Нью-Йорктегі таң: сыртқы фон нарыққа жағымды серпін беріп тұр
Freedom Capital Markets Research директорының орынбасары Михаил Денисламовтың АҚШ қор нарығындағы оқиғаларға күнделікті шолуы және болжамы.
Нарықтан не күтеміз
Нарық қатысушылары импорт тарифтері төңірегіндегі жағдайды және келіссөздердің барысын жіті бақылауда. Тараптардың әртүрлі мәлімдемелерімен қатар жүріп жатқан сауда-саяси белгісіздік инвесторлардың көңіл-күйіне әлі де әсер ететін негізгі фактор болып қалуда.
Бүгінгі макроэкономикалық күнтізбеде Мичиган университетінің сәуір айына арналған тұтынушылық көңіл-күй индексінің нақты көрсеткіштері жарияланады. Алдын ала деректер индекс деңгейін 50,8 пункт деп тіркеді, бұл экономикадағы рецессиялық күтулерді білдіреді. Біздің ойымызша, бұл көрсеткіштің ЖІӨ динамикасымен байланысы төмен, сол себепті экономиканың нақты жағдайы туралы сенімді сигнал бере алмайды. Инфляциялық күтулердің деңгейі әлдеқайда маңызды — ол соңғы отыз жылдағы ең жоғары деңгейге жақын болып тұр.
Инвесторлардың назары Colgate-Palmolive (CL), Charter Communications (CHTR), Schlumberger (SLB) және Phillips 66 (PSX) компанияларының негізгі сауда сессиясы басталар алдында жарияланатын тоқсандық есептерінде болады.
Қазіргі уақытта АҚШ индексінің фьючерстері өсіммен саудалануда. Алдыңғы күні Alphabet (GOOG) компаниясының мықты есебін ескере отырып, бүгінгі сауда сессиясындағы тәуекелдер теңгерімін қалыпты позитивті деп бағалаймыз. Құбылмалылық жоғары болып қала береді деп күтеміз. S&P 500 индексінің 5430–5600 пункт диапазонында қозғалуын болжаймыз (алдыңғы сессияның жабылу деңгейіне шаққанда −1%-дан +2,1%-ға дейін).
Басты назарда
— Intel (INTC) акциялары бірінші тоқсандағы есеп жарияланғаннан кейінгі саудада 6,4%-ға арзандады. Компания қаржылық көрсеткіштерімен орташа болжамдардан асып түсті, бірақ екінші тоқсанға арналған әлсіз болжамы, негізгі сегменттердегі өсімнің бәсеңдеуі және бизнес дамуының қысқа мерзімді бағытының айқын болмауы инвесторларды алаңдатты. Мұның барлығы бизнесті қайта құрылымдау қажеттігі туралы алаңдаушылықты күшейтті.
— Alphabet (GOOG) қаңтар–наурыздағы кірісі $90,23 млрд болып, орташа болжамдардан асып түсті, ал акцияға шаққандағы пайдасы консенсус ($2,01) көрсеткішінен асып, $2,81 құрады. Нәтижесінде негізгі сауда жабылғаннан кейін компанияның акциялары 4%-дан астам қымбаттады. Инвесторлар Cloud және Services сегменттеріндегі өсімнің жеделдеуі, жасанды интеллект өнімдерінің дамуы (Gemini 2.5 іске қосылуы), сондай-ақ ақылы жазылушылар санының 270 млн-ға жеткенін оң бағалады.
— Gilead Sciences (GILD) акциялары 2025 жылға арналған пайда болжамын төмендеткеннен кейін 3%-ға арзандады. Компания акцияға шаққандағы пайда болжамын $5,95–6,35 аралығынан $5,65–6,05-ке төмендетті, бұл нарықтың орташа күтулерінен нашар. Түсім бойынша болжам ($28,2–28,6 млрд) да консенсус ($28,73 млрд) деңгейіне жетпеді. Бұл бірінші тоқсанда негізгі препарат Biktarvy сатылымының 7%-ға өсуіне қарамастан орын алды.
