WSJ: Intel TSMC-ға инвестиция немесе серіктестік туралы ұсыныспен жүгінді
Серверлер мен ноутбуктерге арналған процессорлар нарығының көшбасшысы Intel ұзаққа созылған дағдарыс жағдайында чиптерді келісімшарт бойынша өндіретін ең ірі компания TSMC-ға инвестиция салу немесе серіктестік құру туралы ұсыныс жасады, деп хабарлайды The Wall Street Journal дереккөздерге сілтеме жасап. WSJ-дың мәліметінше Intel-дің сыртқы қаржыландыру тарту әрекеттері АҚШ үкіметі компанияның ірі акционері болғаннан кейін күшейе түсті.
Егжей-тегжейлі
WSJ дереккөздерінің айтуынша Intel қаржыландыру және серіктестік мәселелері бойынша тек Apple компаниясына ғана емес, TSMC-ға да жүгінген. Олардың сөзінше Intel-дың сыртқы инвестиция тарту әрекеттері АҚШ президенті Дональд Трамп бұл компанияға қызығушылық танытқанға дейін басталған, алайда АҚШ үкіметі Intel акцияларының 10%-ын сатып алған соң, бұл бағыттағы жұмыс жылдамдай түсті.
Биылғы жылдың басында Intel ауқымды капитал тарту жоспарын уақытша тоқтатқан болатын. Алайда WSJ дереккөздерінің айтуынша алдағы бірнеше айда компания жеке инвестициялық қорлар мен басқа да институционалдық инвесторлардан қаржы тарту әрекеттерін қайта бастай алады.
Intel-ге кімдер инвестиция салды
Тамыз айында Intel жапондық SoftBank Group-тан, яғни Arm компаниясының иесінен, 2 млрд доллар инвестиция алды. Өткен аптада Nvidia компаниясы Intel-ге 5 млрд доллар инвестиция салу ниетін мәлімдеп, бұл қаржыға Intel акцияларын сатып алмақшы. Reuters-тің бағалауынша бұл мәміле Nvidia-ны Intel-дің жарғылық капиталының шамамен 4%-ына иелік ететін ең ірі акционерлердің біріне айналдырады.
Акциялар жағдайы
2024 жылы Intel акциялары өз құнының 60%-ын жоғалтты, ал сол кезеңде АҚШ-тың S&P 500 қор индексі 23%-дан астамға өсті. Алайда 2025 жылдың басынан бері Intel акциялары 70%-ға қымбаттады. 24 қыркүйекте Bloomberg Intel компаниясының Apple-ден инвестиция сұрағаны туралы хабарлағаннан кейін, Нью-Йорктегі саудада Intel акциялары 6,4%-ға өсті. 25 қыркүйекте олар тағы 8,9%-ға көтеріліп, соңғы бір жылдан астам уақыттағы ең жоғарғы деңгейде сауда сессиясын аяқтады.
Осы жағдайға байланысты Seaport Research аналитигі Джей Голдберг 25 қыркүйекте The Fly басылымына берген мәлімдемесінде, Intel акцияларының рейтингін «сату» (Sell) деңгейінен «бейтарап» (Neutral) деңгейге көтерді, бірақ нақты баға нысанасын көрсеткен жоқ. Инвесторларға арналған жазбасында Голдберг Intel әлі де «дұрыс емес жолмен кетіп бара жатқанын» және оның фабрикаларын құтқару мүмкіндіктері «тарылып бара жатқанын» атап өтті, дегенмен қысқа мерзімді перспективада акция бағалары жаңа инвестициялар мен жағдайды тұрақтандыруға бағытталған «уақытша шешімдердің» арқасында қолдау табуы мүмкін екенін айтты.
