«Дауыл алдындағы ең берік кеме»: Сарапшылар Meta есебінен не күтеді
Инвесторлар үшін басты назарда – жарнамадан түсетін табыс, күрделі шығындар мен еркін ақша ағыны.
Facebook, Instagram және WhatsApp платформаларының иесі Meta Platforms 30 сәуірде 2025 жылдың бірінші тоқсанына арналған есебін жариялайды. Өткен аптада технология алыбы Alphabet мықты нәтижелер көрсетті, бұл Уолл-стритті цифрлық жарнамаға деген сұраныс жайлы алаңдаушылықтан арылтты. Алайда Meta-дан инвесторлар көбірек мәлімет күтеді, өйткені оның Alphabet-тен айырмашылығы — болашаққа болжам жасай біледі. MarketWatch жазуынша, қазіргі кезде инвесторлар үшін экономикалық өсімнің баяулауы мен кедендік баждардың жарнама шығындарына әсері туралы кез келген түсініктеме маңызды.
Егжей-тегжейі:
Meta-ның тоқсандық есебіне дейін Уолл-стрит сарапшылары оптимистік көңіл күйде. Google-дың бас компаниясы Alphabet-тің мықты есебі цифрлық жарнама индустриясына деген үмітті күшейтті. Бірақ есеп беру маусымы технологиялық акциялар үшін тұрақсыз кезеңге тап келді: саланы сауда соғысы мен белгісіздік қыспаққа алған. Бұл технологиялық алыптардың жасанды интеллектке салатын ірі инвестицияларын қысқартуға мәжбүр ететін-етпейтіні белгісіз, деп жазады Bloomberg.
Жарнамаға баж салығының әсері
«Google-дың күтпеген жерден жақсы нәтижелері Meta-ға үлкен қысым түсіреді. Жарнама бизнесі қалай болып жатқанын көру қызық болмақ: қызығушылық Google есебінен кейін айтарлықтай өсті», деді Zacks Investment Management компаниясындағы клиенттік портфельдер менеджері Брайан Малберри.
«Meta-ның жарнаманы ақшаға айналдыру саласындағы табысы туралы кез келген жағымды пікір инвесторларды тіл модельдерін дамытуға кететін шығындарға алаңдатпауы мүмкін», дейді Morningstar сарапшысы Малик Ахмед Хан.
Wells Fargo сарапшылары Business Insider-ге берген түсініктемесінде: «Макроэкономикалық жағдайдың әлсіреуі аясында Meta платформасындағы жарнама шығындарының өсімі бірінші тоқсанда баяулағанымен, брендтік жарнама үлесінің аздығына байланысты басқа платформаларға қарағанда тұрақтырақ болды», деп жазды. Олардың пікірінше, Meta «дауыл алдындағы ең берік кеме» болуы мүмкін, өйткені ол басқа жарнама платформаларымен салыстырғанда көшбасшылықты сақтап отыр, бұл макроэкономикалық қиындықтардың біразынан қорғайды.
Bloomberg мәліметінше, нарыққа сауда соғысының Meta-ның жарнама шығындары мен Қытайдағы бизнесіне қалай әсер еткені туралы кез келген түсініктеме қызық. 2024 жылы Қытай Meta табысының 11%-ын қамтамасыз еткен.
«Meta-дағы жарнама бағасының өсуі кедергілерге тап болуы мүмкін, өйткені Temu мен Shein сынды ірі қытайлық жарнама берушілер сауда шиеленісінің күшеюіне байланысты шығындарын азайта бастайды», – деп жазды Bloomberg Intelligence сарапшысы Мандип Сингх.
Макроэкономикалық алаңдаушылықтарға қарамастан, JPMorgan Meta-ның ЖИ стратегиясын табысты іске асыруы оны жақсы нәтижеге жеткізеді деп есептейді.
«Біз Meta-ны инвесторлар үшін тартымды деп есептейміз. Жасанды интеллект арқылы жарнаманы жетілдіру, видеоформаттарды біріктіру, WhatsApp-тағы жарнама, Llama және Meta AI секілді бастамаларға үлкен үміт артамыз», – делінген аналитиктердің пікірінде (Business Insider келтіреді).
Инвесторлар нені ескеруі тиіс
«Meta-ның күрделі шығындар бойынша болжамы – 60-65 млрд доллар. Alphabet секілді бұл көрсеткіш растала ма, жоқ па – нарық соған назар аударады», деп жазады MarketWatch. Мұндай ауқымды шығындар алаңдаушылық тудырады, өйткені экономика баяуласа, ЖИ инфрақұрылымына деген сұраныс азаюы мүмкін.
Сондай-ақ инвесторлар үшін Meta-ның еркін ақша ағыны маңызды, өйткені бұл көрсеткіш компания бағасына әсер етеді. Сарапшылардың болжамынша, жоғары шығындарға байланысты бұл көрсеткіш 8,6 млрд долларға дейін қысқарады. Бұл өткен жылмен салыстырғанда 31,3%-ға аз.
CFRA сарапшысы Анджело Зиноның айтуынша, шығындарды азайтып, пайда маржасын жақсартуға бағытталған кез келген шара жағымды қабылданады.
Meta акциялары не болып жатыр
Meta акциялары 30 сәуірде сауда ашылғанда бірден 4,5%-ға арзандады. Bloomberg-тің жазуынша, биыл Meta акциялары «Керемет жетілік» деп аталатын өзге компаниялармен салыстырғанда азырақ зардап шекті. Ақпан айындағы шарықтау шегінен кейін төмендегенімен, жыл басынан бері тек шамамен 5% ғана арзандады. Қазіргі уақытта Meta-ның акциялары алдағы жылдағы табысқа шаққанда 21 коэффициентпен бағалануда. Бұл соңғы онжылдықтағы орташа көрсеткішке сәйкес келеді және Nasdaq 100 индексіндегі (коэффициенті 23) көрсеткіштен төмен.
MarketWatch мәліметіне сәйкес, сарапшылардың басым бөлігі Meta акцияларын сатып алуға кеңес береді. Яғни, олардың 63-і «сатып алу» немесе «артық салмақ» рейтингін берген, жетеуі «ұста» десе, екеуі «төмен салмақ» және «сату» деп бағалаған. Уолл-стриттің орташа бағасы – 705,9 доллар, бұл қазіргі бағадан 27,3%-ға өсу әлеуеті бар екенін білдіреді.
