Таңғы жаңалықтар: Азия нарығы өсуде, «Керемет жетілік» қымбаттады

«Керемет жетілік» деп аталатын технологиялық алыптар — Microsoft, Apple, Nvidia, Amazon, Alphabet, Meta және Tesla компанияларының акциялары 9 сәуірде бір күнде 1,5 триллион доллардан астам нарықтық капитализация қосты. Бұған АҚШ-тың президенті Дональд Трамптың импорттық баж салықтарын 90 күнге тоқтату туралы мәлімдемесі себеп болды, деп хабарлайды Reuters. Соңғы апталардағы құлдырауға қарамастан, инвесторлар енді ІТ саласына қайта бет бұра бастады.

2024 жылдың соңындағы максимуммен салыстырғанда бұл жеті компанияның құны 3,4 триллион долларға азайған болатын, оның 2 триллионы — соңғы аптадағы құлдыраудың салдары. Бірақ Трамптың шешімі ИИ-инфрақұрылымына миллиардтаған доллар инвестиция салып жатқан компанияларға жаңа серпін берді.

«Бұл үзіліс компаниялардың қаржы және операциялық директорларына бұған дейін сауда шиеленістеріне байланысты тоқтап қалған ІЖ-бағыттарды қайта дамытуға мүмкіндік береді», — деді Running Point Capital компаниясының инвестициялық директоры Майкл Эшли Шульман.

10 сәуірде Азия-Тынық мұхиты аймағының қор нарықтары өсіммен ашылды. Трамптың Қытайдан басқа елдерге баж салығын көтеруді 90 күнге шегеру туралы шешімі Уолл-стритте 2008 жылдан бергі ең ірі сатып алу толқынына түрткі болды, деп жазады CNBC.

Ең жоғары өсім Жапонияда байқалды: Nikkei 225 индексі 8,35%-ға, ал кеңірек қамтитын Topix индексі 7,59%-ға өсті. Оңтүстік Кореяның Kospi индексі 5,38%-ға, ал Kosdaq — 5,09%-ға көтерілді. Аустралияның S&P/ASX 200 индексі де 4,67%-ға артты.

Қытайдағы жағдайға инвесторлар жіті назар аударуда, себебі АҚШ-пен арадағы сауда шиеленісі әлі де қысым көрсетіп отыр. Бейжің америкалық тауарларға 84% көлемінде кедендік баж енгізгеннен кейін, Вашингтон Қытай импортына салынатын салық мөлшерін 125%-ға дейін көтерді. Соған қарамастан Қытайдың CSI 300 индексі 1%-ға, ал Гонконгтың Hang Seng индексі 1,92%-ға өсті.

Үнді нарықтары аймақтағы жалғыз теріс динамика көрсеткен ел болды: Nifty 50 индексі сауда ашылған сәтте 0,61%-ға төмендесе, BSE Sensex 0,51%-ға азайды.

OpenAI Илoн Маскқа қарсы федералдық сотқа талап-арыз түсірді. Компания мәлімдеуінше Маск өзінің 200 миллион X (бұрынғы Twitter) жазылушылары алдында OpenAI-ға қарсы жала жапқан, корпоративтік құжаттарды талап етіп, жалған істер қозғап, компания активтерін сатып алуға талпынып, ұйымның тұрақтылығына қауіп төндірген.

Компания Масктың OpenAI жетістігін көтере алмағанын айтып, оның соңғы әрекеттерін «жалған» деп сипаттайды. Ақпанда Маск басқарған топ OpenAI-ды 97,4 миллиард долларға сатып алуды ұсынғанымен, директорлар кеңесі бұл ұсынысты қабылдамады. Ал наурызда компания бағалануы 300 миллиард долларға жетті.

Масктың адвокаты Марк Тоберов кеңестің бұл ұсынысты қарастыруға міндетті болғанын алға тартты және компанияны нарықтық бағамен сатып алуға ұмтылуды «араласу» деп санауға болмайтынын айтты.

Әлемдегі ең ірі хедж-қор — Bridgewater Associates негізін қалаушы Рэй Далио АҚШ пен Қытай арасындағы сауда келісіміне қол жеткізуді ұсынды. Ол Трамп әкімшілігін бюджет тапшылығын ЖІӨ-нің 3%-ына дейін қысқартуға үндеді.

«Трамптың ең қатал сценарийден бас тартып, теңгерімсіздікті келіссөз арқылы шешуге бет бұруы — әлдеқайда парасатты шешім», — деп жазды Далио X әлеуметтік желісінде.

АҚШ мемлекеттік облигацияларының бағасы жаңа баж салығы туралы жаңалықтардан кейін күрт төмендеп, әлемдегі ең ірі қарыз нарығында тұрақсыздық тудырды. Хедж-қорлар қарызға алған активтерін жаппай сата бастады, инвесторлар бұл тенденцияның ұзақмерзімді салдарларынан қауіптенуде, деп жазады Reuters.

Жарылыс тәрізді бұл жағдай 2020 жылғы наурыздағы дағдарыспен салыстырылып отыр, сол кезде АҚШ қазына облигацияларының нарығы күйреп, ФРЖ 1,6 триллион долларлық облигацияларды сатып алу бағдарламасын іске қосқан еді.

Нарық қатысушылары — брокерлер, трейдерлер және инвесторлар — сатылымның ретімен жүргенін атап өткенмен, кейбір көрсеткіштер, әсіресе сатып алу мен сату бағалары арасындағы спрэд, айтарлықтай кеңейген. Сауда бөлімшелерінің бірі спрэдтің әдеттегі деңгейден екі есе жоғары болғанын хабарлады.

Трамптың баж салығын уақытша тоқтату туралы шешімінен кейін 9 сәуір сәрсенбі күні облигациялар бойынша кірістілік ішінара төмендеді, бірақ күн соңында ол бәрібір жоғары деңгейде қалды. Апта басында облигациялар кірістілігі 2001 жылдан бергі ең күрт апталық өсімді көрсетті.

Сарапшылар бұл жағдайды 2020 жылдың наурызындағы оқиғамен салыстырып отыр. Ол кезде АҚШ-тың қазынашылық облигациялар нарығының құлдырауы «өтімділікке жаппай қашуды» туындатқан еді, нәтижесінде АҚШ Федералды резерві араласуға мәжбүр болып, $1,6 трлн көлемінде облигацияларды сатып алу бағдарламасын іске қосқан.