«Өте жақсы әңгіме»: Қытай басшысымен сөйлескен Трамп жаңа келіссөздер болатынын айтты
АҚШ президенті Дональд Трамп 5 маусым, бейсенбі күні Қытай Халық Республикасының төрағасы Си Цзиньпинмен телефон арқылы «өте жақсы» әңгімелескенін айтты. Оның сөзінше, бұл қоңырау шамамен бір жарым сағатқа созылып, «дерлік толығымен» сауда мәселелеріне арналды және «екі ел үшін де өте оң нәтижемен аяқталды», — деп жазды Трамп Truth Social желісіндегі парақшасында. Ол сондай-ақ алдағы уақытта екі елдің сауда өкілдері кездесетінін, ал кездесудің нақты орны кейін анықталатынын хабарлады.
CNBC басылымының жазуынша, Бейжің бұған дейін бұл бастама Трамп тарапынан болғанын хабарлаған.
АҚШ-тың қор индекстері осы жаңалықтардан кейін өсім көрсетті: әсіресе технологиялық Nasdaq Composite 0,7%-ға көтерілді. Кең нарықты қамтитын S&P 500 индексі 0,4%-ға, ал Dow Jones «көк фишкалар» индексі 0,3%-ға өсті.
АҚШ-тың қазынашылық облигациялары күрт арзандады: саясатқа сезімтал 2 жылдық қазынашылық облигациялардың кірістілігі күн ішінде 3,9%-ға жетті. MarketWatch жариялаған FactSet деректеріне сүйенсек, 10 жылдық облигациялар 4,39%-ға дейін көтерілсе, 30 жылдық қағаздардың кірістілігі 4,9%-ға жетіп, бұл күн ішіндегі ең жоғары көрсеткіш болды.
CNBC жазуынша, инвесторлар АҚШ пен Қытай арасындағы қарым-қатынастың жақсаратынынан үмітті. Өткен жылы екі ел арасындағы тауар айналымы 600 миллиард долларға жуықтаған. Сәуірде Швейцариядағы кездесуден кейін тараптар өзара баж салығын уақытша төмендетуге келіскен еді. Алайда өткен аптада Ақ үй әкімшілігі Қытайды сирек кездесетін пайдалы қазбалардың экспортына рұқсат беру жөніндегі міндеттемелерін кешіктіріп жатыр деп айыптады. Трамп 5 маусымдағы жазбасында: «Сирек жер элементтеріне қатысты өнімдермен байланысты қиындықтар енді қайталанбауы тиіс», — деп мәлімдеді.
