы уақытта Amazon акцияларының қосымша өсіміне стриминг қызметі мен Prime платформасындағы спорттық трансляциялар туралы келісімдер түрткі болуы мүмкін екенін де атап өтті.
Сондай-ақ, CNBC мәліметіне сүйенсек, Goldman сарапшысы Meta Platforms, Spotify және Uber акцияларын да сатып алуға кеңес берген.
Акциялардың қазіргі жағдайы
CNBC мәліметінше, нарықтағы құбылмалылық, президент Дональд Трамптың сауда соғысы, АҚШ экономикасының баяулау қаупі және мемлекеттік облигациялар табысының өсуі Alphabet пен Amazon акцияларына қысым түсірді.
2025 жылдың басынан бері Alphabet акциялары шамамен 8,5%-ға, Amazon — 6,3%-ға арзандады. Ал кең ауқымды нарық индексі S&P 500 осы уақыт аралығында 0,6%-ға өсті. 28 мамырдағы саудада Alphabet акциялары 0,2%-ға өсті, ал Amazon қағаздары дәл осы көлемде төмендеді.
MarketWatch деректеріне сәйкес, қазіргі таңда Уолл-стриттегі бірде-бір сарапшы инвесторларға Alphabet акцияларын сатуға кеңес бермейді. 71 сарапшының 60-ы компания акцияларын сатып алуға, қалғандары ұстауға кеңес береді. Орташа мақсатты баға — 199,6 доллар, бұл 27 мамырдағы жабылу бағасынан 15% жоғары.
Amazon бойынша да көпшілік сарапшылар сатып алуға кеңес береді: 68 сарапшының бағасы — «сатып ал» немесе «салмақты үлесі бар» (Buy/Overweight), ал тек үшеуі — бейтарап «ұста» (Hold) деген баға берген. Уолл-стриттің ортақ мақсатты бағасы — 237,8 доллар, бұл шамамен 15% өсуге мүмкіндік бар екенін көрсетеді.
