Басты жаңалықтар: Уолл-стрит Big Tech есептерін күтуде, алтын арзандауда
АҚШ акцияларына фьючерстер аздап төмендеді. Бұл аптада S&P 500 индексіндегі 180 компания өз есептерін жарияламақ. Алтын бағасы рекордтық деңгейден кейін арзандауды жалғастыруда, өйткені сауда шиеленісі бәсеңдеп келеді. Beijing Roborock Technology компаниясы Гонконгта листинг өткізуді жоспарлап отыр. Осы және басқа да жаңалықтарды 28 сәуірге арналған әлемдік БАҚ шолуымыздан оқыңыздар.
Уолл-стрит Big Tech есептерін күтуде
АҚШ акцияларына фьючерстер апта басында аздап төмендеді. Бұл кезде инвесторлар корпоративтік есептер мен макроэкономикалық деректерді назарға алып, Трамп енгізген баж салығының АҚШ экономикасына әсерін бағалауда, деп жазады Yahoo Finance.
S&P 500 индексінің фьючерсі 0,5%-ға, Dow Jones фьючерсі 0,4%-ға, Nasdaq фьючерсі 0,6%-ға төмендеді.
Инвесторлардың назары тоқсандық есептерге ауды. Осы аптада S&P 500 индексіндегі 180 компания есеп береді. Big Tech арасынан Apple, Amazon, Meta және Microsoft нәтижелерін жариялайды. Сондай-ақ Coca-Cola, Eli Lilly және Chevron есептері күтілуде.
Азия нарықтары Қытайдың қолдау уәдесінен кейін сақ қимылдауда
Азия-Тынық мұхит аймағының нарықтары дүйсенбіде сақ қозғалуда. Инвесторлар Қытай билігінің экономикаға қолдау көрсетуге уәде берген мәлімдемелерін және АҚШ-пен сауда келіссөздерінің дамуын бақылауда, деп хабарлайды CNBC.
Қытай қаржы министрі Лан Фоань елдің жылдық өсім мақсаттарына жету үшін белсенді макроэкономикалық саясат жүргізетінін айтты.
— Қытайдың CSI 300 және Гонконгтың Hang Seng индексі нөлге жуық өзгерді.
— Жапонияның Nikkei 225 индексі 0,37%-ға, кеңірек қамтитын Topix 0,9%-ға өсті.
— Оңтүстік Кореяның Kospi индексі 0,13%-ға көтерілсе, Kosdaq 1,04%-ға төмендеді.
— Үндістанның Nifty 50 индексі 0,74%-ға, BSE Sensex 0,34%-ға өсті.
— Австралияның S&P/ASX 200 индексі 0,65%-ға артты.
«Бәрінен бұрын Америка» саясаты АҚШ-тың өзіне зиян келтіруі мүмкін
CNBC-дің жазуынша Трамптың «Америка бәрінен бұрын» идеологиясы АҚШ-тың әлемге Америкадан гөрі көбірек қажет екенін болжайды. Алайда бұл жағдай өзгеріп келеді.
Оңтүстік-Шығыс Азия елдері АҚШ баж салығынан кейін ішкі аймақтық сауданы күшейтіп, экспортты әртараптандыруда. Қытай АҚШ-тың қысымына жауап ретінде жаңа ынталандыру шараларын әзірлеуде.
Сондай-ақ АҚШ әлемдік экономиканың барлық негізгі салаларын бақылап отыр деп айту қиын. Мысалы, Қытай сирек металдар мен өндірістік металдар жеткізу тізбектерінде басымдыққа ие.
Бұл жағдай Трамптың саясаты ұзақ мерзімде АҚШ-тың өз позициясын әлсіретуі мүмкін екенін көрсетеді, дейді CNBC.
Roborock Гонконгта листинг өткізуді жоспарлауда
Beijing Roborock Technology компаниясы биыл Гонконгта акцияларын орналастырып, 500 млн доллар тартуды жоспарлап отыр, деп хабарлайды Bloomberg. Қазір келіссөздер бастапқы кезеңде, банктер әлі таңдалмаған.
Компания 2014 жылы Xiaomi қолдауымен құрылды. 2020 жылы Шанхай биржасында листингтен өткен. АҚШ президенті Трамптың тарифтері туралы мәлімдемесінен кейін Roborock акциялары арзандады. Жыл басынан бері компания акциялары 14%-ға төмендеді. Ал Гонконгтың Hang Seng индексі 10%-ға өсті, Shanghai Composite 2%-ға төмендеді.
KPMG болжамынша 2025 жылы Гонконгта Қытай компанияларының екінші реттік листингтері 15 млрд доллар табыс әкелуі мүмкін.
Алтын бағасы төмендеуде
Алтын бағасы өткен аптада рекордтық деңгейден кейін арзандауды жалғастыруда, деп хабарлайды Bloomberg. Бұл АҚШ пен Азия елдері арасындағы сауда келіссөздерінің оң белгілеріне байланысты.
Алтын унциясының бағасы 1,6%-ға төмендеп, шамамен $3268 болды. Сәрсенбіде $3500 шегінен асқаннан бері алтын 6%-дан астам арзандады.
Трамптың баж салығына қатысты мәлімдемесінен кейін Азия елдері АҚШ-пен уақытша келісімдер жасасуы мүмкін деген үміт пайда болды. Әкімшілік шамамен 18 елмен жаңа келіссөздер жүргізуге дайындық жүргізуде.
Saxo Capital Markets стратегі Чару Чанана инвесторлар сақтық танытқанымен, сауда шиеленісінің бәсеңдеу белгілеріне үмітпен қарайтынын атап өтті.
Сингапур уақыты бойынша сағат 11:03-те алтын бағасы тағы 1,1%-ға төмендеді. Bloomberg Dollar Spot индексі 0,1%-ға өсті. Сонымен қатар күміс, палладий және платина бағалары да төмендеді.
