Әуетакси өндірушісінің акциялары Palantir-мен әріптестік жайлы хабардан кейін өсті
13 мамыр, сейсенбі күні сауда қорытындысы бойынша Archer Aviation акциялары 22%-ға өсті. Компания Palantir бағдарламалық қамтама жасаушы ірі компаниясымен серіктесетінін жариялады. Олар бірге авиацияға арналған жасанды интеллект әзірлейді.
Егжей-тегжейлі
Электрлік әуетакси жасаушы Archer Aviation акциялары 13 мамырдағы сауда күні 22,9%-ға өсіп, $11,16 деңгейіне жетті. Компания Palantir компаниясымен бірге авиацияға арналған жасанды интеллект әзірлейтінін хабарлады. Жаңа ЖИ-жүйелер авиациялық технологияларды жетілдіруге бағытталған.
Archer әлі табыс таппағанымен, алғашқы Midnight ұшағының сертификаттау кезеңі жүріп жатыр. Бірінші тоқсандағы шығын бір акцияға 17 центті құрады, бұл сарапшылар күткен 28 центтен төмен. Операциялық шығындар — $144 млн (2023 жылғы сол кезеңдегі $142,2 млн-мен шамалас). Компанияның шотында $1 млрд астам қаражат бар, ал 2024 жылы $450 млн операциялық шығындарға жұмсауды жоспарлап отыр.
Тағы бір жағымды жаңалық — Midnight ұшағын коммерциялық қолдануға шығару күні алыс емес. 2024 жылы желтоқсанда Archer БАӘ-нің бірнеше ұйымымен серіктескенін мәлімдеген еді. Енді белгілі болғандай, Abu Dhabi Aviation және Ethiopian Airlines оның алғашқы клиенттері болады. Archer биыл жазда БАӘ-ге алғашқы ұшақтарын жеткізуді жоспарлап отыр.
Сарапшылар не дейді
Benchmark-тың сарапшысы Джош Салливан Archer акцияларына «Сатып алу» рейтингін беріп, $12 мақсатты баға ұсынды. Needham-нан Крис Пирс те осы ұстанымды сақтап, акцияны $13 деңгейінде бағалады.
HC Wainwright & Co компаниясының сарапшысы Амит Дайал да $12,50 бағасын сақтап қалды. Оның айтуынша eVTOL нарығы үшін реттеуші қолдау күшті болып тұр. Дайалдың болжамынша 2030 жылдан бастап Archer жыл сайын 300-ден астам ұшақ шығарып, 2034–2036 жылдар аралығында 3000-нан астам eVTOL өндірмек. Оның болжауынша, компанияның 2025 жылғы табысы — $18 млн, 2026 жылы — $42 млн, 2028 жылы — $1 млрд болады.
Ал JP Morgan сақтық танытуда. Аналитик Билл Петерсон акцияларға бейтарап рейтинг беріп, бағаны $9 деп бағалады. Ол Midnight ұшағының сертификатталу мерзімі әлі нақты еместігін алға тартты.
Компания туралы не білеміз
Archer Aviation — 2018 жылы Калифорнияда құрылған электрлік ұшақ өндіруші. Олар вертолет секілді ұшып-қона алатын, бірақ тыныш әрі экологиялық аэротакси жасап жатыр. Ұшақтар Джорджия штатындағы зауытта құрастырылмақ.
Компания $1 млрд астам инвестиция тартқан және $6 млрд көлемінде алдын ала тапсырыстары бар. Серіктестері — Southwest Airlines, United Airlines және автоконцерн Stellantis. Archer-дің мақсаты — қалалық кептелістерді айналып өтетін 15 минуттық рейстер арқылы көлік баламасына айналу. Компания Манхэттенді жақын маңдағы әуежайлармен байланыстыруды жоспарлап отыр.
