Morgan Stanley «ядролық ренессанс» бенефициарлары болатын үш акцияны атады
Morgan Stanley ядролық реакторлардан электр энергиясын жеткізетін үш компанияны басты фаворит деп атады. Бұл ойыншылар жасанды интеллекттің дамуының негізгі бенефициарларына айналуы мүмкін. Инвестбанк ЖИ үшін деректер орталықтарын салу атом энергетикасы бизнесінің маржиналдылығын арттырады деп санайды. Оның бағалауынша, әлемде «ядролық ренессанс» жүріп жатыр және инвесторлар үшін мүмкіндіктер айтарлықтай мол.
Егжей-тегжейі
Morgan Stanley-дің акциялар жөніндегі сарапшысы Дэвид Аркароның айтуынша, Talen Energy, Public Service Enterprise Group және Vistra секілді ядролық энергия жеткізушілері жасанды интеллект индустриясынан туындайтын сұраныс, атом генерациясы қуатының шектеулілігі және мемлекеттік қолдау есебінен ұтысқа шығуы мүмкін. ЖИ орасан зор көлемдегі энергияны қажет етеді, ал атом энергетикасы тұрақты баға, сенімділік және тиімділік ұсынады. Аркаро нарық әлі оның ұзақ мерзімді артықшылықтарын толық бағаламағанын, бірақ технологиялық алпауыттардың назарын аударғанын атап өтті.
«Ірі IT-компаниялар атом энергиясы үшін үстеме ақы төлеуге барған сайын дайын болып отыр», — дейді Аркаро.
Өткен жылы Microsoft, Amazon, Alphabet және Meta Constellation Energy Group және Talen Energy сияқты атом операторларымен келісімдер жасасты. Morgan Stanley деректері бойынша, гиперскейлерлер мегаватт-сағат үшін 30 доллардан 50 долларға дейін үстеме ақы төлеуге келіскен, ал деректер орталығы атом станциясының жанында орналасқан жағдайда — мегаватт-сағат үшін 70 долларға дейін.
Бұл фактор Vistra мен Public Service Enterprise Group акциялары үшін катализатор бола алады. Morgan Stanley жуырда осындай келісімдер туралы жаңалықтар күтеді. Ал Talen Energy қуаттарының басым бөлігі Amazon Web Services-ке бұрыннан келісімшартпен бекітілгендіктен, жаңа мәмілелер күтілмейді. Дегенмен, сарапшы ЖИ тарапынан сұраныс және қуат шектеулілігі атом энергиясы бағасын өсіріп, Talen, Vistra және Public Service Enterprise Group-тың пайдасын арттырады деп болжайды.
Үш компанияның да акциялары бойынша банк «нарықтан жоғары» деген ұсынысын сақтап отыр, бұл оларды сатып алуға кеңес беруді білдіреді.
Ядролық ренессанс инвесторға не береді
Morgan Stanley сарапшыларының пікірінше, әлем «ядролық ренессанс» кезеңін бастан өткеріп жатыр және бұл инвесторлар үшін кең мүмкіндіктер ашады. Банктің есебі бойынша, атом энергетикасының өсу қарқыны былтырмен салыстырғанда жеделдеген, ал оған инвестициялар 2050 жылға қарай 2,2 трлн долларға жетеді. Бір жыл бұрын бұл көрсеткіш 1,5 трлн $ деп бағаланған.
Келесі бес жыл ішінде АҚШ-тың ең ірі электр желісін басқаратын PJM Interconnection компаниясының үйлер мен кәсіпорындарға арналған тарифтері 60%-ға дейін өсуі мүмкін. Бұған ірі технологиялық компаниялардың деректер орталықтарына деген сұраныстың артуы себеп болады. Бұл ретте жаңа электр көздері желіге сұраныс қарқынынан баяу қосылып жатыр.
АҚШ президенті Дональд Трамп өзінің екінші мерзімінде энергетикалық қауіпсіздікті негізгі басымдық етті. Мамыр айында ол елдің ядролық қуатын қазіргі 100 гигаваттан 2050 жылға қарай 400 гигаватқа дейін арттыру мақсатын қойды. Ол атом қуатын салу мен кеңейтуді жеделдететін бірнеше жарлыққа қол қойды.
«Қос мақсат: декарбонизация және энергетикалық қауіпсіздік, сонымен бірге атом энергетикасын портфельдерінен алып тастайтын инвесторлар үлесінің азаюы және қаржыландыру шарттарының жақсаруы — мұның бәрі атом энергетикасын шын мәнінде жаһандық инвестициялық тақырыпқа айналдырады», — дейді Morgan Stanley.
Банк деректеріне сәйкес, өткен жылдың соңында инвестициялық және зейнетақы қорлары басқаратын жаһандық активтердің тек 2,3%-ы ғана атом энергетикасын алып тастау саясатына бағынған, яғни бұл салаға инвестиция салуға тыйым салынған. Бұл көрсеткіш алкоголь немесе қару-жарақ өндірушілерге инвестициялауға тыйым салудан да төмен. Ал биыл маусымда Дүниежүзілік банк ядролық энергетика жобаларын қаржыландыруға салынған тыйымды алып тастады, бұл басқа халықаралық қаржы институттары тарапынан да осындай шешімдерге жол ашуы мүмкін.
