Трамп зейнетақы қорларына криптовалютаға инвестиция салуға рұқсат бермек. Кім ұтады?
АҚШ президенті Дональд Трамп зейнетақы қорларына балама активтерге, соның ішінде криптовалюталарға да инвестиция салуға мүмкіндік беретін жарлыққа қол қоймақ. Бұл туралы Reuters хабарлады. Осы жаңалық аясында 7 тамызда криптовалюта бағасы мен онымен байланысты компаниялардың акциялары қымбаттады: Coinbase, Robinhood және Strategy акциялары өсті.
Егжей-тегжейлі
— Бейсенбі күні биткоин шамамен 1,4%-ға, Ethereum — 5,3%-ға, ал капитализациясы бойынша үшінші криптовалюта XRP — 2,3%-ға қымбаттады.
— Биткоинның ең ірі корпоративтік иесі Strategy (бұрынғы MicroStrategy) акциялары 5,4%-ға өсті.
— Криптобиржа Coinbase акциялары 4,2%-ға, ал Robinhood сауда алаңының акциялары 6,3%-ға өсті.
— Керісінше, USDC стейблкойнының эмитенті Circle компаниясының акциялары 5,1%-ға құлдырады.
Криптоактивтер неге өсіп жатыр?
Инвесторлар АҚШ президенті зейнетақы қорларына балама активтерге: жекеменшік компанияларға, жылжымайтын мүлікке және криптовалюталарға инвестиция салуға рұқсат беретін жарлыққа қол қояды деп күтуде. Reuters-тің мәліметінше бұл жарлыққа 7 тамызда-ақ қол қойылуы мүмкін.
«Президент жарлығы бағалы қағаздар және биржа жөніндегі комиссияға (SEC) зейнетақы жинақтаушы жоспарларына (defined-contribution plans) балама активтерге қолжетімділікті жеңілдету үшін тиісті нормативтік актілер мен түсініктемелерге өзгерістер енгізуді тапсырады», — деді агенттікке аты аталмаған Ақ үй қызметкері.
Бұл қауіпті ме, әлде болашағы бар ма?
Reuters-тің жазуынша бұл қадам балама активтермен айналысатын ірі басқарушы компаниялар — Blackstone, KKR және Apollo Global Management үшін үлкен серпінге айналуы мүмкін. Өйткені бұл оларға көлемі $12 трлн болатын зейнетақы нарығына жол ашады.
Алайда сыншылар америкалықтардың зейнетақы жинақтары алыпсатарлық және өтімділігі төмен активтерге кетіп қалуы мүмкін деп ескертеді. Әдетте АҚШ-тың 401(k) салық кодексіне сәйкес ерікті зейнетақы бағдарламасына қатысушыларға акция, облигация және индекс қорларынан тұратын стандартты таңдау ұсынылады, деп түсіндіреді Yahoo Finance. Сонымен қатар, балама активтерге инвестиция көбіне жоғары комиссиялармен жүреді, деп атап өтеді Reuters.
«Жылжымайтын мүлік пен инфрақұрылым сияқты жекеменшік активтер табысты арттырып, нарықтық дағдарыстар кезінде инвесторларды қорғай алады», — деп жазды BlackRock директорлар кеңесінің төрағасы Ларри Финк акционерлерге арналған жыл сайынғы хатында. Бұл сөзді Yahoo Finance келтірген. — «Біз нақты айтуымыз керек: зейнетақы шоттарында жекеменшік активтерге рұқсат берілуі тиіс. Олар пайдалы. Және барған сайын ашық бола түсуде».
Көптеген тікелей инвестициялық қорлар (private equity) ритейл-инвесторлардан жаңа капитал көздерін шұғыл қажет етіп отыр. Соңғы үш жылдағы жоғары пайыздық мөлшерлеме классикалық сатып алу және қайта сату үлгісіне кері әсер етті, деп жазады Reuters.
Контекст
Трамп Ақ үйге келген соң АҚШ-та криптовалюталарды заңдастыру басталды. Бұрын криптокомпанияларды қудалаған SEC енді цифрлық активтерге анағұрлым бейім болып отыр. Шілде айында Конгресс «Криптоапта» өткізді. Осы аптада Өкілдер палатасы мен Сенат үш негізгі заң жобасын қабылдаумен айналысты — CLARITY, GENIUS және Anti-CBDC Surveillance State Act.
18 шілдеде Трамп қол қойған GENIUS заңы Tether (USDT) және Circle (USDC) сияқты стейблкойндарды пайдалануға құқықтық негіз қалады. Криптоиндустрияны реттеудің нақты шегін айқындауға бағытталған CLARITY заңы мен Федералдық резервтің цифрлық долларын іске қосуды бұғаттайтын Anti-CBDC заңы Өкілдер палатасынан өтіп, Сенаттың қарауына жіберілді.
Сайлауалды бағдарламасында «АҚШ-ты криптовалюта астанасына айналдырамын» деп уәде еткен Трамп инаугурациядан кейін биткоин бағасының бірнеше рет тарихи максимумға жетуіне ықпал етті. 13 шілдеде биткоин $123 091 деңгейіне жетіп, қазіргі уақытта шілде максимумынан 5%-ға төмен саудалануда.