— T-Mobile US (TMUS) бірінші тоқсандағы қаржылық көрсеткіштері жоғары болып, жылдық болжамын көтергеніне қарамастан, посттөлем тарифімен жаңа абоненттер саны нарық күтулерінен аз болып шықты. Нәтижесінде акциялар негізгі сауда аяқталғаннан кейін 5%-дан астам төмендеді.
Кешегі нарықтағы жағдай
24 сәуірде АҚШ қор биржалары күннің жоғары көрсеткіштерімен аяқталды. S&P 500 индексі 2,03%-ға, Nasdaq 100 — 2,79%-ға, Dow Jones — 1,23%-ға, Russell 2000 — 2,0%-ға өсті. Ірі технологиялық компаниялар акциялары белсенді түрде жоғарылады.
Трамп әкімшілігі Қытаймен сауда келіссөздері жалғасуда деп мәлімдеді, бірақ Пекин мұны жоққа шығарып, тарифтерді алып тастауды талап етуде. Қытай АҚШ-пен сауда соғысының теріс әсерлерін азайту үшін кейбір шараларды жеңілдетуді қарастыруда. Ақ үй басқа елдермен де бұл мәселе бойынша келіссөздерді жалғастыруда. Жалпы белгісіздік жағдайында ФРЖ жұмыссыздықтың артуы сияқты экономикалық әлсіреу белгілері пайда болса, пайыздық мөлшерлемені төмендетуі мүмкін. Сонымен қатар тарифтік шиеленістің бәсеңдеуі туралы кешегі күтілімдер нарық өсімінің маңызды драйверіне айналды.
Ұзақ мерзімді пайдаланылатын тауарларға тапсырыс көлемі наурыз айында айлық мәнде 9,2%-ға өсіп, болжамдардан айтарлықтай жоғары болды. Дегенмен бұл өсімді толығымен дерлік көлік секторы қамтамасыз етті.
Алғашқы жұмыссыздық өтінімдері өткен аптада 222 мың болып, нарық болжамдарына (220 мың) жақын шықты, бұл еңбек нарығының тұрақтылығын көрсетеді.
Екінші нарықтағы тұрғын үй сатылымдары наурызда 4,26 млн-нан 4,02 млн-ға төмендеді, бұл нарықтың орташа күткен деңгейінен (4,12 млн) аз болды.
Компания жаңалықтары
— Tesla (TSLA: +3,5%) жазда іске қосылатын роботакси сервисін сынақтан өткізуде. Қазірдің өзінде 15 мың миль қашықтыққа 1500-ден астам сапар жасалған.
— Hasbro (HAS: +14,6%) соңғы тоқсанда жоғары маржиналды бағыттарға басымдық беру есебінен табыс пен кіріс болжамдарынан асып түсті. Тарифтік белгісіздікке қарамастан, компания жылдық болжамын өзгертпей, Disney Consumer Products-пен серіктестігін жалғастыруды жариялады.
— PepsiCo (PEP: −4,9%) акциялары тоқсандық аралас нәтижелерден кейін төмендеді. Органикалық кіріс артқанымен, сатылым 3%-ға төмендеп, операциялық пайда 10%-ға азайған.
— Procter & Gamble (PG: −3,7%) акцияға шаққандағы пайда бойынша күтулерден асып түсті, бірақ кіріс пен органикалық өсім нарық болжамдарынан төмен болды.
— Comcast (CMCSA: −4,0%) нәтижелері нарықты қанағаттандырмады. Кең жолақты интернет абоненттері мен видеожазылушылар санының төмендеуі кіріс пен пайданың болжамнан жоғары болу әсерін толық жойды.
— American Airlines (AAL: +3,1%) экономикалық белгісіздікке байланысты 2025 жылға болжамын алып тастады, бірақ акциялар пайда мен ақшалай ағынның жақсы көрсеткіштерінің арқасында өсті. Компания шығындардың өсуі мүмкін деп ескертті.
