Guess енді биржада сатылмайды: сән үйі $1,4 млрд-қа жекеменшікке өтеді
АҚШ-тың әйгілі Guess?, Inc бренді өзінің бақылаушы акция пакетін Authentic Brands Group басқару компаниясына $1,4 млрд-қа сатты. Енді Guess акциялары биржада саудаланбайды.
Сауда мәні
Guess жекеменшік компанияға айналады — сән үйі Authentic Brands Group-пен $1,4 млрд көлеміндегі мәміле аясында бірігеді, деп хабарлады компания.
Компанияның акциялары Нью-Йорк қор биржасында саудаланбайды. Қазіргі акционерлер әр акцияға $16,75 алады — бұл сейсенбі күнгі жабылу бағасынан 26% жоғары. Жаңалық шыққаннан кейін сәрсенбіде Guess бағамдары 26%-ға өсіп, $16,85-ке жетті. Сауда қорытындысы бойынша компания капитализациясы $876,5 млн болды.
Authentic Brands, Reebok, Quiksilver және Champion брендтерінің иесі, келісім бойынша Guess-тің интеллектуалды меншігінің 51%-ын алады. Ал Guess-тің қазіргі акционерлер тобы, соның ішінде негізін қалаған Морис пен Пол Марчиано және бас директор Карлос Альберини, қалған үлесті иеленеді. Қазіргі менеджмент Guess операцияларын басқаруды жалғастырады.
Мәміле ағымдағы қаржы жылының төртінші тоқсанында жабылады деп күтілуде.
Компаниялар жайлы не білу керек
Guess-тың негізін 1981 жылы ағайынды Марчиано қаланған. Бастапқыда компания деним киімдерімен танылған, кейін жаһандық сән брендіне айналды. Алайда өткен жылы Guess қаржылық қиындықтарға тап болды. 2025 жылғы 1 ақпанда аяқталған қаржы жылында таза пайда (GAAP бойынша) 70%-ға қысқарып, $198,2 млн-нан $60,4 млн-ға дейін төмендеді.
Бұған дейін, наурыз айында, Guess WHP Global басқарушы компаниясынан акцияларды $13 бағасымен сатып алу туралы ұсыныс алған. Кейін Authentic Brands одан да тиімді қарсы ұсыныс жасады.
Маусымда Guess тоқсандық кірісін жариялап, сарапшылардың болжамынан жоғары нәтиже көрсетті. Дегенмен, Еуропа, Азия және Америкадағы дүкен сатылымдары төмендеді.
Authentic Brands — әлемдік деңгейдегі брендтерді дамыту және ілгерілету компаниясы. Оның портфелінде 50-ге жуық танымал фирма бар. Ең ірі мәмілелерінің қатарында Levi Strauss & Co.-дан Dockers киім брендін, Hanesbrands Inc.-тен Champion дистрибьюторлық бизнесін, ал Adidas-тан Reebok-ты сатып алуын айтуға болады.
2024 жылы Authentic Brands бас директоры Джереми Солтер компанияны 2026 жылы биржаға шығаруды ойластырып жатқанын мәлімдеген болатын.
