Wells Fargo ІТ-акциялардағы пайданы тіркеуге кеңес берді. Капиталды қайда салу керек?
Wells Fargo Investment Institute S&P 500 индексіне кіретін Nvidia, Microsoft, Broadcom және басқа да ЖИ-бумның негізгі бенефициарлары саналатын компаниялардың акциясы бар ІТ-сектордың рейтингін «позитивтіден» «бейтарапқа» дейін төмендетті, деп жазды MarketWatch. Банктің сарапшылары мұның басты себебін акциялардың шамадан тыс бағалануымен түсіндірді және инвесторларға бірнеше өзге де секторға назар аударуға кеңес берді.
Егжей-тегжейлі
Wells Fargo Investment Institute S&P 500 индексіндегі технологиялық сектор бойынша позициясын «бейтарап» деңгейге дейін төмендетті, деп хабарлады MarketWatch. Банк ІТ-акцияларды сатып алу жөніндегі кеңесін 4 сәуірден бері сақтап келген — сол кезде сауда баждарының артуы нарықтың құлдырауына алып келген еді. Сол уақыттан 24 қазанға дейін сектор 60% өсіп, S&P 500 индексінен 25%-дан астам алға шыққанын WFII-дің жаһандық инвестициялық стратегі Дуглас Бит атап өтті. Алайда, енді WFII бұл сектордың шамадан тыс бағаланғанын және пайданы тіркеудің уақыты келгенін мәлімдеді.
Сарапшының айтуынша, ЖИ-дің өрлеуі компаниялардың сатылымы мен пайдасының өсуін жалғастыра беруі мүмкін. Сондай-ақ, ол сектордың қарыздық жүктемесі төмен және еркін ақша ағыны жоғары екенін мойындады. Бұдан бөлек, жасанды интеллектке кететін капиталдық шығындар қарқынды өсіп жатыр, ал ірі технологиялық компаниялардың тоқсандық есептері жоғары күткен нәтижелерден де асып түсті. Дегенмен, Wells Fargo алаңдаушылық факторларын да атап өтеді: «Компаниялардың нарықтық бағалауы шарықтап кетті, ал шамадан тыс оптимизм мен жоғары күткен нәтижелер секторды жақын перспективада көңіл толмаушылыққа ұрындырады», — деді Бит.
Wells Fargo ірі технологиялық компаниялардың акциясына төнетін бірнеше қауіп-қатерге де назар аударды. Технология тақырыбы АҚШ пен Қытай арасындағы сауда келіссөздеріндегі негізгі мәселе болып қала беруде, ал елдер арасындағы шиеленіс әлі де сақталып отыр. Сонымен қатар жасанды интеллектке бағытталған капиталдық инвестициялардың өсуі инвесторлардың алаңдаушылығын тудыра бастады — мұның себебі олардың кірістілігінің төмен болу мүмкіндігі және «дотком дәуіріндегі» интернет-компаниялардың құлдырауынан кейінгі қарыздық қаржыландыру тәуекелімен байланысты.
«Түзету қысқа мерзімді болуы мүмкін, бірақ біз сектордың теріс тосын жайттарға, соның ішінде сарапшылардың пайда жөніндегі болжамынан сәл ғана қалып қоюына да осал екенін ойлаймыз. Сондықтан, біз ІТ-дің нарықтағы үлесін сектордың орташа деңгейіне дейін қысқарта отырып, пайданы тіркеу нұсқасын құп көреміз», — деп түйіндеді Бит.
Не сатып алғанымыз дұрыс?
WFII капиталды үш секторға қайта бөлуге кеңес берді: өнеркәсіп, коммуналдық және қаржы секторына.
«Өнеркәсіп және коммуналдық секторы жасанды интеллект трендіне дата-орталықтардың қарқынды дамып жатқан инфрақұрылымы арқылы қатысуға мүмкіндік береді, бірақ олардың мультипликаторлары ІТ секторына қарағанда төмен», — деді стратег. — «Сондай-ақ біз кірістілік қисығының өсуі мен реттеу ортасының қолайлы болуына байланысты қаржы секторында да жақсы перспективалар бар деп санаймыз. Бұдан бөлек, қаржы ұйымдары ЖИ-мен M&A мәмілелері (бірігу мен жұтылу) және қарыздық қаржыландыру арқылы байланысқан, әрі олардың бағасы S&P 500 индексімен салыстырғанда едәуір жеңілдікпен саудалануда».
Контекст
Microsoft компаниясының ағымдағы қаржы жылындағы капиталдық шығындары $94 млрд-тан асады, Meta — $70 млрд, ал Alphabet — $91 млрд-тан жоғары болады деп күтілуде. Алайда, инвесторлар бұл инвестициялардың кірістілігі мен оларды қарыз есебінен қаржыландыру қажеттілігіне алаңдай бастады, бұл өз кезегінде нарықтағы құбылмалылықты күшейтті, деп жазды CNBC.
Өткен аптада Nvidia мен Palantir-ді қоса алғанда жасанды интеллектке байланысты компаниялардың акциясы күрт арзандады: Nvidia қағазы 7%, ал Palantir — 11%-дан астам төмендеді. Бұл жаппай сатылымдар технологиялық сектордың негізгі индексі Nasdaq Composite-ті де төмен тартты — ол 3–7 қараша аралығында 3% түсті. Бұл сәуірден бергі ең нашар апталық динамика болды.
11 қарашада жапондық конгломерат SoftBank күтпеген жерден ЖИ-чиптер нарығының көшбасшысы Nvidia-ның $5 млрд-тан астам акциясын сатқанын хабарлады. Сейсенбі күнгі саудада Nvidia акциясы бір сәтте 3,9% арзандады.
